Ṭaayṭas 2 - Nawa Haup

Alge Alge Grup Ke Waaste Hukum

¹ Ṭaayṭas, tumme khali wahi sikhaay ke hei, jon sachcha hei.

² Buḍḍha admi log se bataao ki dheeraj rakkhe aur gambheer aur samajhdaar rahe. Ulog ke biswaas, prem aur dheeraj kabhi kamti nai hoy.

³ Buṛhia aurat log ke bataao ki ulog ke chaal chalan weisan hoy jeise Prabhu maañge hei. Ulog aur log ke baare meñ gosip nai kare, ya waain peete rahe. Ulog wahi sikhaay jon ṭheek hei,

⁴ tab jawaan aurat log aapan aapan pati aur laṛkan se prem kari.

⁵ Har ek jawaan aurat samajhdaar aur dayaalu rahe, aur iske saathe achchha se ghar ke chalaay, jon aapan pati ke hardam aage rakkhe. Tab koi bhi Parmeshwar ke vachan ke insalṭ nai kari.

⁶ Yahi rakam naojawaan log ke bataao ki apne aap pe kaabu rakkhe.

⁷ Hardam dusra ke waaste achchha kaam ke ekzaampal bano. Sinsia aur gambheer raho jab koi dusra ke kuchh sikhaata hei.

⁸ Achchha bhaasha meñ baat karo ki koi ke bura bole ke mauka nai mile. Yahi karo, aur tab tumhaar dusman ke saram lagi aur u tumhaar agaiñsṭ kuchh bole nai saki.

⁹ Gulaam log ke samjhaao, ki ulog aapan aapan maalik ke baat maan ke ulog ke khusi rakkhe. Gulaam log aapan maalik ke kabhi jawaab nai de,

¹⁰ ya ulog ke ghar se chori nai kare. Ulog pe maalik puura bharosa kare sake aur hardam sach bole. Tab sab koi, Parmeshwar hamaar muktidaata ke baare meñ jon cheej sikhaawa gay raha, uske mahaan aadar dekhaai.

Parmeshwar Ke Daya Aur Nawa Laaif

¹¹ Parmeshwar hamme dekhaais ki u ketna dayaalu hei, jab u aay ke ham sab log ke bachaais.

¹² U hamme sikhaais ki ham log aapan aapan bura rasta aur dunia ke chaahat ke chhoṛ dei, aur i dunia meñ achchhaai aur sachchaai se aapan laaif bitaai.

¹³ Ham log aasha se bhara hei, aur agorta hei ki ham log ke mahaan Parmeshwar aur muktidaata Yeeshu Maseeh lauṭ ke aai.

¹⁴ U apne aap ke hamlog ke de dees hei ki hamlog ke u sab se bachaai jon bura cheej hei aur ham log ke dil ke safa kari. U maañgat raha ki hamlog uske aapan log bana rahi aur wahi utsukta (eager) se kari jon raaiṭ hei.

¹⁵ Yahi sab baat ke aapan puura adhikaar se sikhaate, sudhaarte aur hausla dete raho. Dhyaan rakhna ki tum sab ke aadar jeete sako.