Galeshia 3 - Nawa Haup

Biswaas Hee Ek Rasta Hei

¹ Tum beokuuf Galeshia ke log! Ham tumme puura bataaya ki keise Yeeshu Maseeh ke kros pe chaṛhaawa gais raha. Kaa ab koi tum pe jaadu kar dees hei?

² Ham mañgta hei ki tum ek cheej jaano. Tumme keise Parmeshwar ke Aatma dewa gais raha? Kaa Maozas ke kaanuun maane se ya Maseeh ke baare meñ sune se aur uspe biswaas rakkhe se?

³ Keise tum etna beokuuf hei? Kaa tum sochta hei ki tum apne se u kaam khalaas kare sakta hei jon Parmeshwar ke Aatma tum meñ suru karis raha?

⁴ Kaa tum i sab jhuṭṭe ke saha? Kaa i sab khaali jaai?

⁵ Parmeshwar tumme aapan Aatma de hei aur tum meñ chamatkaar ke kaam kare hei. Kaa u i khaatir kare hei ki tum Maozas ke kaanuun maanta hei ya kaahe ke tum Maseeh ke baare meñ suna aur uspe biswaas kara?

⁶ Baaibal bole hei ki Parmeshwar, Abraham ke apnaais kaahe ke Abraham biswaas karat raha.

⁷ Aur haañ, tumme samjhe ke hei jon koi meñ biswaas hei, u Abraham ke laṛkan hei. (Parmeshwar Abraham ke chunis, aur i samjha jaay hei ki jon koi bhi Abraham ke laṛkan hei, u Parmeshwar ke bhi laṛkan hei.)

⁸ Bahut din pahile Baaibal bolis raha ki Parmeshwar, geir Yahuudi log ke biswaas ke kaaran apnaai. Yahi kaaran Parmeshwar, Abraham ke susamaachaar bataais, ki sab des ke uske kaaran aasheesh mili.

⁹ Iske matlab i hei ki jon koi ke biswaas hei, ulog u aasheesh meñ hissa lei, jon Abraham ke uske biswaas ke kaaran dewa gay raha.

¹⁰ Jon koi bhi kaanuun maan ke Parmeshwar ke khusi kare maañge hei, u saraap ke nichche daba rahi. Baaibal bole hei, “Jon koi u sab nai maane hei jon kaanuun ke buk meñ hei, uske saraap lagi.”

¹¹ Koi bhi kaanuun maan ke Parmeshwar ke khusi nai kare sake hei. Baaibal i bhi bole hei, “Wahi log jinda rahi jon ke Parmeshwar ulog ke biswaas ke kaaran apnaay hei.”

¹² Kaanuun, biswaas pe nai ṭika hei. U khali wahi log ke jeewan ke waada kare hei, jon uske aagya maane hei.

¹³ Lekin Maseeh hamme kaanuun ke saraap se bachaais raha, jab u apne ham log ke jagha saraap ban gais. Kaahe ke Baaibal bole hei ki jon koi peṛ pe ṭaañga jaay hei, uske saraap hei.

¹⁴ Aur jon cheej Maseeh karis hei, uske kaaran jon aasheesh Abraham ke dewa gais raha, u geir Yahuudi log ke lage gais. I bhais ki biswaas se ham log ke jon waada kara gais raha, u Pawitr Aatma mili.

Kaanuun Aur Waada

¹⁵ Dosto, ham hardam hoy waala ek ekzaampal iyuz karega, ki jisse ham achchha se samjhaay saki. Ek dafe jab koi agrimenṭ banaay le hei, to koi bhi uske badle ya rad (cancel) nai kare sake hei.

¹⁶ Yahi rakam u waada hei jon Abraham aur uske ḍisenḍañṭ se Parmeshwar karis raha. I waada, sab ḍisenḍañṭ se nai kara gais raha, khali ek ke, aur u Maseeh hei.

¹⁷ Ham bolta hei ki kaanuun, Parmeshwar ke waada ke badle nai sake hei, jon chaar sao tees (430) saal kaanuun ke de se pahile bana raha.

¹⁸ Agar ham log Parmeshwar ke aasheesh paay ke waaste kaanuun ke maani, to u aasheesh ham log ke lage Parmeshwar ke waada ke kaaran nai aai. Lekin Parmeshwar, Abraham pe daya karis aur usse waada karis raha.

¹⁹ Kaanuun se kaa faayda? U baad meñ dewa gais raha ki ham dekhe saki ki ham paap karta hei. Lekin uske khali tab tak chale ke raha, jab tak u ḍisenḍañṭs nai aay jaay jon ke waada kara gais raha. Asal meñ ainjals Maozas ke kaanuun dees, aur u admi log ke dees.

²⁰ Khali ek Parmeshwar hei, aur kaanuun uske lage se seedha nai aais.

Gulaam Aur Bachcha Log

²¹ Kaa kaanuun Parmeshwar ke waada se agri nai hoy hei? Nai, kabhi nai! Agar koi kaanuun ham log ke jeewan de sake hei, kaanuun ke maane se Parmeshwar ham log ke apnaay lei.

²² Lekin Baaibal bole hei ki paap sab ke konṭrol kare hei, ki jisse Parmeshwar ke waada u sab ke waaste hei jon Yeeshu Maseeh meñ biswaas rakkhe hei.

²³ Kaanuun ham log ke konṭrol karis aur aapan sakti ke nichche u ṭaaim tak rakkhis jab tak ham meñ biswaas nai hoy jaai.

²⁴ Asal meñ, kaanuun ham log ke ṭeecha raha. Uske to ham log ke tab tak sikhaay ke raha, jab tak hamme biswaas nai hoy jaay aur hamme Parmeshwar apnaay nai le.

²⁵ Lekin jab ek admi meñ biswaas aay jaay hei, tab kaanuun ke ek guru ke rakam hamme nai rakkhe ke hei.

²⁶ Tum sab Yeeshu Maseeh meñ biswaas ke kaaran Parmeshwar ke laṛkan hei.

²⁷ Aur jab tum baptisma lia, tab i rakam bhais ki tum Maseeh ke nawa kapṛa ke rakam pahin lia.

²⁸ Yeeshu Maseeh meñ biswaas hee hei jon tum log ke ek dusra se ek baraabar banaay hei, chaahe tum Yahuudi hei ya Greek, ek gulaam hei ya ajaad admi, ek aurat hei ya admi.

²⁹ To agar tum Maseeh ke hei, to ab tum Abraham ke palwaar ban gaya hei, aur tumme wahi mili jon Parmeshwar waada karis raha.