Kolosia 3 - Nawa Haup

¹ Tum Krisṭ ke sañghe jinda kara gaya hei. Ab wahi pe dil lagaao jon swarag meñ hei, jahañ Parmeshwar ke raaiṭ saaiḍ pe Yeeshu raaj kare hei.

² Socho ki huañ pe kaa hei, i nai ki hiañ dharti pe kaa hei.

³ Tum mar gaya, iske matlab hei ki tumhaar jeewan Maseeh, jon Parmeshwar ke bagal beiṭhe hei, uske sañghe chhipaan hei.

⁴ Maseeh, tumhaar jeewan ke matlab de hei, aur jab u aai, tum bhi uske sañghe mahima meñ aayga.

⁵ Aapan deñhi ke konṭrol meñ nai raho. Jetna bhi roñg rakam ke seks ke chaahat hei, uske maar deo. Neech ya indecent ya bura khayaal waala nai raho. Laalchi nai bano, u wahi rakam hei jeise muurti puujan.

⁶ Parmeshwar ulog se gussa hei, jon uske baat ke nai maane hei, aur i sab kaam kare hei.

⁷ Aur ṭheek wahi hei jon tum kara hei, jab tum ulog ke saathe rahta raha jon i sab kaam karat raha.

⁸ Lekin ab tum log i sab kaam kare ke band kar deo. Tum gussa hoy ke, haiṭ kare ke aur dushṭ bane ke chhoṛ deo. Ab tum koi ke apmaan waala ya dusra ke baare meñ kaṛa baat nai karna.

⁹ Aur ek dusra se jhuuṭ bole ke band kar deo. Tum aapan puraana laaif aur rahan sahan chhoṛ dia hei.

¹⁰ Ab tum log meñ se ek ek nawa jan hei. Tum jaada se jaada aapan banaay waala ke rakam hoy laga hei, aur tum uske aur achchha se samjhe sakta hei.

¹¹ Koi baat nai hei ki tum ek Greek hei ya Yahuudi, chaahe tumhaar khatna bhais hei ya nai. Saait tum ek baaberian hoyga ya Scythian, aur ya to tum ek gulaam hoyga ya ek ajaad jan. Fir bhi Maseeh hee hei jon kuchh maane rakkhe hei, aur u ham sab ke bhittar rahe hei.

¹² Parmeshwar tum sab se prem kare hei aur aapan khaas chuna hua log maanis hei. Yahi khaatir, naram raho, dayaalu raho, meeṭha bolo, deen bano aur dheeraj rakkho.

¹³ Ek dusra ke sahe leo, aur jon koi bhi tumhaar sañghe bura kaam karis hei, uske maafi de deo, wahi rakam jeise Krisṭ tumme maafi dees hei.

¹⁴ Prem aur sab cheej se jaada khaas hei. Yahi hei jon se sab cheej puura bañdha rahe hei.

¹⁵ Tum meñ se ek ek Krisṭ ke boḍi ke bhaag hei, aur tumme chuna gais raha ki sab koi ek sañghe saanti se raho. Tab wahi saanti ke jon Krisṭ se aay hei, tum log ke soch ke konṭrol karan deo. Aur graiṭful raho.

¹⁶ Maseeh ke vachan ke aapan jeewan meñ puura bhara rahan deo, jabki tum aapan puura buddhi se sab ke paṛhaao aur ek dusra ke chetaaoni deo. Aur aapan dil meñ dhanbaad se Parmeshwar ke waaste bhajan, stuti ke gaana aur Aatmik gaana gaao.

¹⁷ Jon kuchh bhi tum bolta hei ya karta hei, u sab Prabhu Yeeshu ke naam se kare ke hei, jeise tum uske kaaran Parmeshwar Pita ke dhanbaad deta hei.

Maseehi Jeewan Ke Kuchh Ruuls

¹⁸ Ek patni ke chaahi ki u aapan pati ke aage rakkhe. Ek Prabhu ke biswaasi hoy ke naate i uske ḍiuṭi hei.

¹⁹ Ek pati ke aapan patni se pyaar kare ke chaahi aur dukh nai pahuñchaay ke chaahi.

²⁰ Bachcha log ke aapan amma-bappa ke baat hardam maane ke chaahi. Isse Prabhu khusi rahi.

²¹ Amma-Bappa, aapan bachchan pe kaṛaai nai karo. Agar karega to, ulog niraas hoy jaai.

²² E gulaam, tum log hardam aapan dharti ke maalik ke baat maano. Kosis karo ki ulog ke sab ṭaaim khusi rakkho, khali u ṭaaim nai jab tum sochta hei ki ulog tumme dekhe hei. Prabhu ke aadar karo aur aapan maalik ke aapan dil se sewa karo.

²³ Aapan kaam khusi se karo, weisaiyeñ jeise ki tum Prabhu ke sewa karta hei, aur aapan dharti ke maalik ke nai.

²⁴ Asal meñ Prabhu Yeeshu wahi hei jiske tum sachmuch meñ sewa karta hei, aur tum janta hei ki u tumme inaam dei.

²⁵ Lekin Krisṭ ke koi aapan faivraṭ nai hei! Jon bhi koi bura kaam kari, u uske saja dei, jeise ulog ke mile ke chaahi.