Vunau ni Soro 18 - Vakavakadewa Makawa

Sa kaya ko Jiova me ra muria na nona vunau, 1-5. Me ra kakua ni veiwatini na veiwekani, 6-18. Me ra kakua ni kitaka na ka vakasisila, 19-30.

¹ A sa vosa vei Mosese ko Jiova, ka kaya,

² Mo vosa vei ira na Isireli, ka kaya vei ira, Sai au ko Jiova na nomudou Kalou.

³ Mo dou kakua ni muria nai valavala ni vanua ko Ijipita, dou a tiko kina: kei nai valavala ni vanua ko Kenani, ka'u sa kauti kemudou kina, mo dou kakua ni muria; ia mo dou kakua ni muria na nodra vunau.

⁴ Na noqu lewa ga, mo dou cakava; kei na noqu i lesilesi, mo dou vakabauta, mo dou muria ga: sai au ko Jiova na nomudou Kalou:

⁵ o koya mo dou vakabauta kina na noqu vunau, kei na noqu lewa; o koya kevaka sa cakava ga na tamata, ena bula kina: sai au ko Jiova.

⁶ Me kakua e dua vei kemudou me mocera e dua na yalewa dou sa veiwekani dina kaya: sai au ko Jiova.

⁷ Mo kakua ni mocera na tinamu, o koya erau sa veimoceri kei tamamu; sa tinamudina ko koya: mo kakua ni moce vata kaya.

⁸ Mo kakua ni moce vata kaya na wati i tamamu; erau sa veimoceri kei tamamu ko koya.

⁹ Mo kakua ni mocera na ganemu, se sa luve i tamamu, se sa luve i tinamu, se sa sucu mai nomudou, se sa sucu tani, mo kakua ni moceri ira.

¹⁰ Mo kakua ni mocera na makubumu, se sa luvena yalewa na luvemu tagane, se sa luvena yalewa na luvemu yalewa: ni rau a tubu vua e dua drau a moce vata kaya.

¹¹ Mo kakua ni moce vata kei na luve i tamamu ka yalewa, o koya sa vakasucuma vua ko watina, sa ganemu ko koya.

¹² Mo kakua ni moce vata kei na gane i tamamu: ni sa wekana dina na tamamu ko koya.

¹³ Mo kakua ni moce vata kei na taci i tinamu, se tuakana, ni sa wekana dina na tinamu ko koya.

¹⁴ Mo kakua ni moce vata kei na wati i tamamu lailai, sa tinamu lailai ko koya.

¹⁵ Mo kakua ni mocera na watina na luvemu tagane; mo kakua ni ca kaya.

¹⁶ Mo kakua ni mocera na watina na tuakamu, se na watina na tacimu.

¹⁷ Mo kakua ni mocera e dua na yalewa, kei na luvena yalewa, se dua na makubuna yalewa; ni ratou sa veiwekani dina; oqo na ka ca.

¹⁸ Mo kakua talega ni vakawati kei na tuakana na watimu se na tacina, ni sa bula tiko ko koya, mo vakararawataki koya kina.

¹⁹ Mo kakua talega ni mocera e dua na yalewa e na gauna sa vakatabui tu kina, ni tauvi koya na mate vakayalewa.

²⁰ Mo kakua talega ni mocera na watina na kai nomu, mo vakavelavelataki iko vata kaya.

²¹ Ia mo kakua ni vakacabora e dua na luvemu e na bukawaqa vei Moloke, ia mo kakua ni vakacacana na yaca ni nomu Kalou: sai au ko Jiova.

²² Mo kakua ni koto vata kaya na tagane me vaka kei na yalewa: oqo sa ka vakasisila.

²³ Mo kakua talega ni koto kaya e dua na manumanu, mo vakasisilataki iko kina: me kakua talega na yalewa me tu e mata ni manumanu me koto vua: oqo na ka ni veivakamaduataki.

²⁴ Dou kakua ni vakasisilataki kemudou e na dua na ka vakaoqo: ni ra sa vakasisilataki e na ka kecega oqo ko ira na veimatanitu, ka'u sa vakaseva tani e na matamudou:

²⁵ a sa dukadukali na vanua: o koya ka'u sa sauma kina na kenai valavala ca, ia na vanua sa luaraka tani na lewena.

²⁶ Ia mo dou vakabauta ga na noqu vunau, kei na noqu lewa, ka mo dou kakua ni kitaka e dua na ka vakasisila oqo; se na kai nomu se na kai tani sa tiko vulagi kei kemudou:

²⁷ (ni ra sa kitaka na ka vakasisila kecega oqo ko ira na lewe ni vanua era tiko kina eliu vei kemudou, a sa vakadukadukalitaki na vanua):

²⁸ me kakua ni luaraki kemudou talega na vanua, ni dou sa vakadukadukalitaka, me vaka ka luaraka na matanitu era tiko kina eliu vei kemudou.

²⁹ Ia ko ira kecega era kitaka e dua na ka vakasisila oqo, io na tamata era kitaka, era na muduki tani vei ira na kai nodra.

³⁰ O koya mo dou vakabauta kina na noqu vunau, mo dou kakua ni kitaka e dua nai valavala vakasisila oqo, sa caka eliu ni dou sa bera ni yaco kina, mo dou kakua ni vakadukadukalitaki kemudou kina: sai au ko Jiova na nomudou Kalou.