1 Samuela 1 - Ai Vola Tabu (Vakadewa Makawa Vakavoutaki 2021)

Na Sucu nei Samuela kei na Nona Cabori

¹ Sa dua na tamata mai Ramaceimi-sofimi, mai na nodra vanua veiulunivanua na Ifereimi, na yacana ko Ilikana, na luve i Jiroame, na luve i Ilaiu, na luve i Tou, na luve i Sufi, na kai Efiraca.

² A sa le rua na watina. A yacana e dua ko Ana, ia na yaca ni kenai karua ko Penina. A sa vakaluveni ko Penina, ia sa sega na luve i Ana.

³ A sa lako cake na tamata oqo mai na nona koro e na veiyabaki, me ia na lotu ka vakacabora nai madrali vei Jiova-ni-lewevuqa mai Sailo. A rau sa tiko mai kea na luve i Ilai, ko Ofinai kei Finiasi, erau sa bete vei Jiova.

⁴ Ni sa yaco na siga me vakacaboisoro ko Ilikana, sa solia ko koya nai votavota eso vei Penina na watina, vei ira kece talega na luvena tagane kei na luvena yalewa.

⁵ Ia sa solia vei Ana ko koya e rua nai votavota, ni sa lomani Ana, ia sa sogota na ketena ko Jiova.

⁶ A sa vakayalocataki koya vakalevu na nona meca, me vakararawataka na lomana, ni sa sogota na ketena ko Jiova.

⁷ Ia ni sa kitaka vakakina ko Ilikana e na veiyabaki, ni sa lako cake ki na vale i Jiova ko Ana, sa vakararawataki koya tikoga ko Penina. A sa tagi kina ko koya, ka sega ni kana.

⁸ Sa qai kaya vua ko Ilikana na watina, “I Ana, a cava ko sa tagi tiko kina? Ka cava ko sa sega kina ni kana? Ka cava sa rarawa kina na yalomu? Au sa sega beka ni vinaka vei iko ka ca ke sa le tini na luvemu tagane?”

⁹ A sa tucake ko Ana, ni sa kana ka gunu oti mai Sailo. A sa tiko ko Ilai na bete e nai tikotiko sa voleka ki na duru ni vale i Jiova.

¹⁰ A sa rarawa na yalona, ka sa masu vei Jiova ko koya, ka tagi vakalevu.

¹¹ A sa cavuta na bubului, ka kaya, “Kemuni Jiova-ni-lewevuqa, kevaka ko ni na raica vakaidina na rarawa ni nomuni vada, ka nanumi au, ka sega ni guilecava na nomuni vada, ka solia vei au na nomuni vada e dua na gonetagane, ka'u na qai soli koya vei Jiova e na veisiga kecega sa bula kina, ia ena tabu tasi na uluna.”

¹² Ia ni sa daumasu tikoga ko koya e na mata i Jiova, sa vakaraica na gusuna ko Ilai.

¹³ A sa vosa voli ga e lomana ko Ana; sa vosa minimini ga, ka sa sega ni rogo na domona. A sa nanuma kina ko Ilai ni sa mateni ko koya.

¹⁴ A sa kaya vua ko Ilai, “Me bogi vica mada na nomu mateni? Mo biuta laivi na gunu waini.”

¹⁵ A sa vosa ko Ana, ka kaya, “Sa segai, noqu turaga, au sa yalewa yalorarawa koi au. Ia ka'u sa sega ni gunu waini se wai-ni-gunu kaukauwa, ia ka'u sa sova ga na yaloqu e na mata i Jiova.

¹⁶ Kakua ni nanuma na nomu vada me luve ni vu-ni-ca, ni'u sa vosa e na vuku ni kena levu ni noqu rarawa kei na noqu yalobitaki, ka yacova na gauna oqo.”

¹⁷ Sa qai kaya ko Ilai, “Mo lako e na vakacegu, ia me solia vei iko na Kalou ni Isireli na ka ko sa kerea vua.”

¹⁸ A sa kaya ko koya, “Me kune loloma mada e matamu na nomu vada.” A sa lako yani na yalewa e nona i lakolako, a sa kana, ka sa sega tale ni vakaveveku mata ko koya.

Sa Kunekune ko Ana ka Vakasucumi Samuela

¹⁹ A ratou sa sou e na mataka, ka ia na lotu e na mata i Jiova, ka lesu tale ki nodratou vale ki Rama. A rau sa veimoceri ko Ilikana kei Ana na watina; a sa nanumi koya ko Jiova.

²⁰ Ia ni sa yaco na kena gauna, sa kunekune ko Ana, ka vakasucuma na gone tagane, a sa vakatoka na yacana ko Samuela [Sa vakarorogo na Kalou], ka kaya, “Ni'u sa kerei koya vei Jiova.”

²¹ Ia sa lako cake ko Ilikana kei ira kecega na nona lewe-ni-vuvale me vakacabora vei Jiova nai soro vakayabaki, kei na nona bubului.

²² A sa sega ni lako cake ko Ana, ni sa kaya vua na watina, “Me kali mada na gone, au na qai kauti koya, me rairai e na mata i Jiova, ka me tiko mai kea ka sega ni mudu.”

²³ A sa kaya vua ko Ilikana na watina, “Mo cakava ga na ka e vinaka vei iko; mo tiko me kali mada ko koya; ia me vakataudeitaka na nona vosa ko Jiova.” A sa tikotiko ga na yalewa, ka vakasucuma na luvena, ka me kali oti mada.

²⁴ Ia ni sa kalia oti ko koya, sa kauti koya vata kaya, kei na dua na bulumakau sa yabaki tolu, kei na dua na efa madrai droka, ka dua na tavaya waini, ka kauti koya ki na vale i Jiova ki Sailo. A sa gone lailai ga ko koya.

²⁵ A ra sa vakamatea na bulumakau, ka kauta na gone vei Ilai.

²⁶ A sa kaya ko koya, “Noqu turaga, me vaka na kena dina na nomu bula, na noqu turaga, koi au na yalewa ka tu voleka vei iko eke ni'u sa masu vei Jiova.

²⁷ Au a kerea na gone oqo, ka sa solia mai vei au ko Jiova na ka ka'u a kerea vua.

²⁸ Ena ka oqo ka'u sa soli koya kina vei Jiova. Sa soli tiko vei Jiova e na veisiga kecega sa bula kina ko koya.” A sa lotu mai kea vei Jiova ko koya na gone.