Vunau ni Soro 17 - Vakavakadewa Makawa

Sa tabu me ra vakacabora vakailoa nai soro e na yasana kecega ko ira na tamata, 1-9. Sa tabu me laukana na dra, 10-14, se na ka sa mate loa se dresulaka na manumanu, 15,16.

¹ A sa vosa vei Mosese ko Jiova, ka kaya,

² Mo vosa vei Eroni kei iratou na luvena, kei ira kece na Isireli, ka kaya vei ira, Oqo na ka sa vakarota ko Jiova, ka vaka,

³ A tamata kecega vei ira na mataqali i Isireli sa vakamatea na pulumokau, se lami, se me, e loma ni tikotiko, se vakamatea e nai bili ni tikotiko,

⁴ a sa sega ni kauta ki na katuba ni vale ni veitavaki, me cabora nai madrali vei Jiova, e na mata ni vale nei Jiova; ena beitaki na tamata ko ya ni sa vakadave dra: sa vakadavea walega na dra ko koya; ia ena muduki tani na tamata ko ya mai vei ira na kai nona:

⁵ ka me ra kauta ga na nodra i soro na Isireli era vakacabora mai vanua, io me ra kauta vei Jiova, ki na katuba ni vale ni veitavaki, vua na bete, ka vakacabora mei madrali ni veivinakati sa cabori vei Jiova.

⁶ Ia me kureitaki na dra na bete e na dela ni cabocabo-ni-soro i Jiova, sa tu mai na katuba ni vale ni veitavaki, ka vakama na uro me ka boi vinaka vei Jiova.

⁷ Ia me ra kakua ni vakacabora tale na nodra i soro vei ira na me tagane, era sa lako tani kina me muria. A ka oqo sa kenai lesilesi ka tawa mudu vei ira e na nodra veitabatamata.

⁸ Ia mo kaya vei ira, A tamata kecega vei ira na mataqali i Isireli, se na kai tani sa tiko vulagi kei ira, sa vakacabora nai soro kama se dua nai soro,

⁹ ka sega ni kauta ki na katuba ni vale ni veitavaki, me vakacabora vei Jiova; na tamata ko ya ena muduki tani vei ira na kai nona.

¹⁰ Ia na tamata kecega vei ira na mataqali i Isireli, se na kai tani sa tiko vulagi kei ira, sa kania e dua na dra; ena dua tani kina na mataqu vua na tamata ko ya sa kana dra, ia ka'u na muduki koya tani mai vei ira na kai nona.

¹¹ Ni sa kena bula ni yago na dra: ia ka'u sa solia vei kemudou me sorovaka na yalomudou e na dela ni cabocabo-ni-soro: ia sa rawa mei soro na dra, ni sai koya na bula.

¹² O koya ka'u a kaya kina vei ira na Isireli, Me kakua e dua vei kemudou me kania na dra, me kakua talega ni kania na dra e dua na kai tani sa tiko vulagi kei kemudou.

¹³ Kei na tamata kecega vei ira na Isireli, se vei ira na kai tani sa tiko vulagi kei ira, sa vakasasa manumanu e yavai va se manumanu vuka sa tara me laukana; me livia mada ga ko koya na kena dra, ka ubia e na soso.

¹⁴ Ni sa kena bula ni yago kecega na dra sa tu e na yagona: o koya ka'u a kaya kina vei ira na Isireli, Mo dou kakua ni kania na dra ni dua na manumanu: ni sa kena bula ni yago kecega na dra sa tu e na manumanu kecega: ko ira kecega sa kania ena muduki tani.

¹⁵ Kei na tamata kecega sa kania na ka sa mate vakailoa, se na ka sa katilaka na manumanu, se dua vei kemudou, se sa kai tani, me sava nonai sulu ko koya, ka sili e na wai, ia ena sega ni savasava ka yacova na yakavi: ena qai savasava.

¹⁶ Ia kevaka sa sega ni sava nonai sulu, se sili e na wai, ena qai cudruvi e na nona caka ca.