2 Ṭimathi 2 - Nawa Haup

Yeeshu Maseeh Ke Ek Achchha Saulja

¹ Ṭimathi, hamaar bachcha, Maseeh Yeeshu dayaalu hei, aur tum uske tumme majbuut banaay deo.

² Bahut dafe tum hamme sikhaate suna hei. Ab ham mañgta hei ki tum wahi cheej aur log ke bataao jon pe ham bharosa kare sakta hei ki ulog aur jane ke bataai.

³ Yeeshu Maseeh ke achchha saulja hoy ke naate, tumme aapan bhaag ke dukh sahe ke paṛi.

⁴ Jon saulja log ḍiuṭi pe rahe hei, ulog baahar ke kaam nai kare hei. Ulog khali aapan uppar ke ofisa log ke khusi kare maañge hei.

⁵ Koi bhi khilaaṛi jon khel meñ paaṭ le hei, khel jeete nai sake hei, jab tak u ruuls ke mutaabik nai khele hei.

⁶ Aur kisaan jon mehnat kare hei, ulog aapan khet meñ jon cheej hoy hei, uske sab se pahile khaay hei.

⁷ Agar tum aapan dimaag meñ u sab rakkhega jon ham tumme bataaya hei, tab Prabhu madat kari ki tum sab cheej puura samajh lega.

⁸ Aapan man Yeeshu Maseeh pe lagaay raho! U Ḍeiviḍ ke palwaar ke raha aur maut se jinda kara gais raha, jeise hamaar susamaachaar bataay hei.

⁹ Aur i sandes ke kaaran, ham jel meñ keid hei aur apraadhi ke rakam byohaar hamaar saathe kare hei. Lekin Parmeshwar ke susamaachaar jel meñ bañd nai hei,

¹⁰ aur yahi kaaran ham koi bhi cheej sahe sakta hei. Tab Parmeshwar ke khaas log ke bachaawa jaai. Ulog ke anant mahima mili kaahe ke ulog Yeeshu Maseeh ke log hei.

¹¹ I sachcha sandes hei, “Agar ham log Maseeh ke sañghe mara, to ham log uske sañghe jiega.

¹² Agar ham log haar nai maani, ham log uske sañghe raaj karega. Agar ham bolega ki uske nai janta hei, u bhi boli ki u ham log ke nai jaane hei.

¹³ Agar ham log faitful nai hei, fir bhi u faitful rahi. Maseeh kabhi naa nai kare sake hei ki u kon hei.”

Ek Apruuvḍ Kaam Karewaala

¹⁴ Koi ke i sab cheej bhulaay nai deo. Aur Parmeshwar ke aapan gawaah rakh ke, tum ulog ke samjhaay deo ki vachan ke baare meñ jhagṛa nai kare. I sab jhagṛa koi ke madat nai kare hei. Asal meñ, u sab ke naas kar de hei jon ulog ke sune hei.

¹⁵ Sab kuchh karo ki Parmeshwar tumme apnaay le ki tum ek kaam kare waala hei jon sarmaay nai hei aur khali sachcha sandes sikhaay hei.

¹⁶ Bekaar ke aur bina kaam ke baat se duur raho. U khali log ke Parmeshwar se duur le jaay hei.

¹⁷ U rakam ke baat u ghaao ke rakam hei jon achchha nai hoy hei. Aur Huminyus aur Filetus yahi rakam baat karat rahin

¹⁸ ki mara log ke jinda kar dewa gais hei. I to sach se bahut duur ke baat hei, aur kuchh log ke biswaas ke naas kare hei.

¹⁹ Lekin jon faaunḍeishan Parmeshwar chhoṛis hei u pakka hei. Uspe i likhaan hei, “Prabhu jaane hei ki uske log kon kon hei. To jon koi bhi Prabhu ke weship kare hei, ulog kharaab kaam se duur hoy jaay.”

²⁰ Ek baṛa ghar meñ, kuchh kuchh bartan sona aur chaañdi ke bana rahe hei, jab ki baaki lakṛi ya maṭṭi ke. Isman se kuchh khaas rahe, aur baaki nai.

²¹ Yahi rakam admi log ke saathe rahe hei. Jon koi kharaab kaam kare ke chhoṛ de hei, aur apne aap ke pawitr banaay le hei, ulog khaas hoy jaay hei. Ulog ke jeewan pawitr aur aapan maalik ke khusi se bhar dewe hei, aur ulog sab rakam ke achchha kaam kare sake hei.

²² Temṭaishan jon jawaan log ke jakaṛ le hei, usse duur bhaago. Hardam raaiṭ kaam karo. Faitful raho, premi aur sab ke sañghe miljul ke raho. Ulog ke sañghe weship karo jiske dil safa hei.

²³ Bekaar aur naasamajh jhagṛa se duur raho. I sab khali museebat khaṛa kari,

²⁴ aur Parmeshwar ke sewak log, jhagṛa kare waala nai hoy. Ulog ke sab pe daya kare ke hei, aur ulog ke achchha ṭeecha bane ke hei aur dheeraj bhi rakkhe ke hei.

²⁵ Jab koi jon tumhaar agaiñsṭ meñ hei uske sudhaaro, to naram raho. Saait Parmeshwar ulog ke aapan bagal ghumaay lei aur sachchaai seekhaai.

²⁶ Ulog Saitaan ke kabja meñ hei, aur u aapan baat manwaay hei, lekin Parmeshwar madat kari ki ulog bach jaai.