1 Thisluneeka 1 - Nawa Haup

Namaste

¹ Pol, Ṭimathi aur Silvaanas ke bagal se. Thisluneeka ke chech ke waaste, jon log Pita Parmeshwar aur Prabhu Yeeshu Maseeh ke hei. Ham preya karta hei ki Parmeshwar tum pe daya kari aur tumme saanti se aasheesh dei!

² Ham Parmeshwar ke tumhaar waaste dhanbaad deta hei, aur hardam preya meñ tumme yaad karta hei. Jab jab ham preya karta hei,

³ ham Parmeshwar Pita ke tumhaar biswaas aur pyaara kaam aur tumhaar majbuut aasha jon hamaar Prabhu Yeeshu Maseeh meñ hei, uske baare meñ bataata hei.

Thisluneeka Ke Log Ke Biswaas aur Ekzaampal

⁴ Hamaar pyaara dost log, Parmeshwar tumme pyaar kare hei, aur ham janta hei ki tum log ke chunis hei, ki tum log uske log raho.

⁵ Jab ham tumme susamaachaar bataaya, tab u khali vachan se nai lekin Pawitr Aatma ke sakti aur biswaas se aais raha. Tum janta raha ki ham kon rakam ke admi hei aur ham keise tumme madat kara.

⁶ To, jab tum sandes maan lia, tum hamlog ke ekzaampal, aur Prabhu ke ekzaampal pe chala. Tum saha, lekin, Pawitr Aatma tumme khusi rakkhis.

⁷ Tum, Mesiḍonia aur Akhaaya meñ Parmeshwar ke log ke waaste ek ekzaampal ban gaya raha.

⁸ Aur tumhaar kaaran, Parmeshwar ke sandes u sab jagha feil gais. Ab Parmeshwar meñ tumhaar biswaas ke samaachaar ke, dunia meñ sab log jaane hei, aur ham log ke uske baare meñ kuchh bhi bole ke nai hei.

⁹ Sab koi baat kare hei ki keise tum hamaar welkam kara raha aur keise tum jinda aur sachcha Parmeshwar ke sewa kare ke waaste muurti ke bagal se ghuum gaya.

¹⁰ Ulog i bhi bataain ki keise tum uske laṛka Yeeshu ke swarag se aay ke waaste waiṭ karta hei. Parmeshwar uske mara se jinda karis, aur nyaay ke din Yeeshu ham log ke Parmeshwar ke gussa se bachaai.