Juuḍ 1 - Nawa Haup

¹ Juuḍa, Yeeshu Maseeh ke daas aur Jeims ke bhaiya ke bagal se. U sab ke lage jon chuna gais hei aur jon sab se Parmeshwar Pita prem kare hei aur Yeeshu Maseeh meñ bacha hei.

² Ham preya karta hei ki Parmeshwar tumme bahut se daya, saanti aur prem se aasheesh dei!

Jhuuṭa Guru Log

³ Dosto, ham Parmeshwar ke u sakti jon ham sab ke jeewan meñ kaam kare hei, uske baare meñ tumhaar lage likhe ke kosis karta raha. Lekin uske badle, ham i jaruuri samjha ki likhi ki tum u biswaas, jon Parmeshwar aapan log ke hardam ke waaste de dees raha, uske bachaao.

⁴ Kuchh adharmi log ham log ke beech meñ chuppe se ghus aain aur bole hei, “Parmeshwar hamme otna achchha se dekhe hei jiske hakdaar ham nai hei, aur yahi khaatir neech bane rahe ke ṭheek hei.” Ulog iske bhi nai maane hei ki ham log ke khali Yeeshu Maseeh ke aapan Prabhu aur guru maane ke hei. Lekin bahut din pahile, Baaibal hamme chetaaoni dees raha ki i adharmi log naas hoy jaai.

⁵ I nai bhulna ki ulog ke sañghe kaa bhais raha jon ke Prabhu Ijipt se bachaais raha. Usman se kuchh ke lage biswaas nai raha, aur u baad meñ ulog ke naas kar dees.

⁶ Tum u ainjals log ke bhi baare meñ janta hei, jon aapan sab kaam chhoṛ deen aur aapan rahe waala jagha bhi chhoṛ deen. Parmeshwar ulog ke sab din ke waaste chain se baañdh dees aur ab ulog ke añdhiyaar gaḍḍha meñ nyaay ke roj tak rakkhis hei.

⁷ Ham log ke uske bhi khiaal rakkhe ke chaahi ki Sadom aur Gamora nagar, aur uske agal bagal ke ṭaaun meñ kaa bhais raha. Huañ ke log neech ban gain aur sab neech rakam ke paap karin. Tab Parmeshwar ulog ke ek ekzaampal banaais aur kabhi nai bute waala aagi meñ saja dees.

⁸ Jon log ke ham baat karta hei, ulog weise kare hei jeise u sapna dekhe waala log jon aapan deñhi ke naas kar leen hei. Ulog sab kaanuun ke ṭhukraay de hei aur ainjals ke insalṭ kare hei.

⁹ Cheef ainjal, Maaykal bhi, saitaan ke insalṭ nai karis, jab u duuno Maozas ke boḍi ke baare meñ baad bibaad karat rahin. Maaykal khali etna bolis, “Prabhu tumme saja dei!”

¹⁰ Lekin, u sab sakti jon ke ilog kuchh nai jaane hei, u sab ke ulog insalṭ kare hei. U sab jañgli jaanwar ke rakam hei, jon naas hoy jaay hei, kaahe ke ulog khali aapan feelings pe jiye hei.

¹¹ Ab ulog asli trabal meñ hei. Ulog Kein ke dekhaawal kharaab rasta pe chalin, aur laalach meñ paṛ ke bina soche samjhe Balaam ke rakam aapan faayda ke khaatir bhuul kar beiṭhin aur Korah ke rakam Parmeshwar ke agaiñsṭ jaay ke naas hoy gain.

¹² I log ganda dimaag waala log hei, aur aapan saramnaak aur selfish kaam se u khaana jon tum sab sañghe khaata hei, uske naas kar de hei. Ulog u baadar ke rakam hei jon hawa ke dabaao se uṛ jaay hei, lekin kabhi paani nai barsaay hei. Ulog u peṛ ke rakam hei jon meñ koi patti nai hei, ukhṛaan aur sukhaan hei, aur usman kabhi bhi fal nai lagi.

¹³ Ulog ke saram waala kaam, waailḍ samundar ke waivs ke fena ke rakam dekhaay hei. Ulog sada ke bhaṭakte taara ke rakam rahi jon narak ke sab se añdhera gaḍḍha meñ heraay jaay hei.

¹⁴ Eiḍam ke baad Inok u satwa admi raha, aur u i log ke baare meñ baat karat raha, jab u bolis, Dekho! Prabhu hajaar hajaar pawitr ainjal log ke leke aawe hei

¹⁵ sab log ke nyaay kare ke waaste. U sab ke saja dei jon adharmi log hei aur kharaab kaam karin hei. Prabhu sachche ke u bura log ke ulog ke kharaab kaam aur jon kharaab baat uske bolin hei, uske waaste saja dei.

¹⁶ I log kuṛkuṛaay hei aur komplain kare hei aur aapan ganda ichchha se rahe hei. Ulog aapan baṛaai kare hei aur dusra ke taule hei ki ulog ke u sab mil jaay jon u maañge hei.

Aur Chetaaoni

¹⁷ Hamaar dost log, u chetaaoni ke yaad rakhna, jon tumme hamaar Prabhu Yeeshu Krisṭ ke prerit log deen raha.

¹⁸ Ulog tumme bataais raha ki aakhri ṭaaim pe, selfish aur adharmi log Parmeshwar ke majaak uṛaai.

¹⁹ Aur ab ilog tum log ke ek dusra ke khilaaf bhaṛhkaay hei. I log khali yahi jindagi ke baare meñ soche hei, aur i log ke lage Parmeshwar ke Aatma nai hei.

²⁰ Pyaare dost log, aapan pawitr biswaas ke faaunḍeishan banaate raho, jeise Pawitr Aatma tumme madat kare hei ki tum preya karo.

²¹ Aur Parmeshwar ke prem se juṛa raho, jeise tum agorta hei ki hamaar Prabhu Yeeshu Maseeh, tumme anant jeewan deke dekhaay hei ki u ketna dayaalu hei.

²² Jon ke ḍaauṭ hei, ulog ke madat karo.

²³ Jon ke bachaay ke hei, ulog ke bachaao, jeise tum koi ke aagi meñ se bachaata hei. Tab aapan dil meñ ḍar leke, u sab pe daya karo jon ke jaruuri hei. Lekin ulog ke kapṛa se bhi haiṭ karo, jon aapan bura kaam se meila hoy gain hei.

Aakhri Preya

²⁴ Aapan muktidaata Parmeshwar ke, hamaar Prabhu Yeeshu Maseeh ke kaaran baṛaai karo! Khali Parmeshwar tumme gire se bachaai aur tumme safa rakkhi aur aapan mahaan maujuudgi (presence)

²⁵ meñ aanandit rakkhi. Ṭaaim ke suru hoy se pahile aur abhi, aur hamesha hamesha, Parmeshwar mahima, aadar sammaan, sakti aur adhikaar ke hakdaar hei. Aameen.