Galeshia 5 - Nawa Haup

Maseeh Ajaadi De Hei

¹ Maseeh ham log ke ajaad karis hei! Iske matlab ham log ekdam ajaad hei. Aapan ajaadi ke kas ke pakṛe raho aur kabhi bhi kaanuun ke gulaam nai banna.

² Ham, Pol tum se waada karta hei ki agar tum khatna karaayga, to Maseeh tumme kuchh achchha nai kari.

³ Agar tum karta hei to, tumme puura kaanuun ke maane ke paṛi.

⁴ Aur agar tum kaanuun ke maan ke Parmeshwar ke khusi kare mañgta hei, tab tum apne aap ke Krisṭ ke mahaan daya se kaaṭ ke alag kar lia hei.

⁵ Lekin, Aatma i baat ke shua kare hei ki Parmeshwar ham log ke apnaai kaahe ke ham log Maseeh meñ biswaas karta hei.

⁶ Agar tum Yeeshu Maseeh ke pichchhe chale waala hei, isman kuchh farak nai hei ki tumme khatna bhais hei ki nai. I jaruuri hei ki tumhaar biswaas tumme dusra se prem karwaay hei.

⁷ Tum etna achchha kaam karat raha jab tak tumme koi sachcha rasta se bahkaais nai.

⁸ Aur u admi u nai raha jon ke tumme chune waala bhejis raha.

⁹ Thoṛa se yeesṭ puura aaṭa ke badal de sake hei,

¹⁰ lekin tum Prabhu ke hei. Yahi kaaran ham janta hei ki tum wahi karega jon ham bolega, aur nai ki jon koi aur kare ke boli. Jon koi bhi tumhaar waaste problam khaṛa kare hei, uske saja mili.

¹¹ Dosto, agar ham abhi bhi parchaar kari ki log ke khatna karaay ke hei, to kaa kare ke ham etna museebat meñ hei? Kros ke sandes ab kuchh problam nai rahi, agar ham, log ke bolega ki ulog khatna karaay.

¹² I achchha hota ki jon tumme problam de hei, u khali khatna nai karaai lekin aur jaada kaṭaay lei!

¹³ Dosto, tumme ajaad rahe ke waaste chuna gais raha. Yahi khaatir aapan ajaadi ke bahaana banaay ke u sab nai karo jon kuchh bhi tum mañgta hei. Uske u mauka pe iyuz karo ki tum prem se ek dusra ke sewa kare sako.

¹⁴ Jon sab kaanuun bataay hei uske ham log chhoṭa kar ke u aagya meñ bole sakta hei ki ek dusra ke aapan rakam prem karo.

¹⁵ Lekin agar tum ek dusra pe jaanwar ke rakam hamla karte rahega, tab tum dekhna kahiñ apne aap ke naas nai kar leo.

Parmeshwar Ke Aatma Aur Hamaar Ichchha

¹⁶ Agar tum Aatma ke anusaar chalta hei, to shaareerik ichchha ke nai maanega.

¹⁷ Aatma aur tumhaar ichchha ek dusra ke dusman hei. Ulog hardam ek dusra se jhagaṛte rahe hei aur tumme u sab kare se roke jon tum sochta hei tumme kare ke hei.

¹⁸ Lekin agar tum Aatma ke maanega, tab Maozas ke kaanuun ke tumhaar uppar koi konṭrol nai hei.

¹⁹ Log ke ichchha ulog ke neech harkat, bura khayaal, aur saramwaala kaam karaay hei.

²⁰ Ulog muurti ke puuja kare hei, jaadu kare hei, dusra se jaran kare hei aur ulog ke sañghe rahe ke kaṛa paṛe hei. Log jaran aur gussa kare lage hei aur selfish hoy jaay hei. Ulog khali jhagṛa aur trabal nai kos kare hei, lekin ulog

²¹ jarantua rahe hei. Ulog nasa meñ hoy jaay hei, paaṭi meñ hullaṛ machaay hei, aur kaafi kharaab kaam bhi kare hei. Ham tumme pahile bhi bataaya raha, aur abhi bhi bataata hei. I log meñ se koi bhi Parmeshwar ke raaj ke bhaagidaar nai rahi.

²² Parmeshwar ke Aatma hamme pyaara, aanandit, saanti waala, dheeraj waala dayaalu, achchha, bhalaai kare waala, aur

²³ naram banaay hei aur apne aap ke konṭrol meñ rakkhe hei. Hiañ pe koi kaanuun nai hei jon i rakam ke kaam kare ke roke sake hei.

²⁴ Aur jab ki ham Krisṭ ke hei, ham log aapan ichchha aur feelings ke maar dia hei.

²⁵ Parmeshwar ke Aatma ham log ke jeewan dees hei, aur ham log ke Aatma ke pichchhe chale ke hei.

²⁶ Lekin ghamanḍi nai bano aur nai bolo ki dusra log ulog se achchha hei, jaran peida nai karo.