Vunau ni Soro 2 - Vakavakadewa Makawa

Ai madrali madrai droka, 1-3; na madrai sa vavi, 4; na madrai sa tavu, 5-10; na oni kei na leveni, 11,12; na masima, 13; kei nai sevu ni vanua, 14-16.

¹ Ia ni sa vakacabora e dua na tamata nai madrali laukana vei Jiova, me madrai droka vinaka na nonai madrali; ia me livia kina ko koya na waiwai; ka viritaka kina na drega me vakamai:

² me qai kauta vei ira na bete na luve i Eroni: me taura maikina na madrai droka vinaka sa yakuta rawa e ligana, ka dua na kena waiwai, kei na kena drega kecega me vakamai; ia me vakama eso e na dela ni cabocabo-ni-soro na bete mei vakananumi, na ka sa vakacabori e na bukawaqa, me ka boi vinaka vei Jiova:

³ ia na kena vo ni madrali laukana, ena kei Eroni kei iratou na luvena: oqo na ka tabu sara e na ka sa vakacabori e na bukawaqa vei Jiova.

⁴ Ia ni ko sa vakacabora nai madrali laukana sa vavi e na lovo, me so na keki sa caka e na madrai droka vinaka sa sega ni vakalevenitaki, sa veiwaki vata kei na waiwai, se me keki mamare sara sa sega ni vakalevenitaki, sa boro e na waiwai.

⁵ Ia kevaka sa nomu i madrali nai madrali laukana sa tavu e na dari kaukamea, me madrai droka sa sega ni vakalevenitaki, sa veiwaki vata kei na waiwai:

⁶ mo dovia, ka livia kina na waiwai: o koya nai madrali laukana.

⁷ Ia kevaka sa nomu i madrali nai madrali laukana mai nai tavuteke, me caka e na madrai droka vinaka kei na waiwai.

⁸ Ia mo kauta nai madrali laukana sa caka e na ka oqo vei Jiova: ia ni sa soli vua na bete, me kauta ko koya ki nai cabocabo-ni-soro.

⁹ Ia me na kauta tani nai vakananumi mai nai madrali laukana ko koya na bete, ka vakama e dela ni cabocabo-ni-soro: me ka sa cabori e na bukawaqa, me boi vinaka vei Jiova.

¹⁰ Ia na kena vo ni madrali laukana ena kei Eroni kei iratou na luvena: oqo na ka tabu sara e na ka sa vakacabori e na bukawaqa vei Jiova.

¹¹ Me kakua e dua nai madrali laukana dou sa vakacabora vei Jiova, me vakalevenitaki: ia mo dou kakua ni vakama e dua na leveni, se na oni, me ka e cabori e na bukawaqa vei Jiova:

¹² e nai madrali ni sevu ga dou na vakacabora vei Jiova; ia me kakua ni cabori e nai cabocabo-ni-soro me ka boi vinaka.

¹³ Ia nai madrali laukana kecega ko na vakacabora mo vakamasimataka; ia mo kakua talega ni guilecava na masima ni veiyalayalati ni nomu Kalou e na nomu i madrali laukana: mo vakacabora vata kei na masima na nomu i madrali kecega.

¹⁴ Ia kevaka ko sa vakacabora eso nai sevu mei madrali vei Jiova, mo cabora mei madrali laukana ni nomu i sevu na sila vou sa vakararagi e na bukawaqa, sa lauvutu mai na sola vakalewena.

¹⁵ Ia mo livia kina na waiwai, ka virinoca ki delana na drega me vakamai: oqo nai madrali laukana.

¹⁶ Ia na bete me vakama na kenai vakananumi, eso na kena sila sa lauvutu, ka dua na kena waiwai, kei na kena drega kecega me vakamai, oqo na ka sa cabori e na bukawaqa vei Jiova.