2 Ṭimathi 1 - Nawa Haup

¹ Pol, Yeeshu Maseeh ke ek prerit ke bagal se. Parmeshwar apne hamme chunis raha ki ham uske prerit bani, aur u hamme waisane jeewan dees hei, jeisan Yeeshu Maseeh dewe ke promis kare raha.

² Ṭimathi, tum hamaar waaste ek pyaara laṛka ke rakam hei. Ham preya karta hei ki Pita Parmeshwar aur Prabhu Yeeshu Maseeh tum pe daya kari aur saanti se tumme aasheesh dei!

Prabhu Ke Waaste Sarmaao Nai

³ Raat aur din preya meñ ham tumme yaad karta hei. Ham hardam tumhaar waaste dhanbaad deta hei, jab ham Parmeshwar jon hamaar baap-daada hei, usse preya karta hei ki ham khula dil se sewa kara hei.

⁴ Hamme yaad hei tum keise roya raha, aur ham tumme dekhe mañgta hei, kaahe ke i hamme bahut khusi dei.

⁵ Hamme i bhi yaad hei ki tumhaar amma, Eunas ke lage ketna pakka biswaas raha. Lois, tumhaar naani ke lage bhi wahi rakam ke biswaas raha, aur ham janta hei ki tumhaar lage bhi hei.

⁶ Yahi kaaran ham mañgta hei ki jon bardaan Parmeshwar tumme dees hei, jab ham aapan haath tum pe rakkha raha, uske achchha se iyuz karo.

⁷ Parmeshwar ke Aatma hamme ḍarpok nai banaay hei. Aatma ham log ke sakti, prem aur apne aap ke bas meñ rakkhe ke dewe hei.

⁸ Ham log ke Prabhu ke baare meñ bole ke nai sarmaao. Aur hamaar waaste bhi saram nai karo, kaahe ke ham uske sewa kare ke kaaran jel meñ bheja gaya. Jon sakti Parmeshwar se aay hei, uske iyuz karo aur hamaar sañghe susamaachaar ke parchaar kare meñ dukh uṭhaao.

⁹ Parmeshwar ham log ke aapan pawitr jan bane ke waaste bachaais aur chunis Ham log kuchh nai kara ki hamme i sab mile, lekin Parmeshwar i sab ke plen karis raha kaahe ke u dayaalu hei. Ṭaaim ke suru hoy se pahile hee Parmeshwar plen karis raha ki Yeeshu Maseeh ham log ke daya dekhaai.

¹⁰ Ab Krisṭ Yeeshu aay gais hei ham log ke Parmeshwar ke daya dekhaay ke waaste. Maseeh ham log ke muktidaata, maut ke haraay dees hei aur ham log ke waaste susamaachaar laais hei. U roshni ke rakam chamke hei aur u jeewan de hei jon kabhi khalaas nai hoy hei.

¹¹ Hamaar kaam hei ki ham ek parchaar kare waala, ek prerit aur ek ṭeecha bani.

¹² Yahi khaatir ham ab dukh uṭhaata hei. Lekin ham sarmaata nai hei! Ham janta hei ki hamaar biswaas kisman hei, aur ham janta hei ki u hamaar aakhri din tak jon cheej u hamme dees hei uske rakhwaali kari.

¹³ Ab wahi ṭeeching pe chalo jon ham tumme dia hei, aur Maseeh ke biswaas aur prem tumhaar ekzaampal rahe.

¹⁴ Tumme sundar khajaana rakkhe ke dewa gais hei. Uske rakhwaali tum u Pawitr Aatma jon tum meñ rahe hei, uske madat se karo.

¹⁵ Tum janta hei ki Eshia meñ sab koi hamaar agaiñsṭ meñ hoy hei, khaas kar ke Fugilus aur Hirmugines.

¹⁶ Ham preya karta hei ki Prabhu, Unesifurus ke palwaar pe daya kari. U hardam hamme khusi rakkhis raha aur jab ham jel meñ gaya, to sarmaais bhi nai.

¹⁷ Tab jab u Raom aais, to sab bagal hamme khojis jab tak hamme paay nai lees.

¹⁸ Ham preya karta hei ki Prabhu Yeeshu, Parmeshwar se boli ki nyaay ke din Unesifurus pe daya dekhaai. Tum to janta hei ki Efisus meñ u hamaar ketna madat karis raha.