Vunau ni Soro 6 - Vakavakadewa Makawa

Ai soro ni cala eso, 1-7. Ai valavala ni soro kama, 8-13. Ai valavala ni madrali laukana, 14-18. Ai madrali kei Eroni kei na luvena e na siga era sa lumuti kina, 19-23. Ai valavala ni soro ni valavala ca, 24-30.

¹ A sa vosa vei Mosese ko Jiova, ka kaya,

² Kevaka sai valavala ca e dua na tamata, ka sai valavala vakatani vei Jiova, ka vosa lasu vua na kai nona e na ka sa soli vua me maroroya, se na ka erau veiyalayalati kina, se na ka sa kovei, se sa cakacaka vakaukauwa vua na kai nona;

³ se sa kunea beka na ka sa yali, ka lasu kina, ka bubului vakailasu: e na dua na ka sa kitaka na tamata, kai valavala ca kina:

⁴ ia ni sai valavala ca, a sa cala kina, ena vakasuka na ka sa kovea, se na ka sa rawata vakaukauwa, se na ka sa soli vua me maroroya, se na ka sa yali sa kunea ko koya,

⁵ se dua na ka sa bubului vakailasu kina; ena sauma kece, ka vakaikuritaka e na dua na tikina ni sa wase lima; me solia vua na kenai taukei, e na siga sa macala kina na nona cala.

⁶ Ia me kauta mai ko koya nai soro ni nona caka cala vei Jiova, a sipi tagane sa sega na kena ca, mai na qele ni sipi, vua na bete, ni ko sa lewa mada na ka sa rauta na nona cala;

⁷ ena qai sorovaki koya na bete e na mata i Jiova: ena sega kina ni cudruvi e na dua na ka sa cala kina.

⁸ A sa vosa vei Mosese ko Jiova, ka kaya,

⁹ Mo vakarota vei Eroni kei iratou na luvena, ka kaya, Oqo na lewa e na vuku ni soro kama: nai soro kama, ena sa vakamai tiko e nai cabocabo-ni-soro e na bogi ka sigavaka, ka na waqa tiko kina na bukawaqa ni cabocabo-ni-soro.

¹⁰ Ia me vakaisulu na bete e nonai sulu lineni, me daramaka talega na nona tarausese lekaleka lineni, me qai kauta na dravusa ni soro kama mai na dela ni cabocabo-ni-soro, ka sova voleka ki nai cabocabo-ni-soro.

¹¹ Ia me qai luvata na nonai sulu ko koya, ka vakaisulu e nai sulu tani, ka kauta yani na dravusa ki nai bili ni tikotiko, ki na vanua savasava.

¹² Ia me waqa tikoga na buka e nai cabocabo-ni-soro; me kakua sara ni boko: ia me vakaikuritaka na buka ko koya na bete e na veimataka kecega, ka tuva vakavinaka kina nai soro kama; me vakama talega kina ko koya na uro ni madrali ni veivinakati.

¹³ Me waqa tikoga na buka e na dela ni cabocabo-ni-soro; me kakua ni boko.

¹⁴ Ia oqo na vunau ni madrali laukana: Me vakacabora ko ira na luve i Eroni e na mata i Jiova, e na mata ni cabocabo-ni-soro.

¹⁵ Ia me yakuta ko koya na madrai droka vinaka mai nai madrali laukana, kei na kena waiwai, kei na drega kecega me vakamai sa tu e nai madrali laukana, ka vakama e na dela ni cabocabo-ni-soro me ka boi vinaka, ka mei vakananumi vei Jiova.

¹⁶ Ia na kena vo, me ra kania ko Eroni kei na luvena: me laukana vata kei na madrai sa sega ni vakaleveni e na tikina tabu; e na loma ni rara sa vakabai ni vale ni veitavaki, me ra kania kina:

¹⁷ me kakua ni vavi kei na leveni. Au sa solia me kedrai votavota mai na ka sa cabori vei au e na bukawaqa; sa ka tabu sara, me vaka nai soro ni valavala ca, kei nai soro ni caka cala.

¹⁸ Me ra kania ko ira kecega na tagane vei ira na luve i Eroni. Oqo na vunau sa tawa mudu e na vuku ni ka sa vakacabori vei Jiova e na bukawaqa, e na nomudou veitabatamata: ena tabu ga ko ira kece sa tarai ira.

¹⁹ A sa vosa vei Mosese ko Jiova, ka kaya,

²⁰ Oqo nai madrali nei Eroni kei iratou na luvena, me ra vakacabora vei Jiova e na siga sa lumuti kina; e dua na omeri madrai droka vinaka mei madrali laukana me caka tikoga, e dua na kena wase ni sa wase rua e na mataka, ka dua na kena wase e na yakavi.

²¹ Me caka vata kei na waiwai e na dari kaukamea; ni sa vavi mo qai kauta mai ki loma: na tiki ni madrali laukana sa vavi mo cabora me ka boi vinaka vei Jiova.

²² Ia ko koya vei iratou na luvena sa lumuti me bete me nonai sosomi, me vakacabora: sai lesilesi i Jiova, ka tawa mudu; me vakamai kecega.

²³ Ia nai madrali laukana kecega ni bete me vakamai sara: me kakua ni laukana.

²⁴ A sa vosa vei Mosese ko Jiova, ka kaya,

²⁵ Mo vosa vei Eroni kei iratou na luvena, ka kaya, Oqo na vunau ni soro ni valavala ca: E na yasana sa vakamatei kina nai soro kama, me vakamatei kina nai soro ni valavala ca e na mata i Jiova: oqo sa ka tabu sara:

²⁶ Na bete sa cabora e na vuku ni valavala ca me kania: me laukana e na tikina tabu, e na loma ni rara sa vakabai ni vale ni veitavaki.

²⁷ Ena tabu ga na ka kecega sa tara na yagona: ia ni sa kureitaki e dua na kena dra ki na dua nai sulu, mo savata oqori sa kureitaki kina e na tikina tabu.

²⁸ Ia na kuro qele sa riri kina, me vorolaki: ia kevaka sa riri e na kuro parasa, me masi ka dere e na wai.

²⁹ Me ra kania ko ira kecega na tagane vei ira na bete: oqo sa ka tabu sara.

³⁰ Ia me kakua ni laukana e dua nai soro ni valavala ca, sa kau mai e dua na kena dra ki na vale ni veitavaki, me ia kina na veibulubuluti e na tikina tabu: me na vakamai e na bukawaqa.