1 Samuela 7 - Ai Vola Tabu (Vakadewa Makawa Vakavoutaki 2021)

¹ A ra sa lako mai na kai Kiriaci-jiarimi ka kauta cake na kato i Jiova, ka kauta ki na vale i Epinatapi mai Kipea, ka ra sa qisi Iliesa na luvena me qarava na kato i Jiova.

² Mai na siga ko ya, a sa tiko dede mai Kiriaci-jiarimi na kato, ka sa rauta ni ruasagavulu na yabaki, ka ra sa lelevaki Jiova ko ira kecega na vale i Isireli.

Sa Dauveilewai se Veiliutaki e Isireli ko Samuela

³ A sa vosa vei ira kecega na vale i Isireli ko Samuela, ka kaya, “Kevaka kemuni sa saumaki vei Jiova e na yalomuni taucoko, mo ni biuta na nodra kalou na kai tani kei Aseteroci mai na kemuni maliwa, ka vakarautaka na yalomuni vei Jiova ka qaravi koya duaduaga, ena qai vakabulai kemuni ko koya mai na ligadra na kai Filisitia.”

⁴ Era sa qai biuti ira tani na Peali kei na Aseteroci ko ira na Isireli, ka ra sa qaravi Jiova duaduaga.

⁵ A sa qai kaya ko Samuela, “Mo ni vakasoqoni ira vata mada na Isireli kecega ki Misipa, ia ka'u na qai masulaki kemuni vei Jiova.”

⁶ A ra sa soqoni vata ki Misipa, a ra sa taki wai, ka sovara e na mata i Jiova, ka lolo e na siga ko ya, ka ra sa kaya mai kea, “Eda sai valavala ca vei Jiova.” A sa lewai ira na Isireli ko Samuela mai Misipa.

⁷ Ia ni ra sa rogoca na kai Filisitia sa soqoni vata mai Misipa ko ira na Isireli, era sa lako cake ko ira na nodra turaga na kai Filisitia me ra veivala kei ira na Isireli. A ra sa rogoca ko ira na Isireli, a ra sa rerevaki ira na kai Filisitia.

⁸ A sa kaya vei Samuela ko ira na Isireli, “Mo kakua ni cegu ni tagi vei Jiova na noda Kalou e na vukuda, me vakabulai keda mai vei ira na kai Filisitia.”

⁹ A sa kauta ko Samuela e dua na lami sa sucuma tiko na tinana, a sa vakacabora taucoko mei soro kama vei Jiova. A sa tagi ko Samuela vei Jiova e na vukudra na Isireli, ka sa vakarorogo vua ko Jiova.

¹⁰ Ni sa vakacabora tiko nai soro kama ko Samuela, era sa toro mai na kai Filisitia me ra veivala kei ira na Isireli. Ia sa qai ia na kurukuru vakadomoilevu vei ira na kai Filisitia ko Jiova e na siga ko ya, ka vakavuna me ra dro e na veilecayaki, ka ra sa vakadrukai e matadra na Isireli.

¹¹ A sa lako yani mai Misipa ko ira na Isireli ka cici muri ira na kai Filisitia, ka yaviti ira ka yaco sara ki na ruku i Peci-kari.

¹² A sa qai taura e dua na vatu ko Samuela, ka vakaduria e na maliwa i Misipa kei Seni, ka vakatoka na yacana ko Epenisa [Na vatu ni veivuke], ni sa kaya, “Sa vukei keda ko Jiova ka yacova na gauna oqo.”

¹³ A ra sa vakamalumalumutaki na kai Filisitia ka sega ni lako tale mai ki na nodra i yalayala ni vanua na Isireli. A sa veisaqasaqa kei ira na kai Filisitia na liga i Jiova e na gauna kecega i Samuela.

¹⁴ A sa vakasukai tale vei ira na Isireli na veikoro era a kovea mai vei ira na Isireli ko ira na kai Filisitia, mai Ekironi ka yaco ki Kaca; na kedra tiki ni vanua talega sa taura lesu tale ko ira na Isireli mai vei ira na kai Filisitia. A yaco talega na tiko veisaututaki e na kedra maliwa na Isireli kei ira na Amoraiti.

¹⁵ A sa lewai ira na Isireli ko Samuela e na veisiga kecega ka bula kina.

¹⁶ A sa lako voli e na veiyabaki ki Peceli, kei Kilikali, kei Misipa, ka sa lewai ira na Isireli e na yasana kecega oqori.

¹⁷ A sa dau lesu mai ki Rama, ni sa tiko kina na nona vale; a sa daulewai ira na Isireli mai kina ko koya, ka sa tara mai kina e dua nai cabocabo-ni-soro vei Jiova.