Heebru 6 - Nawa Haup

¹ Tab aage baṛho, machua ṭeeching ke bagal aur aapan pichchhe u pahila lesan chhoṛ deo jon Maseeh ke sandes raha. Ham log ke jaruurat hei ki hame baat kare ke hei ki kaahe ke ham log ke u sab se duur jaay ke hei jon hame maut ke bagal le jaay hei aur kaahe ke ham log ke Parmeshwar meñ biswaas kare ke hei.

² Aur hamme baptisma aur muuṛ pe haath rakkhe ke aur fir se jee uṭhe ke aur anant nyaay ke baare meñ sikhaay ke jaruuri nai hei.

³ Agar Parmeshwar chaahi, to aage baṛho.

^4-6 Lekin ulog ke kaa hoi jon roshni dekh ke aur swarag se daan paay ke aur Pawitr Aatma paay ke ghuum gain hei? Ulog ke kaa hoi jon susamaachaar paay ke aur bhawish ke sakti leke, ghuum gain hei? Koi rasta nai hei ki ulog ke lauṭaawa jaay sake. Ulog jon cheej kare hei u sab wahi rakam hei jeise Parmeshwar ke Putr ke kros pe chaṛhaay ke uske khule aam apmaan kara gay hei!

⁷ Ek khet kisaan ke waaste ṭheek hei, agar achchha paani mile to achchha anaaj hoi. Asal meñ Parmeshwar u khet ke aasheesh dei.

⁸ Lekin jon jameen khali kaaṭa ugaay hei, uske kuchh veliu nai hei. Saait u Parmeshwar ke saraap ke nichche aay jaai, aur aakhri meñ usman aagi lagaawa jaai.

⁹ Dosto, ham log i rakam baat karta hei. Lekin ham log shua hei ki tum log u sab achchha kaam karta hei, jon log bache ke ṭaaim kare hei.

¹⁰ Parmeshwar hardam nyaay kare hei. U yaad kari keise tum uske log ke madat karte aaya hei aur abhi bhi karta hei. Tum log Parmeshwar ke hei, aur u nai bhulaai ki keise tum log aapan prem uske log ke dekhaaya hei.

¹¹ Ham log ke ichchha hei ki tum sab log hardam i dekhaay maañgega ki tum log ke biswaas ketna majbuut aur ṭika hei.

¹² Tab tum kabhi laizi nai hoyga. Tum log ulog ke ekzaampal pe chalega jon ke biswaas majbuut hei aur jon ke lage tab tak dheeraj rahi jab tak Parmeshwar aapan waada nai nibhaai.

Parmeshwar Aapan Waada Rakkhis

¹³ Koi bhi Parmeshwar se mahaan nai hei. To u aapan naam se waada karis jab u Abraham se bolis,

¹⁴ “Ham, tumhaar Prabhu, tumme aasheesh dega ki tumhaar bahut se ḍisenḍañṭ hoi.”

¹⁵ Tab jab ki Abraham bahut dheeraj rakkhis, tab Parmeshwar uske u sab dees jon ke u waada karis raha.

¹⁶ Jab koi ek baad bibaad ke khalaas kare maañge hei, tab ulog koi ke naam ya koi aapan se baṛa, ya apne se kuchh baṛa ke kasam khaay hei.

¹⁷ To jab Parmeshwar koi waada ke jon u aapan log se karis hei, uske pruuv kare maañge hei aur jon ke tuuṛa nai jaay sake hei, to u kasam khaais raha.

¹⁸ Parmeshwar jhuuṭ nai bole sake hei! Aur uske waada aur kasam dui cheej hei jon ke kabhi bhi badla nai jaay sake hei. Ham log bachaao ke waaste Parmeshwar ke lage dauṛa. Ab uske waada, ham log ke hausla dei ki ham u aasha ke pakṛe rahi jon ham log ke ṭheek saamne hei.

¹⁹ Yahi aasha ham log ke praan ke khaatir lañgar (enka) ke rakam hei. Yahi aasha saif aur shua hei jon swarag ke Mandir ke parda se hoy ke bheetar pawitr jagha tak pahuñche hei.

²⁰ Yeeshu ham log se pahile huañ chala gais hei, aur u Malikisidak ke rakam hardam ham log ke baṛa paadri rahi.