1 Samuela 4 - Ai Vola Tabu (Vakadewa Makawa Vakavoutaki 2021)

Taura na Kato ni Kalou ko Ira na Kai Filisitia

¹ A sa yaco vei ira kecega na Isireli na vosa i Samuela. Era sa qai lako yani ko ira na Isireli me ra veivala kei ira na kai Filisitia. Era sa la'ki tiko mai Epenisa, ka ra sa tiko mai Efeki na kai Filisitia.

² A ra sa tuvai ira vakaivalu ko ira na kai Filisitia me ra vala kei ira na Isireli, ia ni ra sa vala, sa mokuti ira na Isireli ko ira na kai Filisitia; a ra sa mokuti ira na mataivalu mai na veiwere, e le va beka na udolu na tamata.

³ A ra sa lako mai ki nai tikotiko ko ira na tamata, a ra sa kaya ko ira na nodra qase na Isireli, “A cava sa mokuti keda kina edaidai ko Jiova e na matadra na kai Filisitia? Me da kauta mada mai Sailo ki vei keda na kato ni veiyalayalati i Jiova, me yaco mai ki na keda maliwa, ka vakabulai keda mai na ligadra na noda meca.”

⁴ Era sa mani talaki ki Sailo ko ira na tamata, me ra kauta mai kea na kato ni veiyalayalati i Jiova-ni-lewevuqa, o koya sa tiko e na tadrua ni Jerupi. A rau sa tiko mai kea kei na kato ni veiyalayalati ni Kalou koi rau na luve i Ilai, ko Ofinai kei Finiasi.

⁵ Ia ni sa yaco mai ki nai tikotiko na kato ni veiyalayalati i Jiova, sa kaila ko ira kecega na Isireli e na kaila levu, ka sa yavala kina na vanua.

⁶ Ni ra sa rogoca ko ira na kai Filisitia na rorogo ni kaila, era sa kaya, “A cava nai balebale ni kaila levu oqo e na nodra i tikotiko na Iperiu?” Ni ra sa qai kila ni sa kau mai na kato i Jiova ki nai tikotiko,

⁷ era sa rere na kai Filisitia, ni ra sa kaya, “Sa lako mai e dua na kalou ki nai tikotiko.” Ka ra sa kaya, “Isa koi keda! Ni se sega ni bau yaco vakaoqo eliu.

⁸ Isa koi keda! O cei ena vakabulai keda mai na ligadra na veikalou qaqa oqo? Oqo o ira na kalou era a vakacataki ira na kai Ijipita e na mate ca kece mai na vanua lala.

⁹ Dou yaloqaqa ka valavala vakatagane, na kai Filisitia, mo dou kakua ni nodra bobula na Iperiu, me vaka ni ra a nomudou bobula tu e liu; ka dou i valavala vakatagane, ka ia nai valu.”

¹⁰ A sa ia nai valu ko ira na kai Filisitia, ka sa vakadrukai ko ira na Isireli, ni ra sa dro ko ira yadua ki na nona valelaca. A sa ka levu sara na moku, ka sa mate vei ira na Isireli e le tolu na oba (30,000) era sotia taubale.

¹¹ A sa kovei na kato ni Kalou, ka rau sa mate ko Ofinai kei Finiasi na luve i Ilai.

Na Mate nei Ilai

¹² A sa dua na tamata vei ira na Penijamini sa cici mai nai valu, a sa lako mai ki Sailo e na siga ko ya, ka sa kadresu na nona i sulu, ka sa kaburaka tu na qele e uluna.

¹³ Ia ni sa lako mai, raica, sa tiko vakatawa ko Ilai e na dua nai tikotiko e na bati ni sala, ni sa ririkotaka na kato ni Kalou na yalona. Ia ni sa lako mai na tamata ka tukuna e na koro, sa qoqolou na koro taucoko.

¹⁴ A sa rogoca na rorogo ni qoqolou ko Ilai, a sa kaya, “A cava nai balebale ni ue oqo?” Sa qai lako vakatotolo mai na tamata ka tukuna vei Ilai.

¹⁵ A sa ciwasagavulu ka walu na yabaki i Ilai, ka sa buawa na matana ka sa sega ni rai rawa.

¹⁶ A sa kaya vei Ilai na tamata, “Sai au ka lako mai nai valu, ka'u a dro edaidai mai nai valu.” A sa kaya ko koya, “A cava na ka sa yaco, na luvequ?”

¹⁷ A sa vosa mai ko koya sa mai tukutuku, ka kaya, “Sa dro ko ira na Isireli e matadra na kai Filisitia, a sa dua talega na moku levu vei ira na tamata, a sa mate talega koi rau na luvemu, ko Ofinai kei Finiasi; a sa kovei na kato i Jiova.”

¹⁸ Ia ni sa cavuta tiko ko koya na kato ni Kalou, sa qai bale sobu vakatadrai cake ko koya mai nai tikotiko sa voleka ki na matamata-ni-koro; a sa ramusu na domona, ka sa mate ko koya; ni sa qase ko koya, ka tamata bibi. A sa lewai ira oti na Isireli ko koya ka yabaki vasagavulu.

¹⁹ Ia sa bukete na vugona, na wati Finiasi, ka sa voleka ni vakasucu. Ia ni sa rogoca ko koya nai rogorogo ni sa kovei na kato ni Kalou kei na nodrau sa mate na vugona kei na watina, a sa cuva sobu ko koya ka vakasucu, ni sa tarai koya na bibi ni mosi ni nona taratara.

²⁰ Ia ni sa voleka ni ciba ko koya, sa kaya ko ira na yalewa era tiko vata kaya, “Mo kakua ni rere, ni ko sa vakasucuma e dua na gonetagane.” Ia sa sega ni vosa mai ko koya, ka sega ni vakarorogo.

²¹ A sa vakayacana na gone ko koya ko Ikapote [Sa yali nai ukuuku], ni sa kaya, “Sa qai takali vei ira na Isireli na nodra i ukuuku,” baleta ni sa kovei na kato ni Kalou, ka sa baleta talega na vugona kei na watina.

²² A sa kaya, “Sa takali vei ira na Isireli na ka era lagilagi kina, ni sa kovei na kato ni Kalou.”