1 Samuela 2 - Ai Vola Tabu (Vakadewa Makawa Vakavoutaki 2021)

Na Masu nei Ana

¹ A sa masu ko Ana, ka kaya, “Sa reki na yaloqu e na vuku i Jiova; sa cecere cake na noqu kaukauwa e na vuku i Jiova. Sa dalaga na gusuqu vei ira na noqu meca, ni'u sa marautaka na bula sa mai vei kemuni.

² “Sa sega e yalosavasava me vakataki Jiova: ni sai kemuni ga, ka sega ni dua tale; sa sega tale na uluvatu me vakataki koya na noda Kalou.

³ Dou kakua ni vakalevutaka na vosa viavia turaga; me kakua ni lako mai na gusumudou na vosalevu; ni sa Kalou daukila-ka ko Jiova, a sa lewa se sa vakaevei na nodra i valavala.

⁴ Sa ramusu na nodra dakai na kaukauwa, ia na kaukauwa sa kenai vau-ni-tolodra era sa voleka ni bale.

⁵ O ira ka mamau era sa taro cakacaka me rawa kina na kedra; ia ko ira ka dauviakana, era sa vakacegu. Sa vakasucu vakavitu ko koya ka yava, a sa malumalumu mai ko koya ka le vuqa na luvena.

⁶ Sa ia na veivakamatei ko Jiova ka sa ia na veivakabulai; sa lewa ko koya na lako sobu ki nai bulubulu ka lewa na vakaturi cake mai.

⁷ Sa ia na veivakadravudravuataki ko Jiova ka ia na veivakavutuniyautaki; sa ia na veivakamalumalumutaki ka sa vakatubura cake talega.

⁸ Sa vueta cake ko koya na dravudravua mai na kuvu ni qele; sa vueta cake na dravudravua ko koya mai nai binibini de-ni-manumanu, ka me vakatikora vata kei ira na turaga, ka me ra taukena talega nai tikotiko vakaturaga sa vakaiukuuku. Ni sa nei Jiova na duru kece kei vuravura, a sa vakadeitaka kina na vuravura.

⁹ “Ena maroroya ko koya na yavadra na nona tamata yalosavasava, ia era na vagalui e na butobuto ko ira nai valavala ca; ni na sega ni gumatua na tamata e na nona kaukauwa ga.

¹⁰ Ena raramusumusu na meca i Jiova; ena kurukuru mai lomalagi ko koya vei ira. Ena lewa nai yalayala kei vuravura ko Jiova; ia ena solia na kaukauwa vua na nona tui, ka laveta cake na ka vakaturaga nei koya sa lumuta.”

¹¹ A sa lako ki nona vale ki Rama ko Ilikana. A sa qaravi Jiova tikoga ko koya na gone e na mata i Ilai na bete.

Koi Rau na Luvei Ilai Tagane Daucaka Cala

¹² Ia sa luve ni vu-ni-ca koi rau na luve i Ilai; erau sa sega ni kilai Jiova.

¹³ Ia sa dauvakaoqo na kenai valavala ni bete vei ira na tamata. Ni sa vakacabora nai soro e dua na tamata, sa lako mai na nona tamata na bete ni sa saqa toka na lewe ni manumanu, a sa taura nai cula sa mata-i-tolu,

¹⁴ ka sa cokataka ki na tavuteke, se na kuro levu, se na kuro walega, se na bilo ni wai. Ia na ka kecega sa rawa mai e nai cula sa kauta na bete me kena. Erau sa kitaka vakakina mai Sailo vei ira kecega na Isireli era sa lako mai kina.

¹⁵ Ia ni ra se bera ni vakama na uro, sa dau lako mai na nona tamata na bete ka kaya vua na tamata sa vakacabora nai soro, “Mo solia mai na lewe ni manumanu me tavu me kena na bete, ni sa sega ni vinakata na nomu lewe ni manumanu sa saqa, ko ya ga sa droka.”

¹⁶ Ia ke sa kaya vua e dua na tamata, “Me ra vakama mada na uro, ka mo qai kauta me vaka ko sa vinakata”, ena qai kaya tale ko koya, “E segai, mo solia ga mai oqo; ia kevaka ko bese, ka'u na taura vakaukauwa.”

¹⁷ Ia sa ka levu sara kina na nodrau i valavala ca na cauravou e na mata i Jiova, ni rau sa beca nai madrali sa vakacabori vei Jiova.

Ko Samuela kei Ilai

¹⁸ A sa ia tiko na nona i tavi e na mata i Jiova ko Samuela ni sa gone ga, a sa vauci e na dua na efoti lineni.

¹⁹ A sa cakava ko tinana e dua na nona kote lailai, e na veiyabaki yadua ka kauta vua, ni rau sa lako cake kei na watina me vakacabora nai soro vakayabaki.

²⁰ A sa vosavakalougatataki Ilikana kei na watina ko Ilai, ka kaya, “Me solia vei iko ko Jiova na kawa mai vua na yalewa oqo, mei sosomi ni solisoli sa solia ko koya vei Jiova.” A rau sa lesu tale ki na nodrau vale.

²¹ A sa talevi Ana ko Jiova, ka sa kunekune ko koya, ka vakasucuma e le tolu na gonetagane ka le rua na goneyalewa. Ia sa tubu me levu na gone ko Samuela, e na mata i Jiova.

Sa Vunauci Rau na Luvena Tagane ko Ilai

²² A sa qase sara mai ko Ilai, a sa rogoca na ka kecega sa cakava koi rau na luvena vei ira kecega na Isireli; ka ni rau sa moceri ira na yalewa era sa dausoqoni vata mai ki na katuba ni vale ni veitavaki.

²³ A sa kaya vei rau ko koya, “A cava drau sa kitaka kina na ka vakaoqo? Ni'u sa rogoca na kemudrau i tukutuku ca mai vei ira na tamata kecega oqo.

²⁴ Me kakua, oi kemudrau na luvequ; ni sa sega ni vinaka nai rogorogo ka'u sa daurogoca; drau sa vakacalai ira na tamata i Jiova.

²⁵ Kevaka sai valavala ca e dua na tamata vua e dua tale, ena lewai koya na turaga-ni-lewa, ia kevaka sai valavala ca vei Jiova e dua na tamata, ko cei me na masulaki koya?” Ia erau sa sega ga ni vakarorogo ki na vosa nei tamadrau; ka ni sa nanuma ko Jiova me vakamatei rau.

²⁶ A sa tubu tiko na gone ko Samuela, a sa vinakati koya ko Jiova, kei ira talega na tamata.

Na Parofisai me Baleta na Vuvale nei Ilai

²⁷ A sa lako mai vei Ilai e dua na tamata ni Kalou, a sa kaya vua, “Sa vosa vakaoqo ko Jiova, ‘Au a rairai vakaidina li ki na lewe-ni-vuvale i tamamu ni ra a tiko voli mai Ijipita e na vale i Fero, se segai?

²⁸ Au a digitaki koya li mai vei ira na veiyavusa kecega ni Isireli, me noqu bete, me vakacaboisoro tiko e na noqu i cabocabo-ni-soro, me vakama na ka boi vinaka, me vakaisulutaki e mataqu e na efoti, se segai? Ia ka'u a solia ki na lewe-ni-vuvale i tamamu na nodra i madrali kama kecega na Isireli.

²⁹ A cava ga na vuna dou sa caqeta kina na noqu i soro kei na noqu i madrali laukana ka'u a vakarota me ia e na noqu i tikotiko, ka ko sa dokai rau na luvemu ka sega ni dokai au e na nomudou sa urouro vinaka mai na sigana ni nodra i solisoli kecega na noqu tamata na Isireli?’

³⁰ O koya oqo sa kaya kina ko Jiova na nodra Kalou na Isireli: ‘Au a yalataka me vakaitavi e na mataqu na nomu lewe-ni-vuvale, kei na lewe-ni-vuvale i tamamu, ka sega ni mudu’, ia ka sa qai kaya oqo ko Jiova, ‘Me yawa sara vei au oqo; ni'u na vakarokorokotaki ira ga era sa vakarokorokotaki au, ia ko ira era sa beci au era na beci talega.

³¹ Raica, sa toro voleka mai na gauna ka'u na muduka laivi kina na nomu kaukauwa kei na nodra kaukauwa na lewe-ni-vuvale i tamamu, me kakua tale ni dua e bula balavu me la'ki qase sara e na nomu vale.

³² Ia ko na kunea na meca e na noqu i tikotiko, e na ka vinaka kecega sa caka vei ira na Isireli; ia ena sega nai taba qase e na nomu vale ka tawa mudu.

³³ Ia na nomu tamata ka'u sa sega ni muduka tani mai na noqu i cabocabo-ni-soro, ena vakarusa na matamu ka vakararawataka na yalomu, ia ena mate kece na kawa ni nomu vale ni ra sa tamata bula tiko.

³⁴ Ia oqo na kenai vakatakilakila vei iko, sa na yacovi rau ruarua na luvemu, ko Ofinai kei Finiasi; erau na mate ruarua e na dua na siga.

³⁵ Ia ka'u na lesia vei au e dua na bete yalodina, o koya ena ia na nona i tavi me vaka na ka kecega sa tu e na lomaqu kei na yaloqu. Ia ka'u na vakatubura vua na lewe-ni-vuvale era yalodina, ka na ia na nona i tavi e na mata i koya ka'u na lumuta, ka tawa mudu.

³⁶ Ia ko koya yadua sa vo vei ira na nomu vuvale ena lako mai ka cuva sobu vua me dua kina na nona tiki ni siliva kei na tiki ni madrai, ka na kaya, Mo lesi au mada ki na dua na cakacaka vakabete, me'u kania kina e dua na tiki ni madrai.’ ”