Revelaishan 22 - Nawa Haup

¹ Fir ainjal hamme ek nadi dekhaais, jon ekdam safa raha aur uske paani laaif dewat raha. I nadi u siñghaasan se suru bhais raha jon pe Parmeshwar aur Memna beiṭhe rahin.

² Tab u siṭi ke main rasta ke beech meñ bahe lagis. Nadi ke duuno taraf peṛ raha jon meñ baarah rakam ke fal saal ke har mahina lagat raha, u fal laaif det raha aur iske patti ke sab jaati ke log dawaai ke rakam achchha hoy ke kaam meñ laawat rahin.

³ Parmeshwar ke saraap ab u siṭi ke log pe nai rahi. Memna aur u siñghaasan pe beiṭhi, aur uske log Parmeshwar ke weship kari

⁴ aur uske aamne saamne dekhi. Parmeshwar ke naam ulog ke maatha pe likhaan rahi.

⁵ Kabhi bhi raat nai hoi, aur jon log huañ rahe hei, ulog ke kabhi bhi batti ya suuraj ke jaruurat nai paṛi. Parmeshwar ulog ke laaiṭ rahi, aur ulog hardam raaj kari.

Yeeshu Ke Aana

⁶ Tab hamme bataawa gais, I vachan sachcha hei aur biswaas kare laayk hei. Prabhu Parmeshwar aapan nabi log ke aatma konṭrol meñ rakkhe hei, aur wahi hei jon ainjals ke bhejis ki uske sewak log se dekhaay ki wahi lage kon cheej hoi.

⁷ Yaad rakhna, ham jaldi aayga! Parmeshwar u sab ke aasheesh dei jon i buk ke sandes pe dhyaan dei.

⁸ Hamaar naam Yuhanna hei, hamahi hei jon i sab dekha aur suna raha. Jab ham i sab dekh aur sun lia, tab ham ainjal jon hame sab cheej dekhaais raha, uske aage ghuṭna ṭek lia aur weship kare laga.

⁹ Lekin u ainjal bolis, Eise nai karo! Ham bhi tumhaar rakam ek naukar hei. Ham tumhaar pichchhe chale waala, nabi log, aur jon jon i buk ke baat maane hei, u sab ke daas hei. Parmeshwar hee hei jon ke tumme weship kare ke chaahi.

¹⁰ I buk ke profasis ke chhipaay ke nai rakkho. I sab cheej bahut jaldi hoi.

¹¹ Kharaab log kharaab kaam karte rahi, aur jon meila dil ke hei u fir bhi meila dil ke rahi. Lekin achchha log achchha kaam karte rahi, aur Parmeshwar ke log hardam pawitr rahi.

¹² Tab hamme bataawa gais, Ham jaldi aayga! Aur jab ham aayga, tab sab ke ulog ke kaam ke mutaabik inaam dega.

¹³ Ham Alfa aur Omega hei, pahila aur aakhri, suru se ant tak.

¹⁴ Parmeshwar u sab ke aasheesh dei jon aapan kapṛa dhoy lees hei. Ulog ke adhikhaar rahi ki jeewan ke peṛ se fal khaay lewe, aur ulog siṭi ke gaiṭ se ghuse sake hei.

¹⁵ Lekin siṭi ke bahire kutta, jaadu ṭona kare waala log, kharaab log, hatyaara log, muurti puuja kare waala log, aur sab jon jhuuṭ bole ke laaik kare hei aur ulṭa kaam kare hei, sab rahi.

¹⁶ Ham Yeeshu hei! Aur hamahi hei jon ainjal ke bheja raha ki sab chech ke waaste tum log ke sab cheej bataay. Ham Ḍeiviḍ ke Baṛa Gharaana ke hei aur ham sabere ke chamke waala taara hei.

¹⁷ Aatma aur dulhin bole hei, “Aao!” Jon koi i sune hei ulog boli, “Aao!” Agar tum pyaasa hei, aao! Agar tum jeewan de waala paani mañgta hei, aao aur le leo! U free hei!

¹⁸ Jon koi bhi i buk ke profasi sune hei, ham ulog ke chetaaoni deta hei. Agar tum usman kuchh aur joṛa, to Parmeshwar i buk meñ likhaan museebat ke aur baṛhaay dei aur tumme bhugte ke paṛi.

¹⁹ Agar tum i profasi se kuchh nikaarega, to Parmeshwar tumme jon i buk meñ likhaan hei, u jeewan ke peṛ aur pawitr siṭi meñ bhaag nai lewe dei.

²⁰ Jon i sab baat bolis hei bole hei, “Ham jaldi aayga!” To, Prabhu Yeeshu jaldi aao!

²¹ Ham binti karta hei ki Prabhu Yeeshu tum sab pe daya kari.