Heebru 1 - Nawa Haup

¹ Bahut din pahile aur bahut dafe Parmeshwar ke nabi log uske sandes ham log ke baap-daada ke deen raha.

² Lekin ab aakhri meñ, Parmeshwar aapan Putr ke bhejis ki u ham log ke sandes dewe. Parmeshwar, aapan Putr ke jariye sansaar ke banaais hei, aur ek roj sab cheej Putr ke hoy jaai.

³ Parmeshwar ke Putr ke lage chamkewaala Parmeshwar ke aapan mahima hei aur sab rakam se wahi ke rakam lage hei. Aapan taagatwar vachan se u puura dunia ke roke hei. Ham log ke paap dhowe ke baad, Putr, mahaan Parmeshwar ke raaiṭ saaiḍ meñ beiṭh gais hei.

⁴ U ainjals se bahut baṛa ban gais raha, aur uske jon naam dewa gais raha, ulog sab se kahiñ jaada mahaan hei.

Parmeshwar Ke Putr, Ainjals Se Bhi Baṛa Hei

⁵ Parmeshwar koi bhi ainjals se kabhi nai bolis, “Tum hamaar laṛka hei, kaahe ke aaj ham tumhaar Pita bana hei!” I bhi u log se nai bolis, “Ham uske Pita banega, aur u hamaar laṛka bani!”

⁶ Jab Parmeshwar aapan pahila santaan ke jagat meñ laai, tab u sab ainjals ke hukum dewe hei ki uske weship kare.

⁷ Aur jab Parmeshwar ainjals ke baare meñ baat kare hei, u bole hei, “Ham aapan ainjals ke hawa meñ badal deta hei aur aapan naukar ke barte aagi meñ.”

⁸ Lekin Parmeshwar aapan Putr ke baare meñ bole hei, “Tum Parmeshwar hei, aur tum ek raaja ban ke hardam raaj karega! Tumhaar raajsi (royal) sakti nyaay laai.

⁹ Tum nyaay laaik karta hei aur dushṭta ke haiṭ kara hei, aur ham, tumhaar Parmeshwar. tumme chuna hei. Ham tumme appoinṭ kara hei aur tumme tumhaar frenḍs log se jaada khusi kara hei.”

¹⁰ Baaibal i bhi bole hei, “Suru meñ, Prabhu, tum hee raha jon dharti ke faaunḍeishan rakkhis raha aur asmaan banaais raha.

¹¹ U sab heraay jaai aur kapṛa ke rakam puraana hoy jaai, lekin tum hardam rahega.

¹² Tum ulog ke raub ke rakam lapeṭ dega aur kapṛa ke rakam badal dega. Lekin tum hardam ekke rakam rahega, aur tum hardam rahega.”

¹³ Parmeshwar kabhi bhi aapan ainjals se i nai bolis, “Hamaar raaiṭ saaiḍ beiṭho jab tak ham tumhaar dusman ke tumhaar goṛ ke peeṛha (stuul) nai banaay dei!”

¹⁴ Ainjals to khali Aatma hei jon ke ulog ke sewa kare ke waaste bheja gay hei jon ke bache ke hei.