Vunau ni Soro 21 - Vakavakadewa Makawa

Ai vakaro vei ira na bete, e na ka eso.

¹ A sa kaya vei Mosese ko Jiova, Mo vosa vei iratou na bete na luve i Eroni, ka kaya vei iratou, Me kakua ni vakatawasavasavataki koya e dua e na vuku ni tamata mate vei ira na kai nona;

² ia e na vuku ni wekana dina ga, e na vuku i tinana, se tamana, se na luvena tagane, se na luvena yalewa, se na tuakana, se na tacina,

³ se na ganena sa goneyalewa, sa wekana dina, o koya sa sega ni vakawati: io e na vukuna, e tara me vakatawasavasavataki koya kina.

⁴ Me kakua ni vakatawasavasavataki koya ni sa turaga vei ira na nona tamata, me sega ni savasava kina.

⁵ Me ra kakua ni tasia na uludra, se tasia na tutu ni kumidra, se tava na yagodra.

⁶ Me ra savasava vua na nodra Kalou, ka kakua ni vakacacataka na yaca ni nodra Kalou: ni ra sa vakacabora tiko na ka sa cabo e na bukawaqa vei Jiova, me kakana me nei koya na nodra Kalou: o koya me ra savasava kina.

⁷ Me ra kakua ni vakawati kei na dua na yalewa sa dautagane, se sa vaqasei; me ra kakua talega ni vakawati kei na dua na yalewa sa veibiu kei na watina: ni sa savasava ko koya vua na nona Kalou.

⁸ Mo vakasavasavataki koya kina; ni sa vakacabora ko koya na kakana me nei koya na nomu Kalou: mo nanumi koya me savasava: ni'u sa savasava koi au ko Jiova, o koya sa vakasavasavataki kemudou.

⁹ Ia na luvena yalewa e dua na bete sa vakacacani koya ni sa dautagane, sa vakacacani tamana: ena vakamai ko koya e na bukawaqa.

¹⁰ Ia ko koya na bete levu maivei ira na wekana, sa livi ki na uluna na waiwai ni veilumuti, a sa buli me sulumaka nai sulu tabu, me kakua ni biuta na nonai sala, se dresulaka na nonai sulu;

¹¹ me kakua talega ni torova e dua na yago sa mate; me kakua ni vakatawasavasavataki koya e na vuku i tamana, se tinana:

¹² me kakua talega ni curu tani e na vale tabu, se vakacacana na vale tabu ni nona Kalou; ni sa vakatabui oti e na waiwai ni veilumuti sa nei koya na nona Kalou: Koi au ko Jiova.

¹³ Ia me vakawati kei na dua sa goneyalewa ga.

¹⁴ A yada, se yalewa sa biu, se yalewa sa vaqasei, se na dautagane, me kakua ni vakawati kei na dua sa vakaoqo: ia me vakawati kei na dua sa goneyalewa ga, maivei ira na kai nona.

¹⁵ Me kakua talega ni vakacacana na nona kawa e na kedra maliwa na kai nona; ni sai au ko Jiova, ka vakasavasavataki koya.

¹⁶ Sa vosa talega vei Mosese ko Jiova, ka kaya,

¹⁷ Mo vosa vei Eroni, ka kaya, O koya vei ira na nomu kawa e na dua nai tabatamata, sa dua vua na tikina ka ca, me kakua ni toro ko koya me vakacabora na kakana me nei koya na nona Kalou:

¹⁸ ia na tamata kecega sa dua na tikina ka ca, me kakua ni toro mai: a tamata mataboko, se lokiloki, se ucu raraba, se dua na tikina sa vakatani,

¹⁹ se sa ramusu na yavana, se ramusu na ligana,

²⁰ se sa dakupusi, se na leka, se ca e dua na matana, se sa bu ca se vakanana, se ceke;

²¹ a tamata kecega vei ira na luve i Eroni na bete, sa dua na tikina e ca, me kakua ni toro mai me vakacabora na ka sa cabo vei Jiova e na bukawaqa; sa dua na tikina vua sa ca; me kakua kina ni toro mai ko koya me vakacabora na kakana me nei koya na nona Kalou.

²² Me kania ga ko koya na kakana sa nei koya na nona Kalou, se ka tabu se ka tabu sara:

²³ ia me kakua ga ni curu ki loma ni lati, se torova nai cabocabo-ni-soro, ni sa dua na tikina vua e ca; me kakua kina ni vakacacana na noqu veivale tabu: ni sai au ko Jiova, ka vakasavasavataki ira.

²⁴ A sa tukuna ko Mosese vei Eroni, kei iratou na luvena, kei ira kece na Isireli.