Galeshia 1 - Nawa Haup

^1-2 Prerit Pol aur hamaar sañghe Prabhu ke sab log ke bagal se. Ham Yeeshu Maseeh aur Parmeshwar Pita, jon uske jinda karis raha, u duuno ke bagal se chuna gay raha ki ham ek prerit bani. Koi eise weise admi hamme i kaam ke waaste nai chunis. Galeshia ke sab chech ke khaatir,

³ Ham preya karta hei ki Parmeshwar Pita aur Prabhu Yeeshu Maseeh tum pe daya kari aur tumme saanti se aasheesh dei!

⁴ Maseeh ham log ke Pita Parmeshwar ke baat maanis aur apne aap ke ham log ke paap ke waaste balidaan karis ki jisse hamme i dushṭ dunia se bachaay sake.

⁵ Parmeshwar ke mahima hardam rahe. Aameen.

Ekke Sachcha Sandes

⁶ Ham chakit bhaya ki tum ketna jaldi Parmeshwar jon aapan daya se tumme chunis, uske bagal se ghuum gaya hei. Tum koi dusra sandes maan lia hei,

⁷ jab ki khali ekke sachcha sandes hei. Lekin kuchh admi samasya khaṛa kare hei aur maañge hei ki tum Yeeshu ke sachcha sandes se duur hoy jaao.

⁸ Ham preya karta hei ki Parmeshwar uske saja dei jon u sandes ke chhoṛ ke dusra cheej parchaar kare hei! I parwaah nai agar u ham log meñ se ek hei ya to swarag se ek ainjal hei.

⁹ Ham pahile bhi bole raha, aur ab bhi bolega. Ham aasha karta hei ki Parmeshwar uske saja dei ki jon sandes ham log biswaas karta hei uske chhoṛ ke dusra sandes parchaar kare hei.

¹⁰ Ham, log ke khusi nai kare mañgta hei. Ham Parmeshwar ke khusi kare mañgta hei. Kaa tum sochta hei ki ham admi log ke khusi kare mañgta hei? Agar ham wahi karta, tab ham Maseeh ke sewak nai rahta.

Pol Keise Prerit Bhais

¹¹ Bhaai log, ham mañgta hei ki tum jaano ki jon sandes ham parchaar karta hei uske manush nai banaais hei.

¹² Kaahe ki iske hamme koi admi nai dees, aur koi hamme iske baare meñ nai sikhaais. I sandes hamme Yeeshu Maseeh dees jab u hamaar saamne aais raha.

¹³ Tum janta hei ki jab ham Yahuudi raha to keise rahta raha. Ham Parmeshwar ke chech se kaṭhor raha aur uske naas bhi kare mañgta raha.

¹⁴ Hamaar umar ke Yahuudi meñ se ham sab se achchha raha, aur ham u sab kaanuun ke maana jon hamaar baap daada hamme deen raha.

¹⁵ Hamaar peida hoy se pahile, Parmeshwar hamme chun lees raha. U dayaalu raha aur tay kar lees raha

¹⁶ ki hamme aapan laṛka ke dekhaai, ki jisse ham geir Yahuudi log ke uske sandes sunaayga. Ham iske baare meñ koi aur se baat nai kara raha.

¹⁷ Ham ek baat bhi nai bola, ulog se bhi nai jon Yarushalam meñ ham se pahile prerit rahin. Uske badle, ham wahi lage Arebia chala gaya, aur uske baad ham Damaskas lauṭ aaya.

¹⁸ Teen saal ke baad ham Peeṭa se bheñṭ kare Yarushalam gaya aur huañ uske sañghe pandra din tak raha.

¹⁹ Prabhu ke bhaiya Jeims ke chhoṛ ke ham aur koi prerit ke nai dekha.

²⁰ Aur Parmeshwar ke aage ham kasam khaata hei ki ham sachche bolta hei.

²¹ Baad meñ, ham Siria aur Kilkia ke des gaya.

²² Lekin, Juḍia meñ jon koi Maseeh ke chech ke rahin, hamme u ṭaaim tak nai dekhe rahin.

²³ Ulog khali sunin raha ki jon ulog ke dukh dewat raha, wahi ab u sandes parchaar kare hei jiske u ek dafe naas kare maañgat raha.

²⁴ Aur hamaar kaaran, ulog Parmeshwar ke baṛaai kare hei.