Jeims 2 - Nawa Haup

Faiva Kare Ke Chetaaoni

¹ Dosto, agar tumme ham log ke mahaan Prabhu Yeeshu Maseeh meñ biswaas hei, tab tum koi log ke baṛa aur koi ke chhoṭa nai samjhega.

² Maan lo ek dhani admi mahañga kapṛa pahin ke aur sona ke chhalla pahin ke tum log ke ek sabha meñ aay. Aur maan lo ek gareeb admi bhi faṭa puraana kapṛa pahin ke aay.

³ Tumme nai chaahi ki tum sab se achchha jagha u mahañga kapṛa pahine waala admi ke deo aur jon gareeb hei usse bolo ki bagal meñ khaṛa hoy jaao ya nichche beiṭho.

⁴ Eise kare se wahi rakam hoy jaai jeise bola jaay hei ki koi koi admi dusra se achchha hei, aur tab tum ek beimaan jaj ke rakam kaam karega.

⁵ Pyaara dost log, dhyaan deo. Parmeshwar i dunia ke gareeb log ke bahut biswaas dees hei. U ulog se aapan raaj ke hissa ke promis karis hei, ki u sab log ke dei jon usse prem kare hei.

⁶ Tum gareeb ke sataata hei. Lekin kaa dhani log tumhaar uppar hukum nai kare hei aur tumme koṭ tak ghaseeṭ ke nai le jaay hei?

⁷ Kaa wahi log nai hei jon tumhaar Prabhu ke hasi uṛhaay hei?

⁸ Agar tum Baaibal ke sab se khaas kaanuun ke maanega, to achchha karega. U kaanuun i hei jon hamme hukum de hei ki ham aapan paṛosi se aapan rakam prem kari.

⁹ Lekin agar tum koi ke dusra se achchha se dekhega, tab tum achchha kaam nai kara, aur Baaibal sikhaay hei ki tum paap kara hei.

¹⁰ Agar tum ek ke chhoṛ ke sab kaanuun ke maanega, to i wahi rakam hei ki tum sab kaanuun ke tuuṛta hei.

¹¹ Wahi Parmeshwar jon hamme bataais raha ki khali ekke saadi karna, i bhi bataais raha ki hatya nai karna. To agar tum ekke saadi kara, aur fir jaay ke koi ke hatya kar dia, to tum Parmeshwar ke kaanuun ke tuuṛa hei.

¹² Tum ulog ke rakam baat karo aur kaam karo, jon ke u kaanuun jaj kari, jon hamme free kar dei.

¹³ Yahi karo, kaahe ke nyaay ke roj, ulog pe koi daya nai dekhaawa jaai jon dusra pe daya nai dekhaais. Lekin nyaay ke roj bhi Parmeshwar daya dekhaay hei!

Biswaas Aur Kaam

¹⁴ Hamaar dost log, agar koi bole ki ham biswaas karta hei, lekin achchha kaam nai kare, to isse koi faayda nai. Kaa i rakam ke biswaas tumme bachaay sake hei?

¹⁵ Agar tum koi ke janta hei jiske lage khaana aur kapṛa nai hei,

¹⁶ tab tumme i nai kahe ke hei, “Aasha hei ki sab ṭheek hoy jaai. Ham aasha karta hei ki tumme khuub khaay ke mile aur garmi mile.” Agar tum uske kuchh madat nai kara to i bole se kaa faayda?

¹⁷ U biswaas jon ham se achchha kaam nai karwaay sake hei, u akela aur mara hei!

¹⁸ Maan lo koi tum se agri nai hoy hei aur bole hei, “Tum biswaas karte raho, ham achchha kaam karte rahi.” Ham jawaab dega, “Tum hamme aapan biswaas bina achchha kaam kare dekhaao, aur ham tumme aapan biswaas aapan achchha kaam kar ke dekhaayga.”

¹⁹ Tum to biswaas karta hei ki khali ekke Parmeshwar hei. U ṭheek hei. Hiañ tak ki i saitaan bhi biswaas kare hei, aur u i soch ke ḍar ke maare kaape lage hei.

²⁰ Kaa koi beokuuf admi pruf maañge hei ki bina kaam ke biswaas bekaar hei?

²¹ Ham log ke baap daada Abraham, aapan laṛka Aayzak ke bali ke bedi pe chaṛhaay ke Parmeshwar ke khusi karis raha.

²² Ab tum dekho ki keise Abraham ke biswaas aur kaam ek sañghe kaam karis. U pruuv karis ki kuchh kar ke hee uske biswaas sachcha hei.

²³ Yahi hei jon Baaibal bol ke samjhaay hei, “Abraham ke biswaas Parmeshwar pe raha, aur Parmeshwar usse khusi raha.” Yahi kaaran Abraham, Parmeshwar ke dost bana.

²⁴ Ab tum dekhe sakta hei ki khali biswaas kare se nai, lekin kuchh karke ham log Parmeshwar ke khusi kare sakta.

²⁵ Udaaharan ke ruup meñ, Raahaab ek veshya rahi. Lekin u Parmeshwar ke khusi karis jab u duut log ke ek rasta se ghar meñ welkam kar ke dusra rasta se bhej dees.

²⁶ Jon koi saas nai le hei, u mara hei, aur u biswaas jon kuchh nai kare hei, u bhi mara hei!