Vunau ni Soro 3 - Vakavakadewa Makawa

Ai valavala ni soro ni veivinakati, ni sa dua na pulumokau, 1-5; ni sa dua na sipi, 6-11; ni sa dua na me, 12-16. Sa tabu me laukana na uro kei na dra, 17.

¹ Ia kevaka sa nonai madrali e dua nai madrali ni veivinakati sa cabo, kevaka sa vakacabora ko koya e dua na pulumokau, se ka tagane se yalewa, me vakacabora e na mata i Jiova e dua sa sega na kena ca.

² Ia me tabaka na ulu ni nonai madrali e na ligana, ka vakamatea mai na katuba na vale ni veitavaki: ia ko ira na bete na luve i Eroni, me volita nai cabocabo-ni-soro, ka kureitaka kina na dra.

³ Ia me vakacabora ko koya eso nai madrali ni veivinakati sa cabo, me ka sa vakacabori e na bukawaqa vei Jiova; a uro sa ubia na gacagaca, kei na uro kecega sa tu e na gacagaca,

⁴ kei na ivi ruarua, kei na uro sa tu kina, mai na sarisarina, kei nai latikoso sa toka e cake ka toka era na yate, kei na ivi, o koya me na kauta tani.

⁵ Ia ko iratou na luve i Eroni, me ra vakama e na dela ni cabocabo-ni-soro, e na dela ni soro kama e dela ni buka sa toka e dela ni bukawaqa: oqo na ka sa vakacabori e na bukawaqa, me boi vinaka vei Jiova.

⁶ Ia kevaka sa nonai madrali na sipi se na me mei madrali ni veivinakati vei Jiova, se ka tagane se yalewa, me cabora ko koya e dua sa sega na kena ca.

⁷ Kevaka sa vakacabora na lami me nonai madrali, me cabora e na mata i Jiova.

⁸ Ia me tabaka ko koya na ulu ni nonai madrali e na ligana, ka vakamatea e na mata ni vale ni veitavaki: ia ko iratou na luve i Eroni, me volita nai cabocabo-ni-soro, ka kureitaka kina na dra.

⁹ Ia me vakacabora ko koya eso mai nai madrali ni veivinakati, me ka sa cabori e na bukawaqa vei Jiova; na kena uro kei na buina uro taucoko, me tava laivi voleka ki na suitu; kei na uro sa ubia na gacagaca, kei na uro kecega sa tu e na gacagaca,

¹⁰ kei na ivi ruarua, kei na uro sa tu kina, mai na sarisarina, kei nai latikoso sa toka e cake ka toka era na yate, kei na ivi, o koya me kauta tani.

¹¹ Me qai vakama e na dela ni cabocabo-ni-soro ko koya na bete: oqo na kakana e na ka sa cabori e na bukawaqa vei Jiova.

¹² Ia kevaka sa nonai madrali na me, me cabora ko koya e na mata i Jiova.

¹³ Ia me tabaka na uluna e na ligana, ka vakamatea e na mata ni vale ni veitavaki: ia ko iratou na luve i Eroni, me volita nai cabocabo-ni-soro, ka kureitaka kina na dra.

¹⁴ Ia me so na tikina me cabora ko koya me nonai madrali, me ka sa cabori e na bukawaqa vei Jiova; a uro sa ubia na gacagaca kei na uro kece sa tu e na gacagaca,

¹⁵ kei na ivi ruarua, kei na uro sa tu kina, mai na sarisarina, kei nai latikoso sa toka e cake ka toka era na yate, kei na ivi, o koya me na kauta tani.

¹⁶ Ia me qai vakama e dela ni cabocabo-ni-soro na bete: oqo na kakana e na ka sa cabori e na bukawaqa me ka boi vinaka: sa nei Jiova na uro kecega.

¹⁷ A ka oqo sa kenai lesilesi ka tawa mudu e na nomudou veitabatamata e na nomudou i tikotiko kecega, mo dou kakua ni kania e dua na uro se na dra.