Luuk 17 - Nawa Haup

Biswaas Aur Sewa

¹ Yeeshu aapan chela log se bolis, “Hardam kuchh naa kuchh rahi jon log ke paap kare ke kaaran hoy sake hei, aur jon i karaay hei, uspe afsos hei!

² Yahi achchha hota agar uske gaṭai meñ ek baṛa patthar baañdh ke aur uske samundar meñ giraay dewa jaay, ki jisse u chhoṭa log se paap nai karwaay.

³ Yahi kaaran saaodhaan raho. “Agar tumhaar bhaiya paap kare hei to uske ḍaaṭo, aur agar u pastaay hei to uske maaf kar deo.

⁴ Agar u ek roj meñ saat dafe tumhaar agaiñsṭ paap kare aur fir aay ke saato dafe tum se maafi maañge aur bole, ‘Ham pastaata hei,’ to tum uske maaf kar deo.”

⁵ Tab chela log Yeeshu se bolis, “Ham log ke biswaas majbuut banaao!”

⁶ Yeeshu jawaab dees, “Agar tumhaar biswaas sarso ke daana ke baraabar hota, aur tum malbari ke peṛ se bolta, ‘Jaṛ se ukhaṛ ke jaao aur samundar meñ lag jaao,’ to u tumhaar baat maan leta.

⁷ Tum meñ se kon hei ki jab tumhaar naukar jon khet jote hei aur bheṛa charaay hei, aur jab u khet se lauṭ ke aay, to u usse boli, ‘Jaao jaldi se khaana khaay leo?’

⁸ Nai, tum i nai bolega. Tum bolega ‘Hamaar khaana banaao, aur jab tak ham khaai pee, tab tak tum hamaar sewa karo, tab tum khaay pee lena.’

⁹ Kaa ek naukar ke uske maalik uske sewa kare ke khaatir dhanbaad nai de sake hei?

¹⁰ Aur yahi rakam tum bhi jab u sab kaam kar leta hei, jon tumme dewa gais hei tab bolo, ‘Ham to wahi maamuli kaam kara jon hamme kare ke raha.’ ”

Yeeshu Das Admi Ke Achchha Kare Hei

¹¹ Jab Yeeshu Yarushalam ke taraf jaat raha, tab Saamria aur Galeel ke beech se hoy ke nikris.

¹² Aur ek gaaoñ meñ gais, to thoṛa duur pe khaṛa das koṛhi uske milin.

¹³ Ulog chillaay ke bolin, “E Yeeshu, E Swaami, ham pe daya karo!”

¹⁴ Yeeshu ulog ke bagal dekh ke bolis, “Jaao aur apne aap ke paadri ke dekhaao.” Aur eise bhais ki rasta meñ jaate jaate ulog ṭheek hoy gain.

¹⁵ Aur jab usman se ek dekhis ki u achchha hoy gais hei, tab bahut jor se chillaay ke Parmeshwar ke baṛaai karte lauṭ aais.

¹⁶ U muh ke bal Yeeshu ke goṛ pe gir paṛis aur uske bahut dhanbaad dees. U admi ek Saamri raha.

¹⁷ Is pe Yeeshu puuchhis, “Kaa das admi achchha nai bhain raha? To u nao admi kahañ hei?

¹⁸ Kaahe ke khali ekke pardesi Parmeshwar ke dhanbaad de ke waaste lauṭ ke aais hei?”

¹⁹ Tab Yeeshu u admi se bolis, “Uṭho aur jaao, tumhaar biswaas tumme achchha kar dees hei.”

Parmeshwar Ke Raaj

²⁰ Kuchh Farisi Yeeshu se puuchhin ki Parmeshwar ke raaj kab aai. Yeeshu ulog ke jawaab dees, “Jab Parmeshwar ke raaj aai tab dekhaai nai dei.

²¹ Koi nai boli, ‘Dekho u hiañ hei! Ya huañ hei!’ Kaahe ke Parmeshwar ke raaj tumhaar beech meñ hei.”

²² Yeeshu aapan chela log se bolis, “U ṭaaim aai jab tum Manush ke laṛka ke roj dekhe ke maañgega, lekin dekhe nai paayga.

²³ Log tum se boli, ‘Huañ dekho!’ ‘Hiañ dekho!’ U ṭaaim tum chala nai jaana aur ulog ke pichchhe bhi nai bhagna.

²⁴ Manush ke laṛka ke roj, u rakam rahi jeise asmaan meñ ek bagal se dusra bagal tak bijli chamke hei.

²⁵ Lekin pahile to, uske bahut dukh uṭhaay ke hei, aur i jamaana ke sab log uske rijekṭ kar dei.

²⁶ Jab Manush ke laṛka aai, tab jeise Noa ke roj raha, weisaiyeñ rahi.

²⁷ Log u roj tak khaat piyat rahin, saadi byaah karat rahin, jon roj tak Noa jahaaj meñ nai gais. Tab ek baṛa baaṛh aais aur sab kuchh naas hoy gais.

²⁸ Loṭ ke ṭaaim meñ bhi eisehiyeñ bhais raha. Sab koi khaawat piyat, len den karat, peṛ paudha lagaawat aur ghar baar banaawat rahin.

²⁹ Lekin jon roj Loṭ, Sadom se nikar gais, wahi roj asmaan se aagi aur flaims giris aur sab ke naas kar dees.

³⁰ Jon roj Manush ke laṛka saamne aai, u roj bhi ṭheek eisehiyeñ hoi.”

³¹ “U roj jon chhat pe rahi aur ulog ke cheej ghar ke bhittar rahe jaai, to uske lewe ke waaste nichche nai utarna, aur yahi rakam jon khet meñ rahi, ulog ke ghar nai lauṭe ke chaahi.

³² Loṭ ke aurat ke yaad karna.

³³ Jon koi bhi aapan jaan bachaay ke kosis kari, u uske khoy dei, aur jon aapan jaan suru meñ khoi, u uske bachaay lei.

³⁴ Ham tum se bataata hei u raat ke dui jane ek chaṭaai pe rahi, ek ke le lewa jaai aur dusra ke chhoṛ dewa jaai.

³⁵ Dui aurat ekke jagha pe chakki peesat hoi, ek ke le lewa jaai aur dusri ke chhoṛ dewa jaai.

³⁶ Dui admi khet meñ hoi, ek ke le lewa jaai aur dusra ke chhoṛ dewa jaai.”

³⁷ Tab chela log Yeeshu se puuchhis, “E Prabhu, i sab kahañ hoi?” Yeeshu bolis, “Jon jagha laash rahi huañ geedaṛ to jaruur rahi.”