Raom 1 - Nawa Haup

¹ Pol jon ki Yeeshu Krisṭ ke daas hei, uske taraf se. Parmeshwar hamme chunis ki ham uske chela bani, aur u hamme alag karis ki ham achchha khabar parchaar kari.

² Jon u hamme bahut din se waada karis raha, jon uske nabi log Baaibal meñ bataais raha.

^3-4 I achchha khabar uske laṛka, hamaar Prabhu Yeeshu Krisṭ ke baare meñ hei jon ek aam admi ke rakam Ḍeiviḍ ke palwaar ke raha. Lekin Pawitr Aatma hamme i dekhaais ki Yeeshu u taagatwaala Parmeshwar ke beṭa hei, kaahe ki u mar ke bhi jinda hoy gais raha.

⁵ Yeeshu hamaar sañghe daya karis kaahe ki u hamme aapan chela chunis, ki jisse dunia bhar ke log uske hukum maane aur uspe biswaas kare.

⁶ Tum, usman se kuchh log hei jon ke Yeeshu Maseeh chunis hei.

⁷ I chiṭṭhi Raom ke sab log ke khaatir hei. Parmeshwar tum sab se prem kare hei aur tum sab ke chunis hei ki tum sab uske bana raho. Ham binti karta hei ki Parmeshwar hamaar Pita aur hamaar Prabhu meñ anugrah aur saanti tumme milte rahe!

Dhanbaad Ke Preya

⁸ Sab se pahile, tum sab ke khaatir, ham Parmeshwar se Yeeshu Krisṭ ke naam pe dhanbaad deta hei. Ham iske i kaaran karta hei ki dunia bhar meñ log tumhaar biswaas ke baat kare hei.

⁹ Parmeshwar dekhis hei ki keise ham tumhaar waaste preya kare ke band nai karta, aur ham uske aapan dil se dekh bhaal karta hei aur uske laṛka ke baare meñ achchha khabar bhi sunaata hei.

¹⁰ Hamaar sab preya meñ, ham Parmeshwar se yahi mañgta hei ki hamme tumhaar lage bheje ke rasta sahaj kar de.

¹¹ Ham tumme dekhe mañgta hei aur tumhaar sañghe u aasheesh baaṭe mañgta hei jon Parmeshwar ke Aatma hamme dees hei. Tab tum aapan biswaas meñ aur majbuut hoy jaayga.

¹² Ham jon kuchh bolta hei, wahi biswaas se ham ek dusra se bataay ke u sab ke hausla baṛhaay sakta hei.

¹³ Hamaar frenḍs, ham mañgta hei ki tum i baat jaano ki ham ketna dafe plen banaaya ki ham aay ke tum sab se mili. Lekin sab ṭaaim kuchh naa kuchh hoy gais, aur ham aay nai paata. Ham to mañgta hei ki ham Raom meñ Yeeshu ke pichchhe chale waala chela log ke jeet lei, jeise ham aur jagha pe kara hei.

^14-15 I nai matlab rakkhe hei ki huañ pe log paṛha likha aur sivilaaizḍ hei, ya paṛha likha nai hei aur sivilaaizḍ bhi nai hei. Hamme to sab ke achchha khabar bataay ke hei. Yahi khaatir ham etna mañgta hei ki ham Raom meñ tum log ke lage aay saki.

Achchha Khabar Ke Sakti

¹⁶ Hamme i achchha khabar se ghamanḍ hei! I Parmeshwar ke shaktishaali tareeka hei ki u sab log ke bachaay jon uspe bharosa kare hei, chaahe u Yahuudi hoy ya geir Yahuudi.

¹⁷ Achchha khabar hamme bataay hei ki jon sab ke lage biswaas hei uske Parmeshwar aapan lage le lewe hei, lekin haañ khali wahi jiske lage biswaas hei.

Sab Koi Dosi Hei

¹⁸ Swarag se Parmeshwar dekhaay hei ki u paapi log se ketna gussa hei, jon kharaab se kharaab kaam kar ke sachchaai ke dabaay de hei.

¹⁹ Ulog sab jaane hei jon Parmeshwar ke baare meñ jaane ke hei, kaahe ki Parmeshwar ulog ke sab dekhaais raha.

²⁰ Parmeshwar ke bheetri sakti aur swabhaao nai dekhaay hei. Lekin rachna se pahile, Parmeshwar i sab dekhaais ki u jon banaais hei u sab keisan hei. Yahi kaaran ulog ke koi bahaana nai hei.

²¹ Ulog Parmeshwar ke baare meñ jaane hei, lekin fir bhi uske naa to aadar sammaan kare hei aur naa hee dhanbaad de hei. Ulog ke soch samajh bekaar hei, aur u sab ke bina kaam ke dimaag bhi añdhera meñ rahe hei.

²² Ulog daawa kare hei ki u sab ke lage dimaag hei, lekin ulog to bekaar hei.

²³ Ulog anant Parmeshwar ke puuja nai kare hei. Badle meñ, ulog muurti ke puuja kare hei, weisan muurti ke jon admi ke rakam dekhaay hei lekin hardam nai rahe sake, aur jon jaanwar aur chiṛia aur reñge waala jaanwar ke rakam hoy hei.

²⁴ Aur tab Parmeshwar ilog ke aapan aapan rasta jaay de hei. Ulog jon cheej maañge hei wahi kare hei, aur ulog ke saṛa bichaar ulog se saṛa saṛa kaam aapan deñhi se karwaay hei.

²⁵ Ulog Parmeshwar ke sachchaai ke badle jhuuṭ ke apnaain, aur Parmeshwar ke badle meñ jon cheej ke u banaais uske puuja karin, naa ki khud Parmeshwar ke, jon ke mahima hardam rahi. Aameen.

²⁶ Yahi kaaran Parmeshwar ulog ke neech kaam kare ke waaste chhoṛ dees hei. Aurat log admi se rista nai rakkhe maañge, aur ek dusra ke saathe u kaam kare hei jon naichral nai hei.

²⁷ Yahi rakam admi log bhi ek dusra se bartaao kare hei. U log aurat ke sañghe rishta nai rakkhe maañge hei lekin admi, admi ke sañghe rishta rakkhe hei. U log ek dusra ke sañghe gira kaam pe utar aay hei, aur kaa hoy hei ki ulog ke aapan i kaam ke saja mile hei.

²⁸ Aur jab ki ilog Parmeshwar ke baare meñ nai soche maañge hei, tab Parmeshwar bhi ulog ke dimaag bekaar kar dees hei. Yahi kaaran u sab kharaab kharaab kaam kare hei.

²⁹ U sab dusṭ, kapṭi aur laalchi hei, aur kharaab se kharaab kaam jeise hatya, jhagṛa, jhuuṭ bolna, aur chhal kapaṭ se bhar gain hei.

³⁰ Ulog ek dusra ke buraai kare hei, aur Parmeshwar se jaran kare hei. Ulog ghamanḍ kare hei, apne aap ke baṛaai kare hei, jid kare hei, aur hardam soche hei ki kon rakam se kharaab kaam kare sake. Eisan log aapan maiya bappa ke aadar nai kare hei.

³¹ Ulog bekaar hei, biswaas kare laaik nai hei, aur dusra log pe daya nai kare hei.

³² U log jaane hei ki Parmeshwar bataais raha ki jon koi bhi i rakam kaam kare hei, uske mar jaay ke chaahi. Lekin fir bhi ulog eisane kaam karte jaay hei, aur dusra log se bhi bataay ki eisehiyeñ karo.