Efisia 3 - Nawa Haup

Geir Yahuudi Ke Sewa Meñ Pol

¹ Maseeh Yeeshu hamme aapan keidi banaais, ki jisse ham tum geir Yahuudi log ke madat kare saki.

² Tum Parmeshwar ke daya jon se hamme chunis ki ham tumme madat kari, uske baare meñ suna hoyga.

³ Asal meñ, i chiṭṭhi tumme thoṛa bataay hei ki kon rakam Parmeshwar hamme uske bhed se bhara cheej dekhaais hei.

⁴ Jab tum i chiṭṭhi paṛhega, tum dekhega ki ham ketna achchha se Maseeh ke bhed ke samajh leta hei.

⁵ I bhed ke tab tak koi nai jaanat raha, jab tak Parmeshwar ke Aatma aapan prerit aur nabi log se nai bataais.

⁶ Aur bhed i hei, Maseeh Yeeshu ke kaaran, susamaachaar, geir Yahuudi log ke u waada meñ se kuchh dees hei jon Parmeshwar Yahuudi log ke dees raha. Parmeshwar, geir Yahuudi log ke bhi ek boḍi ke bhaag bane ke dees hei.

⁷ Parmeshwar ke daya ham pe raha. Uske sakti ham meñ kaam karis, aur u hamaar kaam hoy gay ki ham susamaachaar ke feilaai.

⁸ Ham Parmeshwar ke log meñ se sab se chhoṭa hei. Lekin Parmeshwar dayaalu raha aur hamme chunis ki ham geir Yahuudi log ke bataai ki Maseeh ke kaaran, bahut se aasheesh hei jon ke naapa nai jaay sake hei.

⁹ Parmeshwar, jon sab cheej banaais, maañgat raha ki ham sab ke madat kari ki ulog adbhut plen ke baare meñ samajh le, jon uske dimaag meñ hardam chhipaan raha.

¹⁰ Tab Parmeshwar chech ke iyuz kari ki u sakti aur adhikaar ke dekhaay sake jon Aatmik dunia meñ hei, jisman uske bahut rakam ke buddhi hei.

¹¹ Parmeshwar i aapan anant plen ke mutaabik karis. Aur u i sab jon plen karis raha, i kaaran kare sakis kaahe ke i sab hamaar Prabhu Maseeh Yeeshu karis raha.

¹² Maseeh ab ham sab ke hausla aur saahas de hei, ki jisse ham sab biswaas se Parmeshwar ke lage aay saki.

¹³ Yahi kaaran tumme himmat nai haare ke hei, jab ham tumhaar waaste sahega. Kaahe ke, i sab tum meñ mahima laai.

Maseeh Ke Prem Ham Log ke Waaste

¹⁴ Ham ghuṭna ṭek ke Pita se preya karta hei.

¹⁵ Swarag aur dharti ke sab koi wahi se jeewan paawe hei.

¹⁶ Parmeshwar mahaan aur shaandaar hei. Ham binti karta hei ki uske Aatma tumme majbuut chela banaai

¹⁷ aur Maseeh tumhaar biswaas ke kaaran tumhaar dil meñ rahi. Majbuuti se aur jaṛ pakaṛ ke uske prem meñ raho.

¹⁸ Ham binti karta hei ki tumhaar Parmeshwar ke sab log samjhe saki ki uske prem ketna gahira ya chauṛa ya uchcha hei.

¹⁹ Ham mañgta hei ki tum Maseeh ke prem ke jaano, jabki u ketna mahaan hei ki uske naapa nai jaay sake hei. Tab tumhaar jeewan u sab se bhar jaai jon cheej Parmeshwar hei.

^20-21 Ham binti karta hei ki Maseeh Yeeshu aur chech hardam Parmeshwar ke baṛaai laai. Uske sakti jon ham meñ kaam kare hei baṛa se baṛa kaam jon ham nai soche sakta hei kari. Aameen.