1 Kurinth 3 - Nawa Haup

Parmeshwar Ke Sewak

¹ Hamaar dost log, tum log i dunia ke log ke rakam kaam karta hei. Wahi khaatir ham tum log se aatmik log ke rakam baat nai kare sakta hei. Jahañ tak tumhaar biswaas Maseeh meñ hei, tum sab duudh peeta bachcha log ke rakam hei.

² Yahi khaatir hamme tum log ke duudh peeta bachcha ke rakam dekhe ke paṛe hei, aur duudh piaay ke paṛe hei. Tum khaana nai khaay sakta, aur abhi tak nai khaay sakta,

³ kaahe ke tum abhi tak aatmik nai hei. Tum jaran karta hei aur ek dusra se jhagaṛte rahta hei. Iske yahi matlab hoy hei ki tum aatmik nai hei aur tum sab i dunia ke rakam kaam karta hei.

⁴ Tum meñ se kuchh bolta hei ki tum hamaar pichchhe chalta hei, aur kuchh log bole hei ki ulog Apullos ke pichchhe chale hei. Kaa yahi rakam saadhaaran log nai kare hei?

⁵ Apullos aur ham khali sewak hei, jon tum log ke biswaas paay meñ madat kara raha. Prabhu hee i sab hoy dees.

⁶ Ham bia boya, Apullos paani dees, lekin Parmeshwar uske baṛhaais.

⁷ I farak nai kare hei ki kon bois aur kon paani chhoṛis, lekin Parmeshwar peṛ ke baṛa kare hei.

⁸ Jon peṛ ke bowe hei u otna hee khaas hei, jon paani chhoṛe hei. Aur sab ke fal mili jon bhi kuchh u karis hei.

⁹ Apullos aur ham Parmeshwar ke khaatir sañghe kaam karta hei, aur tum sab Parmeshwar ke gaaḍan aur bilḍiñg hei.

Khali Ek Faaunḍeishan

¹⁰ Parmeshwar dayaalu raha aur hamme ek achchha bilḍa bane ke mauka dees hei. Ham ek faaunḍeishan ḍaara aur uspe dusra log ghar banaain. Lekin hamme saaodhaan rahe ke hei ki ham keisan cheej banaata hei,

¹¹ kaahe ke Krisṭ hee u ek faaunḍeishan hei, aur koi nai.

^12-13 Jon kuchh bhi ham u faaunḍeishan pe banaayga, u nyaay ke roj aagi se parkha jaai. Tab sab log jaan jaai ki ham sona, chaañdi aur keemti patthar, aur lakṛi aur ghaas fuus iyuz kara raha.

¹⁴ Ham sab ke bahut fal mili jab u bilḍiñg khaṛa rahi.

¹⁵ Lekin agar u aagi meñ naas hoy jaai, tab ham sab kuchh khoy dega. Fir bhi hamlog khud bach jaayga, jeise koi aagi se bache hei.

¹⁶ Tum sab to i janta hoga ki tum sab Parmeshwar ke Mandir hei aur uske Aatma tum meñ rahe hei.

¹⁷ Tum sab ek sañghe Parmeshwar ke pawitr Mandir hei, aur Parmeshwar ulog ke naas kar dei jon uske Mandir ke naas kare hei.

¹⁸ Apne aap ke dhoka nai deo! Agar tum meñ se koi soche hei ki tum i dunia ke baare meñ buddhimaan hei, tab tumme muurakh bane ke paṛi ki jisse fir buddhimaan bane saki.

¹⁹ I i kaaran hei ki Parmeshwar i dunia ke buddhi ke muurakh samjhe hei. Jeise Baaibal bole hei, “Parmeshwar buddhimaan log ke pakaṛ le hei jab ulog waais bane maañge hei.”

²⁰ Baaibal aur aage bole hei, “Parmeshwar jaane hei ki jon plen husiaar log banaay hei, u sab bekaar hei.

^21-22 Yahi kaaran ghamanḍ nai karo ki kon, kon cheej karis hei. Pol, Apullos aur Peeṭa, i dunia, jeewan aur maut, abhi aur bhawish, sab tum log ke hei,

²³ aur tum sab Krisṭ ke hei aur Krisṭ, Parmeshwar ke hei.