2 Kurinth 10 - Nawa Haup

Parmeshwar Ke Kaam Ke Pol Bachaay Hei

¹ Kaa tum sochta hei ki ham ḍarpok hei jab ham tumhaar sañghe rahta hei, aur bahaadur hei jab ham duur rahta hei? Ham tumme sune ke bolta hei ki suno, kaahe ke Krisṭ apne aap naram aur komal raha.

² Kuchh log bolin raha ki ham log i dunia ke log ke rakam chalta hei. To jab ham aayga, ham sochta hei hamme majbuuti aur kaṛaai se ulog se baat kare ke paṛi. Hamme i rakam tumse byohaar kare ke majbuur nai karo.

³ Ham log i dunia meñ rahta hei, lekin ham log, ulog ke rakam nai karta hei,

⁴ ya i dunia ke hatiaar se laṛaai laṛta hei. Iske badle, ham log Parmeshwar ke sakti iyuz karta hei jon baṛa baṛa sakti ke naas kare sake hei. Ham log jhagṛa miṭaata hei

⁵ aur sab rakam ke ghamanḍ, jon koi ke Parmeshwar ke jaane se roke hei. Ham log, sab ke bichaar pakaṛta hei aur ulog ke Krisṭ ke hukum manwaata hei.

⁶ Aur jab tum uske puura maane lagta hei, tab ham uske saja dega jon uske maane nai maañge hei.

⁷ Tum muh dekh ke jaj karta hei. Agar tum meñ se koi soche hei ki khali tumahi Krisṭ ke hei, to fir se socho. Tumhaar rakam ham sab log bhi Krisṭ ke hei.

⁸ Kaahe ke u adhikaar ke waaste agar ham bhi ghamanḍ karega jon ke Prabhu tumme bigṛe ke waaste nai lekin tumme achchha bane ke waaste dees hei, to hamme saram nai lagi.

⁹ Aur ham tumme aapan chiṭṭhi se ḍaraay nai mañgta hei.

¹⁰ Tum meñ se kuchh log bole hei, “Pol ke chiṭṭhi kaṛa aur shaktiwaala hei. Lekin u apne aap kamjor hei aur kuchh bole laayk nai hei.”

¹¹ I log ke achchha se samjhe ke hei ki jab ham tumhaar sañghe rahta hei, ham wahi karega jon ham chiṭṭhi meñ likhta hei.

¹² Ham ulog se apne aap ke tulna nai karega jon aapan baṛaai khud kare hei. Lekin ulog muurakh hei jon apne aap ke khud se tulna kare hei.

¹³ Ham u cheej pe ghamanḍ nai karega jon pe ghamanḍ kare ke hamaar hak nai hei. Ham log khali Parmeshwar ke kaam jon u hamme kare ke bhejis hei, uspe ghamanḍ karega, aur tum u kaam ke ek bhaag hei.

¹⁴ Ham log had tak ghamanḍ nai karta hei. Kaahe ke, hamahi Krisṭ ke sandes tum tak laata hei.

¹⁵ Ham log dusra ke kaam pe ghamanḍ nai karta hei, jeise ki u kaam ham log apne hee kara hei. Lekin hame aasha hei ki jeise tum biswaas meñ majbuut hoy jaayga, ham log agal bagal ke bahut saara log tak pahuñch jaayga. Wahi ham log ke tamanna raha.

¹⁶ Tab ham susamaachaar ke aur sab jagha parchaar kare sakega, jahañ duusar ke kaam jon pahile se bhais hei, uske sammaan ham nai lega.

¹⁷ Baaibal bole hei, “Agar tum ghamanḍ kare mañgta hei, tab Prabhu ke baare meñ ghamanḍ karo.”

¹⁸ Jon koi aapan baṛaai khud kare hei, uske nai, lekin jon ke baṛaai Prabhu kare hei, wahi ke asli meñ baṛaai hoy hei.