Vunau ni Soro 4 - Vakavakadewa Makawa

Ai soro ni valavala ca ni sa vakacalaka na bete, 1-12, se nai soqosoqo taucoko, 13-21, se na turaga, 22-26, se na tamata lailai, 27-35.

¹ A sa vosa vei Mosese ko Jiova, ka kaya,

² Mo vosa vei ira na Isireli, ka kaya, Kevaka sa cala e dua na tamata, ni sa cakava e dua na ka sa vakarota ko Jiova me kakua ni caka, ia sa cakava e na lecava:

³ kevaka sa vakacalaka na bete sa lumuti me vakacalai ira kina na tamata; me qai vakacabora vei Jiova, e na vuku ni nonai valavala ca sa cala kina ko koya, e dua na luve ni pulumokau sa sega na kena ca, mei soro ni valavala ca.

⁴ Ia me kauta na pulumokau ki na mata i Jiova, ki na katuba ni vale ni veitavaki; ka tabaka na ulu ni pulumokau e na ligana, ka vakamatea na pulumokau e na mata i Jiova.

⁵ Ia na bete sa lumuti me taura e dua na dra ni pulumokau, ka kauta ki na vale ni veitavaki:

⁶ me qai tonia na nonai qaqalo na bete e na dra, ka kureitaka vakavitu na dra e na mata i Jiova, e na mata ni lati ni vale tabu.

⁷ Ia na bete me sa boroya na tutuna balavu cake ni cabocabo ni kau boi vinaka me vakamai, sa tu e na mata i Jiova, e na vale ni veitavaki; ka sova yani na dra kecega ni pulumokau ki na vu ni cabocabo-ni-soro kama, mai na katuba ni vale ni veitavaki.

⁸ Ia me kauta laivi na uro kecega ni pulumokau sai soro ni valavala ca; a uro sa ubia na gacagaca, kei na uro kecega sa tu e na gacagaca,

⁹ kei na ivi ruarua, kei na uro sa tu kina, mai na sarisarina, kei nai latikoso sa toka e cake ka toka era na yate, kei na ivi, o koya me na kauta tani,

¹⁰ me vaka sa kau laivi mai na pulumokau sa cabo mei madrali ni veivinakati: ia me vakama oqo na bete e na dela ni cabocabo-ni-soro kama.

¹¹ Ia na kuli ni pulumokau, kei na lewena kecega, kei na uluna, kei na yavana, kei na kena gacagaca, kei na dena,

¹² io na pulumokau taucoko, me colati yani ki nai bili ni tikotiko ki na vanua savasava, sa dausova biu kina na dravusa, ka me vakamai e na bukawaqa e dela ni buka eso; e na tikina sa dausova biu kina na dravusa, me vakamai kina.

¹³ Ia kevaka era vakacalaka nai soqosoqo taucoko ni Isireli, a ra sa lecava na kena cala nai soqosoqo, a ra sa kitaka eso na ka sa vakarota ko Jiova me kakua ni caka, a ra sa cala kina;

¹⁴ ni sa kilai na ka era sa cala kina, me ra qai cabora e dua na luve ni pulumokau ko ira nai soqosoqo mei soro ni nodra cala, ka kauta ki na mata ni vale ni veitavaki.

¹⁵ Ia ko ira na qase vei ira nai soqosoqo, me ra tabaka na ulu ni pulumokau e na ligadra e na mata i Jiova: me qai vakamatei na pulumokau e na mata i Jiova.

¹⁶ Ia na bete sa lumuti me kauta e dua na dra ni pulumokau ki na vale ni veitavaki;

¹⁷ ka me qai tonia na nonai qaqalo na bete e na dra, ka kureitaka vakavitu e na mata i Jiova, e na mata ni lati.

¹⁸ Me boroya talega e na dra na tutuna sa balavu cake e nai cabocabo-ni-soro sa tu e na mata i Jiova, e na vale ni veitavaki; ka sova biuta na dra kecega ki na vu ni cabocabo-ni-soro kama, ka tu mai na katuba ni vale ni veitavaki.

¹⁹ Ia me kauta laivi na kena uro, ka vakama e na dela ni cabocabo-ni-soro.

²⁰ Ia me kitaka vua na pulumokau me vaka ka kitaka eliu vua na pulumokau sai soro ni valavala ca, io me vakakina oqo: ia me sorovaki ira na bete, era na qai sega ni cudruvi kina.

²¹ Ia me colati yani na pulumokau ki nai bili ni tikotiko, ka vakamai me vaka sa vakamai na pulumokau ka liu: oqo nai soro ni nodra vakacalaka nai soqosoqo.

²² Ni sa vakacalaka e dua na turaga, ka sa cakava e na lecava e dua na ka sa vakatabuya ko Jiova na nona Kalou, a sa cala kina;

²³ kevaka sa vakatakilai vua emuri na nona cala; me qai kauta mai ko koya na nonai madrali, a me tagane sa sega na kena ca:

²⁴ ia me tabaka na ulu ni me e na ligana, ka vakamatea e na tikina sa dauvakamatei kina nai soro kama e na mata i Jiova: oqo nai soro ni valavala ca.

²⁵ Ia me kauta ko koya na bete e dua na dra ni soro ni valavala ca e na nonai qaqalo, ka boroya kina na tutuna sa balavu cake e nai cabocabo-ni-soro kama; ka sova biuta na dra ki na vu ni cabocabo-ni-soro kama.

²⁶ Me qai vakama na kena uro kecega e na dela ni cabocabo-ni-soro, me vaka sa cabori na uro ni madrali ni veivinakati: me sorovaki koya kina na bete e na vuku ni nonai valavala ca, ena qai sega ni cudruvi kina.

²⁷ Ia kevaka sa vakacalaka e dua na lewe ni vanua, ka kitaka e dua na ka sa vakatabuya ko Jiova, a sa cala kina;

²⁸ kevaka sa vakatakilai vua emuri na nonai valavala ca sa cakava oti ko koya: me qai kauta mai e dua na me me nonai madrali, na ka yalewa sa sega na kena ca, e na vuku ni nona cala sa cala kina ko koya.

²⁹ Ia me tabaka ko koya na ulu ni soro ni valavala ca e na ligana, ka vakamatea nai soro ni valavala ca e na tikina sa daucabori kina nai soro kama.

³⁰ Ia me kauta ko koya na bete e dua na kena dra e na nonai qaqalo, ka boroya kina na tutuna sa balavu cake e nai cabocabo-ni-soro kama; ka sova biuta na kena dra kecega ki na vu ni cabocabo-ni-soro.

³¹ Ia me na kauta laivi na kena uro kecega, me vaka sa kau laivi na uro mai nai madrali ni veivinakati; ia me vakama ko koya na bete e na dela ni cabocabo-ni-soro me ka boi vinaka vei Jiova; ia ena sorovaki koya na bete, ena qai sega ni cudruvi kina ko koya.

³² Ia kevaka sa kauta mai na nonai madrali, e dua na lami mei soro ni valavala ca, me kauta mai e dua na ka yalewa sa sega na kena ca.

³³ Ia me tabaka ko koya na ulu ni soro ni valavala ca e na ligana, ka vakamatea e na tikina sa dauvakamatei kina nai soro kama, mei soro ni valavala ca.

³⁴ Ia me kauta e dua na dra ni soro ni valavala ca na bete e na nonai qaqalo, ka boroya kina na tutuna sa balavu cake e nai cabocabo-ni-soro kama, ka sova biuta na kena dra kecega ki na vu ni cabocabo-ni-soro:

³⁵ me qai kauta laivi na kena uro kecega, me vaka sa kau laivi na uro ni lami mai nai madrali ni veivinakati sa cabori; me qai vakama e na dela ni cabocabo-ni-soro ko koya na bete, me vaka sa daucaka e na ka sa cabori e na bukawaqa vei Jiova: ia me sorovaki koya na bete e na vuku ni nonai valavala ca sa cakava, ena qai sega ni cudruvi kina ko koya.