Filippi 1 - Nawa Haup

¹ Pol aur Ṭimathi, Yeeshu Maseeh ke sewak ke bagal se. U sab Parmeshwar ke log tak, jon Krisṭ Yeeshu ke sañghe hei, Filippi meñ aur u sab jon kabhi chech ke agua aur madat kare waala rahin.

² Ham preya karta hei ki Parmeshwar ham log ke Pita aur Prabhu Yeeshu Maseeh tum pe daya kari aur saanti se aasheesh dei!

Filippi Ke Chech Ke Waaste Pol Ke Preya

³ Jab kabhi ham tumme yaad karta hei, ham aapan Parmeshwar ke dhanbaad deta hei.

⁴ Aur jab bhi ham tumme aapan preya meñ yaad karta hei, to hamme khusi hoy hei.

⁵ Iske kaaran i hei ki tum pahila din se susamaachaar feilaay meñ hamaar sañghe kaam kara raha.

⁶ Parmeshwar hee hei jon i achchha kaam tum meñ karis, aur hamme pata hei ki Yeeshu Maseeh ke lauṭe ke roj tak, aapan kaam puura hoy se pahile roki nai.

⁷ Hamaar dil meñ tumhaar waaste ek khaas jagha hei. To i raaiṭ hei ki ham tumhaar baare meñ eisehiyeñ mahsuus kari jeise ham karta hei. Tum log sab i kaam jon Parmeshwar hamme dees hei, usman madat kara hei, jab ham susamaachaar ke bachaao karta hei, aur hiañ i jel meñ bataata hei.

⁸ Parmeshwar hee khud jaane hei ki ham tumme ketna dekhe mañgta hei. U jaane hei ki ham tumhaar baare meñ wahi rakam sochta hei jeise Yeeshu Maseeh soche hei.

⁹ Ham preya karta hei ki tumhaar prem baṛhte rahi aur tum uske puura jaan lega aur samajh lega

¹⁰ ki keise raaiṭ chunaao lewe ke hei. Tabhi tum sudh aur bhola rahega jab Yeeshu lauṭi. Aur u din tak,

¹¹ Yeeshu Maseeh, u kaam jon Parmeshwar ke mahima aur baṛaai laai, kare meñ tumme bizi rakkhi.

Pol Ke Waaste Laaif Ke Kaa Matlab Hei.

¹² Dosto, ham mañgta hei ki tum jaano ki jon cheej hamme bhais hei, u hamme susamaachaar feilaay meñ madat karis hei.

¹³ Romi gaaḍ log aur baaki sab log jaane hei ki ham hiañ jel meñ hei kaahe ke ham Maseeh ke sewa karta hei.

¹⁴ Ab Prabhu ke log bina ḍar ke aur saahas se sab ke Parmeshwar ke vachan parchaar kare hei.

¹⁵ Kuchh log Krisṭ ke baare meñ parchaar kare hei kaahe ke ulog ham se jaran kare hei. Aur dusra log parchaar kare hei kaahe ke ulog hamme madat kare maañge hei.

¹⁶ Ulog Maseeh se prem kare hei aur jaane hei ki ham hiañ uske susamaachaar ke bachaao ke waaste hei.

¹⁷ Lekin jon ham se jaran kare hei, ulog dil se nai maañge hei. Ulog khali samasya khaṛa kare maañge hei, jab tak ham jel meñ hei.

¹⁸ Lekin isse koi faayda nai. Jon cheej hoy ke chaahi, u hoi, ki log Maseeh ke baare meñ bataay hei, chaahe ulog dil se maañge hei ya nai. Yahi hei jon hamme khusi rakkhe hei. Ham hardam khusi rahega,

¹⁹ kaahe ke ham janta hei ki tum log ke preya aur madat, Yeeshu Maseeh ke Aatma se aay hei jon hamme bachaay rakkhi.

²⁰ Ham dil se aasha karta hei ki ham u kaam nai karega jisse hamme saram hoi. Chaahe ham mari ya jee, ham mañgta hei ki ham abhi ke rakam bahaadur rahi aur Maseeh ke mahima laai.

²¹ Agar ham jiega, to Maseeh ke khaatir, aur agar ham marega to hamme aur bhi jaada mili.

²² Ham nai janta ki ham kon cheej chuni. Ham jinda rahe ke kuchh achchha kare sakta hei.

²³ Ham kaa chuni, i bahut kaṛa hei. Ham mar ke Maseeh ke sañghe rahega, kaahe ke u aur achchha hei.

^24-25 Lekin ham janta hei ki tum sab ke hamaar jaruurat hei. Yahi kaaran ham jaruur rahega aur madat karega ki tum sab baṛho aur aapan biswaas meñ khusi raho.

²⁶ Tab, jab ham fir se lauṭ ke aayga, tum log ke achchha mauka rahi ki hamaar kaaran Yeeshu Maseeh pe ghamanḍ karega.

²⁷ Khali etna nai, tum log eise raho ki Yeeshu Maseeh ke susamaachaar ke baare meñ mahima laay sako. Tab, chaahe ham tumhaar lage aai ya nai, ham sunega ki tum sab ekke rakam sochta hei. Ham jaan lega ki tum sab ek sañghe kaam karta hei aur tum sab kañdha se kañdha milaay ke aur dukh uṭhaay ke sab ke susamaachaar pe biswaas karaayga.

²⁸ Bahaadur bana raho jab tum dusman ke saamna karta hei. Tumhaar bahaaduri ulog ke dekhaai ki ulog ke naas hoy ke hei, aur u i tumme dekhaai, ki tum sab bach jaayga. Parmeshwar i sab karaai,

²⁹ aur u tumme aasheesh dees hei. Khali tum Maseeh pe biswaas nai karta, lekin tum uske waaste dukh bhi sahta hei.

³⁰ Tum dekha ki ham saha, aur fir bhi tum hamaar dukh ke baare meñ sunta hei. Ab tum bhi yahi rakam dukh sahega.