Heebru 11 - Nawa Haup

Parmeshwar Ke Log Ke Puura Biswaas

¹ Biswaas hamme shua kare hei ki ham kon cheej ke aasha karta hei aur jon ham log nai dekhe sakta hei, uske pruf dewe hei.

² Ulog ke biswaas hee raha jon Parmeshwar ke saamne ham log ke baap-daada log ke sammaan dees.

³ Ham log ke biswaas ke khaatir, ham log janta hei ki Parmeshwar ke hukum se dunia banis. Ham log i bhi janta hei ki jon sab dekhaay hei, u sab nai dekhaay waala cheej se bana hei.

⁴ Kaahe ke Aibal ke lage biswaas raha, uske balidaan Parmeshwar ke khaatir, Kain se achchha raha. Parmeshwar usse aur uske bheñṭ se khusi raha, aur jab ki Aibal abhi nai hei, uske biswaas ab bhi uske gawaahi dewe hei.

⁵ Enok ke lage biswaas raha aur u nai maris. U Parmeshwar ke khusi karis raha, aur Parmeshwar uske swarag leke gais. Yahi kaaran uske boḍi nai mila raha.

⁶ Lekin bina biswaas ke koi bhi Parmeshwar ke khusi nai kare sake hei. Ham log ke jaane ke hei ki Parmeshwar sachche ke hei aur jon koi bhi uske khoje hei, u ulog ke inaam dewe hei.

⁷ Noa ke biswaas raha, yahi kaaran jon cheej abhi tak bhais nai raha, u sab ke uske chetaaoni mil gais raha. U baat maanis aur aapan palwaar ke waaste ek bauṭ banaay ke ulog ke bachaais. Yahi rakam dunia ke log ke nyaay kara gais raha, aur Noa ke aasheesh mila jon u sab ke mili jon Parmeshwar ke khusi rakkhi.

⁸ Abraham ke lage biswaas raha aur u Parmeshwar ke baat maanat raha. Uske bola gay raha ki ek jagha pe jaay jon Parmeshwar bolis raha ki uske hoy jaai, aur eisan des meñ chala gais jon ke u kabhi nai dekhis raha.

⁹ Biswaas se hee Abraham, ek anjaan ke rakam promised lenḍ meñ raha. Huañ pe u ek tambu meñ rahat raha, uske sañghe Aayzak aur Jaykab bhi rahin, jon ke baad meñ wahi waada kara gay raha.

¹⁰ Abraham eise karis kaahe ke, u anant nagar jon ke Parmeshwar plen kar ke banaais raha, uske waiṭ karat raha.

¹¹ Jab ki Sarah bahut buṛhia hoy gais raha ki uske bachcha nai hoi, fir bhi uske biswaas Parmeshwar meñ raha ki u wahi kari jon ke u waada karis raha, aur uske ek beṭa bhais.

¹² Uske pati Abraham ekdam mare waala raha, lekin u bahut log ke baap-daada banis. Sach puuchho, to jetna asmaan meñ taara hei aur samundar ke kinaare baalu hei, usse bhi jaada log hiañ hei.

¹³ Usman se sab log mar gais. Lekin fir bhi ulog ke lage biswaas raha, jab ki ulog ke u nai mila jon ulog se waada kara gais raha. Ulog khali duur se u sab cheej ke dekh ke khusi raha, aur ulog maan leen i dharti pe ulog khali pardesi aur anjaan log hei.

¹⁴ Jab log i rakam ke baat kare hei, tab i baat safa rahe hei ki ulog koi jagha khoje hei jiske aapan bole sake.

¹⁵ Agar ulog u jameen jahañ ulog ek dafe rahat rahin, uske baare meñ baat kare hei, tab ulog huañ koi bhi ṭaaim lauṭ jaay sakat rahin.

¹⁶ Lekin ulog swarag meñ aur achchha jagha jaay maañgat rahin. Yahi kaaran Parmeshwar ke saram nai lagat raha jab ulog uske aapan Parmeshwar bolaat rahin. U ek nagar bhi ulog ke waaste banaais.

^17-18 Abraham se waada kara gay raha ki uske eklauta laṛka Aayzak uske palwaar ke naam aage baṛhaai. Lekin jab Abraham ke ṭesṭ kara gay, tab u aapan biswaas ke kaaran aapan laṛka ke bhi bali chaṛhaay jaawat raha,

¹⁹ kaahe ke u jaanat raha ki Parmeshwar fir se log ke jinda kare sake hei.

²⁰ Aayzak ke biswaas raha, aur u Jaykab aur Esau ke aasheesh ke waada dees raha.

²¹ Baad meñ, jab Jaykab mare waala raha, u aapan chale waala ḍanḍa pe jhuk ke weship karis. Tab uske biswaas ke kaaran u Josaf ke ek ek laṛka ke aasheesh dees.

²² Josaf ke mare se pahile, uske biswaas raha ki Parmeshwar Israayel ke log ke Ijipt se bahire nikaar ke le jaai. To u ulog se bolis ki uske haḍḍi ke sañghe leke jaana.

²³ Jeise ki Maozas ke amma bappa ke biswaas raha, ulog uske teen mahina tak lukaay ke rakkhe rahin. Ulog dekhin ki u ek sundar bachcha hei, aur ulog ke Raaja ke aagya nai maane meñ ḍar nai laga.

²⁴ Tab, jab Maozas baṛa hoy gais, uske biswaas uske Fero ke naati bolaay ke inkaar kar dees.

²⁵ U Parmeshwar ke log ke sañghe dukh uṭhaay ke chunis, naa ki jon paap thoṛa din ke waaste achchha ṭaaim laai.

²⁶ Maozas jaanat raha ki Ijipt ke khajaana otna sundar nai hei jetna ki u Maseeha ke waaste dukh uṭhaai.

²⁷ Aapan biswaas ke kaaran Maozas Ijipt chhoṛ dees. Maozas, jon nai dekhaay hei ki u Parmeshwar ke dekhis raha aur Raaja ke gussa se nai ḍaris.

²⁸ Uske biswaas uske fasah ke teohaar manaay ke dees. U jaanwar ke khuun duaari pe chhiṛkis, ki jisse Israayel ke log ke pahila janma laṛkan, naas kare waala ainjals se maara nai jaay.

²⁹ Ulog ke biswaas ke kaaran, log Laal Samundar paar ker leen. Lekin jab Ijipt ke log paar kare lagin to paani meñ ḍuub gain.

³⁰ Parmeshwar ke log ke lage biswaas raha, aur jab ulog saat din tak Jeriko ke shahar meñ chaaro taraf ghuumat rahin, huañ ke diwaar gir paṛa.

³¹ Raahaab ek veshya rahi, lekin uske lage biswaas raha aur u spy log ke welkam karis. Yahi kaaran u sab log ke sañghe jon aagya nai maanin raha, nai maris.

³² Aur ham kaa bole sakta hei? Ṭaaim nai hei ham Gideon, Barak, Samson, Jefthah, Ḍeiviḍ, Samuel, aur baaki nabi log ke baare meñ bataai.

³³ Ulog ke biswaas ulog ke sab raaj pe kapja kare meñ madat karis, aur ulog raaiṭ kaam karis raha, yahi khaatir Parmeshwar ulog se waada karis raha. Ulog sher ke muh band kar deen

³⁴ aur dhadhakte (raging) aagi ke butaain aur aapan dusman ke talwaar se bach gain. Jab ki ulog kamjor rahin, fir bhi ulog ke taagat aur sakti mila ki ulog dusra jagha ke aami ke bhagaay dewe.

³⁵ Kuchh aurat log aapan pyaara log ke maut se lauṭaay ke paay leen. Isman se ketna log ke sataawa gais raha, lekin ulog chhoṛaay ke waaste, nai kar deen. Ulog ke pata raha ki ulog ke aur achchha inaam mili jab ulog ke jinda kara jaai.

³⁶ Baaki log ke hasi uṛaawa gay aur chaabuk se maara gay, aur jel meñ chain se baañdha gais.

³⁷ Fir bhi baaki log ke patthar se maara gais ya aari se dui bhaag meñ kaaṭa gais, ya talwaar se maara gais. Kuchh ke lage to bheṛa ke chamṛa ya bakri ke chamṛa pahine ke alaawa aur kuchh nai raha. Ulog gareeb rahin, aur sataawa gais aur bahut dukh dewa gais.

³⁸ Dunia i achchha log ke laayk nai raha, jon ḍezaṭ meñ bhaṭkat rahin aur pahaaṛ pe kaiv aur jameen meñ gaḍḍha meñ rahat rahin.

³⁹ Ulog sab aapan biswaas ke kaaran Parmeshwar ke khusi karin! Lekin ulog fir bhi bina u sab paay jon ulog se waada kara gais raha, mar gain.

⁴⁰ I sab i kaaran bhais ki Parmeshwar ham log ke waaste kuchh aur achchha cheej rakkhis raha. Aur u nai maañgat raha ki ulog aapan biswaas ke gaul hamlog ke bina pahuñche.