Revelaishan 7 - Nawa Haup

Parmeshwar Ke 144,000 Log

^1-2 Iske baad ham chaar ainjals dekha. Chaaro dharti ke ek ek kona pe khaṛa rahin. Ainjals log chaaro hawa ke roke rahin, ki jisse dharti, samundar aur peṛ pe koi hawa nai lage. I ainjals log ke adhikaar mila raha ki dharti aur samundar ke haani pahuñchaay. Tab ham jahañ se suuraj nikre hei huañ se ek aur ainjal ke aate dekha, aur u taiyaar raha ki jinda Parmeshwar ke cheenha log pe lagaawe. Jor se chillaay ke u chaaro ainjals se bolis,

³ “Koi bhi peṛ ya dharti ya samundar ke haani nai pahuñchaana! Waiṭ karo, ham aapan Parmeshwar ke sewak log ke maatha pe cheenha lagaata hei.”

⁴ Tab ham suna ki ketna log ke maatha pe cheenha laga hei. Israayel ke ṭraaib se 144 000.,

⁵ Juḍa ke palwaar se 12 000, Ruuban ke palwaar se 12 000, Gad ke palwaar se 12 000,

⁶ Asher ke palwaar se 12 000, Naptaali ke palwaar se 12 000, Manashe ke palwaar se 12 000,

⁷ Simion ke palwaar se 12 000, Levi ke palwaar se 12 000, Issachar ke palwaar se 12 000,

⁸ Jabluun ke palwaar se 12 000, Josef ke palwaar se 12 000, aur Benjameen ke palwaar se 12 000.

Sab Jagha Ke Log

⁹ Iske baad, ham ek baṛa bheeṛ dekha, usman etna log rahin ki gina nai jaay sakat rahin. Ulog sab jaat ke, ṭraaib ke, des ke, aur bhaasha bole waala rahin, aur ulog siñghaasan ke saamne Memna ke aage khaṛa rahin. Ulog ujjar kapṛa pahine rahin aur haath meñ khajuur ke ḍaar liye khaṛa rahin,

¹⁰ aur ulog chillaay ke bolin, “Ham log ke Parmeshwar jon siñghaasan pe beiṭhe hei, uske lage log ke bachaawe ke sakti hei, aur Memna ke bhi lage wahi sakti hei.”

¹¹ Jon sab ainjals siñghaasan ke agal bagal rahin, u sab siñghaasan ke aage muuṛ nichche kar ke ghuṭna ṭek leen. Baṛkua log aur chaar jinda praani ulog ke sañghe ghuṭna ṭek leen. Tab ulog sab Parmeshwar ke weship karin

¹² aur bolin, “Aameen! Hamaar Parmeshwar ke baṛaai, mahima, sammaan, dhanbaad, aadar, sakti, aur saamarth hardam rahe! Aameen!”

¹³ Ek baṛkua ham se puuchhis, “Kaa tum janta hei ki ilog kon hei jon ujjar kapṛa pahine hei? Kaa tum janta hei ki ilog kahañ se aain hei?”

¹⁴ “Sir,” ham jawaab dia, “tumme jaane ke chaahi.” Tab u ham se bataais, “Yahi log hei jon bahut dukh uṭhaain hei aur kaṛa ṭaaim se gujrin hei. Ulog aapan kapṛa Memna ke khuun meñ dhoin hei aur etna ujjar kar leen hei.

¹⁵ Aur ab Parmeshwar ke siñghaasan ke saamne khaṛa bhain hei aur raat aur din uske Mandir meñ uske weship kare hei. Jon siñghaasan pe beiṭhis hei ulog ke uppar tambu bichhaay dei.

¹⁶ Ulog kabhi bhi bhuuka ya pyaasa nai rahi, aur ulog suuraj se ya koi bhi kaṛa dhuup se tang nai hoi.

¹⁷ Siñghaasan ke beech meñ jon Memna hei ulog ke charwaaha rahi. Ulog ke u laaif dewe waala paani bhara nadi meñ le jaai, aur Parmeshwar sab ke aañkhi se aañsu pochh dei.”