Luuk 1 - Nawa Haup

¹ Pyaare Thiufilus Kaafi log hisṭri likhe ke kosis karin hei jon hamaar beech meñ bhais raha.

² Ulog wahi baat likhin hei jon ham log tak aais hei, i wahi log hei jon sab baat ke suru se jaanin aur parchaar karin hei.

³ Yahi kaaran Onrabal Thiufilus ham u sab baat ke achchha se chhaan been kar lia hei aur ab raaiṭ ṭaaim hei ki ham tumhaar khaatir u sab ke weisaiyeñ likhi jeise u sab bhais raha.

⁴ Hamme yahi kare ke hei kaahe ki tum sab jaan jaao ki jon sab ham seekha hei, u sab sachcha hei.

Yuhanna Ke Peida Hoy ke Niuz

⁵ Jon ṭaaim Heraḍ, Juḍia ke raaja raha wahi ṭaaim Abiyaah ke grup meñ Zekraaya naam ke ek admi raha, aur uske aurat ke naam Elizabeth raha, aur ulog Eran ke palwaar ke rahin.

⁶ U duuno Parmeshwar ke aage dharmi rahin, aur Prabhu ke sab baat aur ruuls ke maanat rahin aur uspe chalat rahin.

⁷ U duuno ke koi laṛkan nai rahin kaahe ke Elizabeth baañjh rahi aur u duuno buḍḍha bhi hoy gay rahin.

⁸ Ek roj Zekraaya aapan paari pe Parmeshwar ke aage kaam karat raha.

⁹ Paadri ke mutaabik huañ ke reeti riwaaj raha ki ek admi ke chuna jaay jon aay ke Mandir meñ roj dhuup jaraay aur yahi kaaran u Mandir meñ gais.

¹⁰ Aur dhuup jaraay ke ṭaaim sab log bahire khaṛa hoy ke preya karat rahin.

¹¹ Wahi ṭaaim Prabhu ke ek ainjal huañ jahañ batti jaraawa jaay hei, uske raaiṭ saaiḍ aay ke khaṛa hoy gais.

¹² Jab Zekraaya uske dekhis, to ghabraay gay aur ḍare lagis.

¹³ Lekin ainjal usse bolis, “He Zekraaya, ḍaro nai kaahe ke Prabhu tumhaar preya sun lees hei aur tumhaar aurat ek bachcha ke peida kari aur tum uske naam Yuhanna rakkhega.”

¹⁴ Uske peida hoy se tumme bahut jaada khusi hoi, aur bhi bahut log iske kaaran khusi hoy jaai.

¹⁵ Prabhu ke aañkhi meñ Yuhanna mahaan hoi, u waain aur daaru nai pee, aur aapan amma ke peṭ meñ se hee Pawitr Aatma se bhar jaai.

¹⁶ Aur Israayel ke log meñ se bahut se log ke u Prabhu Parmeshwar ke taraf lauṭaay laai.

¹⁷ U Ilaayja nabi ke aatma aur taagat se Prabhu se bhi aage chala jaai. U laṛkan aur bappa ke milaai aur jon Parmeshwar ke nai maane hei, u sab ke sachcha rasta pe bhi laai aur Prabhu ke waaste uske laayk log ke taiyaar kari.

¹⁸ Zekraaya ainjal se bolis, “I ham keise jaane sakta hei? Ham to buḍḍha hoy gaya hei, aur hamaar aurat bhi buṛhia hoy gais hei.”

¹⁹ Ainjal uske jawaab dees, “Ham Gaibrial hei, jon Prabhu ke jagha meñ tumhaar saamne khaṛa hei, aur tum se baat karta hei, aur ham achchha khabar yaane ke susamaachaar sunaay ke waaste bheja gaya hei.

²⁰ Lekin tum i sandes pe biswaas nai kara jon raaiṭ ṭaaim pe aai aur sachche hoi. Kaahe ki tum is pe biswaas nai kara, yahi kaaran tum bole nai sakega, aur u roj tak nai bolega jon roj i promis jon ham kara hei, puura nai hoy jaai.”

²¹ I beech jon log bahire khaṛa rahin, u sab Zekraaya ke waiṭ karat rahin aur sochat rahin ki kaahe ke u Mandir meñ etna deri lagaay hei.

²² Jab u bahire aais tab bole nai sakis. Ulog jon bahire khaṛa rahin jaan gain ki, Mandir meñ u koi ke darshan paais hei. U sab ke aapan haath se ishaara karat raha, lekin bole nai sakis, kaahe ke u guuñga hoy gais raha.

²³ Jab Mandir ke kaam khalaas hoy gais, tab Zekraaya ghare lauṭ gais.

²⁴ Wahi ṭaaim Elizabeth amma bane waali rahi, aur paañch mahina tak ghar ke bhittar luk ke rahis aur bolat rahi,

²⁵ “Prabhu ham pe daya karis hei ki jisse sab log hamaar apmaan nai kare saki.”

²⁶ Ek mahina ke baad Parmeshwar ke bagal se Gaibrial ainjal, fir se Galeel ke Naasrat meñ ek sandes le ke kuaari Meri ke lage bheja gais.

²⁷ Meri ke mangni Josaf se bhais raha jon Ḍeiviḍ ke palwaar ke raha.

²⁸ Ainjal, Meri ke namaste karis aur uske paas aay ke bolis, “Tumme aanand aur jay hoy. Prabhu tumhaar sañghe hei.”

²⁹ I baat sun ke Meri ghabraay gais aur soche lagis ki i baat ke matlab kon cheej hei.

³⁰ Tab ainjal Meri se bolis, “Ḍaro nai, Prabhu tumse khusi hei.

³¹ Tum maañ bane waali hei aur tumhaar ek laṛka peida hoi. Uske naam tum Yeeshu rakhna.

³² U bahut mahaan hoi aur Prabhu Parmeshwar uske bappa Ḍeiviḍ ke raaj gaddi uske dei.

³³ Aur u Jaykab ke gharaane pe raaj kari. Aur uske raaj ke ant kabhi nai hoi.

³⁴ Tab Meri bolis, “I keise hoi? Ham to abhi kuaari hei, aur hamaar abhi saadi bhi nai bhais hei.”

³⁵ Tab ainjal bolis, “Pawitr Aatma tum pe aai aur Prabhu ke sakti tumpe hardam rahi aur tumhaar laṛka, Parmeshwar ke laṛka kahaai.

³⁶ Aur kaa tumme yaad hei ki tumhaar ek palwaar bhi hei, Elizabeth, jon buṛhia hoy gais hei aur uske ekko laṛkan bhi nai hei? Uske bhi ek laṛka hoi.

³⁷ Prabhu sab kuchh kare sake hei, kaahe ki uske khaatir koi kaam kaṛa nai hei.

³⁸ “Ham to Prabhu ke daasi hei,” Meri bolis “Weisaiyeñ hoi jeise tum bola hei.” Aur ainjal uske lage se chala gais.

Elizabeth Ke Lage Meri

³⁹ Thoṛa deri ke baad Meri taiyaar bhais, aur pahaaṛi jagha pe Juḍia ke ek ṭaaun meñ gais.

⁴⁰ U Zekraaya ke ghare jaay ke Elizabeth ke namaste karis.

⁴¹ Jeise Elizabeth Meri ke namaste sunis weisaiyeñ uske peṭ meñ bachcha kuudis aur Elizabeth, Pawitr Aatma se bhar gais.

⁴² Aur tab u bahut jor se chillaay ke bolis, “Tum sab aurat meñ mahaan hei, aur tum jon bachcha ke peida karegi, u bhi bahut mahaan hoi!

⁴³ Aur hamaar sañghe etna baṛa cheej kaahe bhais ki hamaar Prabhu ke amma apne hamaar paas aais hei.

⁴⁴ Jeise hamaar kaan meñ tumhaar namaste sunaais, weisaiyeñ hamaar peṭ meñ bachcha khusi ke maare kuudis.

⁴⁵ Tum dhann hei, jon biswaas karti hei ki Prabhu jon kuchh tum se bolis, u puura hoi.”

Jayjaykaar Ke Gaana

⁴⁶ Meri bolis, “Ham aapan dil ke gahraai se Prabhu ke baṛaai karta hei.

⁴⁷ Aur hamme bahut khusi hei ki Prabhu hamme bachaais hei.

⁴⁸ Ham Parmeshwar ke maamuli daasi hei, aur wahi hamaar khayaal rakkhe hei. Abhi se janam janam ke log kahiyeñ ki Prabhu ke daya ham pe hei.

⁴⁹ U bahut taagatwaala Parmeshwar hei, aur hamaar khaatir bahut baṛa baṛa kaam karis hei aur uske naam pawitr hei.

⁵⁰ Jon bhi koi uske weship kare hei, u sab pe hardam aapan daya barsaay hei.

⁵¹ Aur u aapan etna jaada taagat se ulog ke jon apne aap ke baṛa samjhe hei idhar udhar chhitraay dees.

⁵² Aur jon bahut baṛa raaj chalaay hei, u sab ke nichche utaar ke, aur saadhaaran (humble) log ke ulog ke jagha pe beiṭhaay hei.

⁵³ Prabhu bhuuka log ke khaay ke khaatir achchha achchha cheej dees hei. Aur dhani log ke bina kuchh dewe nikaar dees.

⁵⁴ Israayel ke log jon Prabhu ke sewak hei, u sab ke hardam madat kare hei, aur aapan log pe hardam, daya ke najar rakkhe hei.

⁵⁵ I promis Prabhu, hamaar baap-daada Abraham aur uske santaan pe hardam ke waaste karis raha.”

⁵⁶ Elizabeth ke sañghe Meri lagbhag teen mahina tak rahi. Fir u aapan ghare lauṭ gais.

Yuhanna Ke Janam

⁵⁷ Jab Elizabeth ke laṛka peida bhais,

⁵⁸ tab uske paṛosi aur palwaar i baat sun ke ki Prabhu uske sañghe daya karis hei, ulog bahut khusi bhain.

⁵⁹ Jab chhoṭa bachcha aaṭh roj ke bhais, tab ulog laṛka ke khatna karaay laain, aur uske naam uske bappa ke naam pe Zekraaya rakkhe maañgis.

⁶⁰ Lekin uske amma bolis, “Nai, iske naam Yuhanna rakkha jaai.”

⁶¹ Ulog usse bolin, “I keise hoy sake hei, kaahe ki tumhaar palwaar meñ i naam ke koi nai hei.”

⁶² Aur tab uske bappa se ulog ishaara karke puuchhin ki uske laṛka ke kaa naam hoy ke chaahi.

⁶³ Tab Zekraaya ek kaagaj aur pen maañgis aur uspe likhis, “Iske naam Yuhanna hei.” Sab koi ghabraay gain.

⁶⁴ Wahi ṭaaim Zekraaya bole laga aur Parmeshwar ke baṛaai kare laga.

⁶⁵ Agal bagal ke log ḍar gain, aur i niuz Juḍia ke sab pahaaṛ waala des meñ feil gais.

⁶⁶ Jon koi bhi i khabar sunis, ulog i bichaar karke bolin, “I laṛka keisan hoi?” Kaahe ki jaruur Prabhu ke haath is pe hei.

Zekraaya, Prabhu Ke Baṛaai Kare

⁶⁷ Yuhanna ke bappa Zekraaya, Pawitr Aatma se bhara raha, aur u i bole lagis.

⁶⁸ “Hamme Prabhu ke baṛaai kare ke hei, jon Israayel ke log ke Parmeshwar hei! U aapan log ke madat ke khaatir aur ulog ke chhoṛaay aais hei.

⁶⁹ U hamaar waaste ek bahut baṛa bachaay waala ke dees hei, jon uske naukar Ḍeiviḍ ke palwaar ke hei.

⁷⁰ U aapan pawitr nabi ke madat se puraana jamaana meñ, bolis raha

⁷¹ ki u ham sab ke hamaar dusman se bachaai, jon ham se dusmani rakkhe hei.

⁷² Ki u hamaar baap daada pe daya karke aapan pawitr promis ke yaad karaai.

^73-74 Aur u hamaar bappa Abraham se bhi bataais raha, ki u hamaar dusman se hamme chhoṛaay lei aur ham bina ḍar ke uske kaam meñ laga rahega,

⁷⁵ ki jisse ham uske saamne pawitrta aur achchha se, jindagi bhar rahi.”

⁷⁶ “Aur tum, he beṭa, sab se baṛa Parmeshwar ke nabi kahaayga. Tum Prabhu ke rasta taiyaar kare aaya hei aur uske aage aage chalega.

⁷⁷ Aur sab log ke bataayga ki jab ulog ke paap se maafi mili, ulog aapan aapan paap se bache saki.

⁷⁸ Hamaar Parmeshwar to bahut dayaalu aur meharbaan hei. Wahi ke kaaran hamaar uupar sabere ke suuraj ke rakam roshni hoi

⁷⁹ ki añdhiyaar aur maut ke saaya meñ beiṭhe waala log ke roshni de saki, aur hamaar goṛ saanti ke rasta pe seedha chalaai.”

⁸⁰ U laṛka dekhe meñ aur aatma se bahut taagatwaala hote gais. Aur Israayel ke saamne aay waala roj tak ḍezaṭ meñ raha.