Ṭaayṭas 3 - Nawa Haup

Achchha Kaam Karo

¹ Sab log ke samjhaao ki agua aur adhikaari log ke baat maane, aur ulog ke agaiñsṭ kaam nai kare. Ulog hardam taiyaar rahe ki kuchh achchha kaam kare

² aur kaṛua baat ya baad bibaad nai kare. Ulog ke sab ke sañghe naram aur daya se rahe ke hei.

³ Ham log pahile beokuuf raha, fuulish raha aur koi ke baat nai maanat raha, aur dunia ke sab chaahat aur khusi ke gulaam raha. Ham log kharaab raha aur sab se jaran karta raha. Sab koi ham log se haiṭ karat rahin, aur ham log bhi sab koi ke haiṭ karat raha.

⁴ Parmeshwar hamaar muktidaata hamme dekhaais ki u ketna achchha aur dayaalu hei.

⁵ U aapan daya se hamme bachaais, isse nai ki ham ketna achchha kaam kara hei. Parmeshwar aapan Pawitr Aatma ke sakti se hamme dhoy dees hei. U hamme nawa janam aur nawa suruwaat dees hei.

⁶ Parmeshwar Yeeshu Maseeh ham log ke muktidaata ke bhejis ki ham log ke uske Aatma mile.

⁷ Maseeh ke bartaao hamlog ke sañghe usse kahiñ jaada raha jetna ki hoy ke chaahi. U ham log ke Parmeshwar ke kaabil banaais aur anant jeewan ke aasha dees.

⁸ I sandes ekdam sachcha hei. I ṭeeching sab koi ke waaste iuzful aur helpful hei. Ham mañgta hei ki tum sab ke bataao ki ispe chale, ki jisse u sab log jon Parmeshwar pe biswaas kare hei, hardam achchha kaam kare.

⁹ Lekin baap daada ke murakhta pe baad bibaad nai karna. Aur Maozas ke kaanuun ke baare meñ baad-bibaad aur jhagṛa se duur rahna. Eisan jhagṛa hardam bina kaam ke aur bakwaas rahe hei.

¹⁰ Jon jhagṛa khaṛa kare hei, ulog ke ek ya dui dafe chetaaoni de deo. Tab ulog se koi waasta nai rakkho.

¹¹ Tum to janta hei ki ulog ke dimaag kharaab hei, aur ulog ke aapan paap dekhaay hei ki ulog ke ketna kasuur hei.

Kuchh Eḍvaais Aur Aakhri Namaste

¹² Ham Artiyaas ya Tukhikus ke tumhaar lage bhejega. Jab u pahuñch aai, tab kosis karke Nikupulis meñ ham se milna. Kaahe ke ham soch lia hei ki ham winṭa wahiñ bitaayga.

¹³ Jab wakeel Jenas aur Apullos jaay lagi, to ulog ke jetna hoy saki otna madat karna, ki jisse ulog ke lage u sab kuchh rahe jon ulog ke jaruurat hei.

¹⁴ Ham log ke seekhe ke chaahi ki keise ulog aapan ṭaaim achchha aur kaabil kaam kare meñ bitaay.

¹⁵ Ulog jon hamaar sañghe hei, sab tum log ke namaste bheje hei. Aur u sab jon hamaar dost aur biswaasi hei, ulog ke bhi ham log ke bagal se namaste bolna. Ham preya karta hei ki Prabhu ke daya tum sab ke sañghe hardam rahe.