1 Ṭimathi 1 - Nawa Haup

¹ Pol ke bagal se. Parmeshwar ham log ke muktidaata aur Maseeh Yeeshu hamme hukum dees raha ki ham Yeeshu Maseeh ke prerit bani, jon hamme aasha dewe hei.

² Ṭimathi, ham log ke biswaas ke khaatir, hamaar waaste tum ek laṛka ke rakam hei. Ham preya karta hei ki hamaar Pita Parmeshwar aur Prabhu Yeeshu Maseeh tum pe daya kari aur saanti ke aasheesh dei!

Jhuuṭa Ṭeeching Ke Chetaaoni

³ Jab ham Mesiḍonia ke khaatir chala, ham tumme Efisus meñ rahe ke bataay raha aur kuchh log jon jhuuṭa ṭeeching feilaay hei, ulog ke chetaaoni dewe ke waaste bataay raha.

⁴ Tumme ulog ke chetaaoni dewe ke jaruuri raha ki ulog baap-daada ke lamba lamba lisṭ aur jhuuṭa kahaani feilaay meñ ṭaaim barbaad nai kare. Eisan cheej khali jhagṛa lagaay hei. Parmeshwar ke kaam kare meñ ulog madat nai kare hei jon khali biswaas se hoy sake hei.

⁵ Tum ulog ke sikhaao ki achchha bichaar aur sachcha biswaas se sachcha prem peida hoy hei.

⁶ Kuchh log to eisan hei jon i sab chhoṛ ke, bina matlab ke baat meñ fañs gain hei.

⁷ Log Maozas ke kaanuun ke guru bane maañge hei. Lekin nai jaane hei ki ulog kaa bole hei, jabki soche hei ki ulog bahut jaane hei.

⁸ Ham log janta hei ki kaanuun achchha hei, agar u raaiṭ se iyuz kara jaay.

⁹ Ham log i bhi samajhta hei ki kaanuun i khaatir nai dia gay raha ki jon log Parmeshwar ke khusi kare hei, uske aapan bas meñ kare, lekin jon kaanuun ke tuuṛe waala log ke, apraadhi, adharmi, aur paapi log ke bas meñ kare ke waaste hei. Aur hatyaara log, dusṭ log aur jon aapan amma-bappa ke maar de hei, ulog ke waaste hei.

¹⁰ Kaanuun, sekshual peveṭ, ya jon homosekshual ke rakam rahe hei ya kidnepas hei, ya jhuuṭ bole waala log hei, ya koṭ meñ jhuuṭa kasam khaay waala log hei, ulog ke waaste likha gay raha. Aur iske khaatir bhi banaawa gais raha jon u susamaachaar ke sachcha baat ke agaiñsṭ kare hei

¹¹ jon mahaan aur pawitr Parmeshwar hamme dees hei.

Parmeshwar Ke Daya Pe Dhanbaad

¹² Ham aapan Prabhu Yeeshu Maseeh ke dhanbaad deta hei. U hamme hamaar kaam ke waaste taagat dees hei, kaahe ke u jaanat raha ki u hamaar uppar bharosa kare sake hei.

¹³ Ham pahile uske ninda karat raha, aur sab ke sataata raha. Lekin u ham pe daya karis kaahe ke ham nai janta raha ki ham kon cheej karta raha, aur ham aapan biswaas uspe nai rakkha raha.

¹⁴ Hamaar Prabhu Yeeshu Maseeh ham pe bahut daya karis. U hamaar jeewan ke aapan rakam biswaas aur prem ke aasheesh se bhar dees.

¹⁵ “Yeeshu Maseeh dunia meñ paapi log ke bachaay aais.” I baat sachcha hei, aur ispe bharosa kara jaay sake hei. Ham to sab se gira paapi raha!

¹⁶ Lekin jab ki ham sab se kharaab raha, fir bhi Parmeshwar ham pe daya karis aur hamme Yeeshu ke dheeraj ke ek ekzaampal banaais. U i kaaran i karis ki jisse aur sab koi Maseeh meñ aapan biswaas rakkhi aur anant jeewan paai.

¹⁷ Ham preya karta hei ki aadar aur mahima hardam ekke Parmeshwar ke mile, jon sada rahe hei aur jon nai dekhaay hei aur anant Raaja hei! Aameen

¹⁸ Ṭimathi, hamaar beṭa, jon hukum ham tumme deta hei, u jon kuchh nabi log bole hei, uske anusaar hei. Agar tum ispe chalega, tab tum ek achchha saulja ke rakam laṛega.

¹⁹ Tumme biswaas rahi aur klia gyaan rahi. Kuchh log to aapan biswaas ke ḍubaay deen hei kaahe ke ulog aapan dilo dimaag ke nai sunin.

²⁰ Usman se dui i rahin, Huminyus aur Elekszenḍa. Ham ilog ke Saitaan ke haath meñ de dia hei, ki jisse ilog seekhe saki ki Parmeshwar ke agaiñsṭ nai jaay ke hei.