Raom 3 - Nawa Haup

¹ Yahuudi hoy se kaa mile hei? Khatna kare se bhi kaa faayda?

² Bahut rakam se achchha hoy sake hei! Sab se pahile, Parmeshwar ke samaachaar Yahuudi log ke dewa gais raha.

³ I sach hei ki usman se kaafi log vachan pe biswaas nai karin raha. Iske matlab to i nai ki Parmeshwar pe bharosa nai kara jaay sake hei, kaahe ki ulog ke lage biswaas nai hei.

⁴ Nai! I nai hoy sake hei! Parmeshwar sachche bole hei, aur baaki sab log jhuuṭa hei. Parmeshwar ke baare meñ vachan bole hei, “Tumhaar sab baat ke sachche maana jaai, aur koṭ meñ tum jeet jaayga.”

⁵ Agar hamaar kharaab kaam i dekhaay sake hei ki Parmeshwar ketna sachcha hei, to ham aur kaa bole sakta hei? Kaa Parmeshwar ke khaatir i galti hei ki u gussaay aur hamme saja de? I to fuulish baat bhais.

⁶ Lekin hamaar jawaab hei “Nai” Kaahe ki Parmeshwar dunia ke nyaay keise kari?

⁷ Lekin agar tumhaar jhuuṭ Parmeshwar ke sach aur mahima saabit kare hei, to tum i puuchhega ki kaahe ke fir bhi Parmeshwar tumme paapi bole hei.

⁸ Tum tab bole sakta hei, “Aao ham kuchh kharaab kare, ki jisse kuchh achchha usse nikre!” Koi koi to yahi bole hei ki ham yahi bolta hei. Lekin Parmeshwar raaiṭ hei aur wahi rakam se saja de hei.

Koi Achchha Nai Hei

⁹ Haañ tab, kaa Yahuudi log geir Yahuudi log se achchha hei? Nai, bilkul nai! Yahuudi aur geir Yahuudi duuno aapan paap meñ jie hei jeise ham pahile bhi bataaya raha.

¹⁰ Vachan hamme bataay hei, “Koi bhi dharmi nai hei,

¹¹ Usman se ek bhi nai samjhe hei aur naa to Parmeshwar ke khoje hei.

¹² U sab Parmeshwar se duur chala gain hei aur u sab ke koi daam nai hei. koi ek bhi nai hei jon raaiṭ kaam kare hei.

¹³ Ulog ke baat i rakam hei jeisan ek khula kabar, aur ulog ke jeebh khali jhuuṭ bole ke khaatir ṭheek hei. Ek ek baat etna jahar se bhara hei ek saañp ke jahar ke rakam,

¹⁴ aur ulog kaṛua saraap ke chhoṛ ke aur kuchh nai bole hei.

¹⁵ I sab log bahut jaldi maare peeṭe ke khaatir dauṛ paṛe hei

¹⁶ Aur jahañ bhi ilog jaay hei, huañ pe barbaadi chhoṛ de hei aur sab cheej naas kar de hei.

¹⁷ Ilog nai jaane hei ki keise saanti se raha jaay hei.

¹⁸ Ilog to Parmeshwar se bhi nai ḍare hei.”

¹⁹ Ab ham jaan gaya hei ki kaanuun wahi ke hei jon kaanuun ke mutaabik rahe hei. Kaanuun i sab bole hei ki jisse koi bahaana nai banaay sake aur Parmeshwar bhi i nai bole sake ki puura dunia dosi hei.

²⁰ Parmeshwar yahi kaaran sab ke nai apnaay hei ki u khali kaanuun ke paalan kare hei. Nai, bilkul nai! Kaanuun eise kare hei ki hamaar paap ke hamme janwaay de hei.

Parmeshwar Ke Rasta.

²¹ Ab ham dekhe sakta hei ki Parmeshwar hamme keise apnaay hei. Maozas ke kaanuun, aur dusra nabi ke kaanuun bhi hamme yahi sab bataay hei ki keise rahe ke chaahi.

²² Parmeshwar sab ke ekke rakam dekhe hei. U sab ke apnaay hei kaahe ki ulog Prabhu Yeeshu Krisṭ pe biswaas kare hei.

²³ Ham sab paap kara hei aur Parmeshwar ke mahima se duur hoy gaya.

²⁴ Lekin fir bhi Parmeshwar hamme weise maane hei jiske hakdaar ham nai hei, aur Yeeshu Krisṭ ke dwaara hamme apnaay hei aur hamaar paap se chhuṭkaara dewaay hei.

^25-26 Parmeshwar, Krisṭ ke bhejis ki jisse u hamaar khaatir balidaan hoy. Yeeshu Maseeh aapan khuun hamme bheñṭ karis ki jisse biswaas se ham Parmeshwar ke lage aay saki. Parmeshwar i sab i kaaran karis ki u ham sab ke dekhaay sake ki hardam se u ham paapi log ke maafi dees aur hamaar sañghe dheeraj rakkhis. Aur i bhi dekhaay hei ki Parmeshwar raaiṭ hei jab u Yeeshu ke biswaasi log ke apnaay hei.

²⁷ Ab aur kuchh baaki nai hei ki ham uspe ghamanḍ kari. Kuchh bhi nai! Is ke kaaran kaa hei? Kaa yahi ki ham kaanuun ke maanta hei? Nai, lekin i hoy sake hei ki ham uspe biswaas karta hei.

²⁸ Ham i dekhta hei ki ulog ke Parmeshwar apnaay hei kaahe ki ulog uspe biswaas kare hei, i kaaran nai ki ulog kaanuun ke maane hei.

²⁹ Kaa Parmeshwar khali Yahuudi log ke hei? Kaa u geir Yahuudi log ke nai hei? Haañ u sab ke Parmeshwar hei!

³⁰ Dunia meñ khali ekke Parmeshwar hei, aur u Yahuudi aur geir Yahuudi sab ke apnaay hei, aur u bhi khali u sab ke biswaas ke kaaran.

³¹ Kaa ham aapan biswaas se kaanuun ke barbaad kar dei? Nai bilkul nai! Ham sab uske aur majbuut banaata hei.