Vunau ni Soro 15 - Vakavakadewa Makawa

A ka sa sega ni savasava kina na tagane, 1-18. Kei na ka sa sega ni savasava kina na yalewa, 19-33.

¹ A sa vosa vei Mosese kei Eroni ko Jiova, ka kaya,

² Drau vosa vei ira na Isireli, ka kaya vei ira, Ni sa turi na yagona e dua na tagane, sa qai sega ni savasava e na vuku ni nona turi.

³ Ia oqo na ka sa sega ni savasava kina ko koya, ni sa dua na nona turi: ni sa turi na yagona, se segai, oqo na nona sega ni savasava.

⁴ Ai mocemoce kecega sa koto kina ko koya sa turi, sa sega ni savasava: kei na ka kecega sa dabe kina ko koya, sa sega ni savasava.

⁵ O ira kecega sa tara na nonai mocemoce, me sava nodra i sulu, ka sili e na wai, ia ena sega ni savasava ka yacova na yakavi.

⁶ Ia ko koya sa dabe e na dua na ka ka dabe kina ko koya sa turi, me sava nonai sulu, ka sili e na wai, ia ena sega ni savasava ka yacova na yakavi.

⁷ Kei koya sa tara na yagona sa turi, me sava na nonai sulu, ka sili e na wai, ia ena sega ni savasava ka yacova na yakavi.

⁸ Ia kevaka sa kasivita na tamata savasava ko koya sa turi, me qai sava nonai sulu, ka sili e na wai, ia ena sega ni savasava ka yacova na yakavi.

⁹ Kei nai vodovodo kecega sa vodo lako kina ko koya sa turi, ena sega ni savasava.

¹⁰ Kei ira kecega sa tara e dua na ka ka tiko kina ko koya, ena sega ni savasava ka yacova na yakavi: kei koya sa colata na ka vakaoqori, me sava na nonai sulu, ka sili e na wai, ia ena sega ni savasava ka yacova na yakavi.

¹¹ Kei ira kecega sa tara ko koya sa turi, a sa sega ni vuya e na wai na ligana, me sava na nonai sulu, ka sili e na wai, ia ena sega ni savasava ka yacova na yakavi.

¹² Kei na bilo qele sa tara ko koya sa turi, me vorolaki: kei na bilo kau kecega me vui e na wai.

¹³ Ia ni sa savasava mai ko koya ka turi mai na nona turi; me qai wilika e vitu na siga me vakasavasavataki kina, ka sava na nonai sulu, ka sili e na wai drodro, ena qai savasava.

¹⁴ Ia e na kenai kawalu ni siga me kauta e rua na soqe, se rua na ruve gone, ka lako ki na mata i Jiova, ki na katuba ni vale ni veitavaki, ka solia vua na bete:

¹⁵ ena qai vakacabora na bete, e dua mei soro ni valavala ca, ka dua mei soro kama; ia me sorovaki koya kina na bete e na mata i Jiova, e na vuku ni nona turi.

¹⁶ Ia kevaka sa bura loa na nona wai e dua na tagane, me qai sili kece na yagona e na wai, ia ena sega ni savasava ka yacova na yakavi.

¹⁷ Kei nai sulu kecega, kei na kuli ni manumanu kecega, sa buraci wai ni tagane, me sava e na wai, ia ena sega ni savasava ka yacova na yakavi.

¹⁸ A yalewa talega erau sa koto kaya na tagane sa bura loa na nona wai, me rau sili e na wai, ia me rau sega ni savasava ka yacova na yakavi.

¹⁹ Ia kevaka sa turi e dua na yalewa, ka sa dra ka turi mai yagona, me na tawase tani ko koya ka bogi vitu: ia ko koya sa tarai koya ena sega ni savasava ka yacova na yakavi.

²⁰ Ia na ka kecega sa koto kina ko koya ni sa tawase tani, ena sega ni savasava: na ka kece talega sa dabe kina ena sega ni savasava.

²¹ Kei koya sa tara na nonai kotokoto, me sava na nonai sulu, ka sili e na wai, ia ena sega ni savasava ka yacova na yakavi.

²² Kei koya sa tara e dua na ka ka dabe kina ko koya, me sava na nonai sulu, ka sili e na wai, ia ena sega ni savasava ka yacova na yakavi.

²³ Ia kevaka sa dua na ka sa no e nonai kotokoto, se e na ka sa dabe kina ko koya, ni sa tara e dua na tamata, ena sega ni savasava ka yacova na yakavi.

²⁴ Ia kevaka sa koto kaya e dua na tagane, a sa tauvi koya na nona dra, ena sega ni savasava ko koya ka bogi vitu; kei nai mocemoce taucoko sa koto kina na tagane ko ya, ena sega ni savasava.

²⁵ Ia kevaka sa turi dra e dua na yalewa ka bogi vuqa ni sa sega ni kena gauna dodonu, se sa turi tiko ni sa oti na bogi me tawase tani kina; a siga kecega sa turi kina sa sega ni savasava, ena vaka na bogi sa tawase tani kina ko koya: ena sega ni savasava ko koya.

²⁶ Ai kotokoto kecega sa koto kina ko koya e na veisiga kece sa turi kina, ena tautauvata vua kei na nonai kotokoto ni sa tawase tani: kei na ka kecega sa dabe kina ko koya ena sega ni savasava, me vaka na nona sega ni savasava ni sa tawase tani.

²⁷ Kei koya sa tara e dua na ka oqori ena sega ni savasava, ia me sava na nonai sulu, ka sili e na wai, ia ena sega ni savasava ka yacova na yakavi.

²⁸ Ia kevaka sa savasava mai na nona turi, me wawa mada bogi vitu, ena qai savasava.

²⁹ Ia e na kenai kawalu ni siga me kauta ko koya e rua na soqe, se rua na ruve gone, ka kauta vua na bete, ki na katuba ni vale ni veitavaki.

³⁰ Ia me cabora ko koya na bete e dua mei soro ni valavala ca, kei na kenai karua mei soro kama; ia me sorovaki koya na bete e na mata i Jiova, e na vuku ni turi ka sega ni savasava kina.

³¹ Ia dou tawasei ira tani vakaoqo na Isireli mai na ka era sega ni savasava kina, me ra kakua ni mate e na nodra sega ni savasava, ni ra sa vakadukadukalitaka na noqu vale sa tu e na kedra maliwa.

³² Oqo na lewa e na vuku i koya sa turi, kei koya sa bura loa na nona wai, a sa sega ni savasava kina;

³³ kei koya na yalewa sa tauva na mate vakavula; kei koya sa turi, se tagane se yalewa; kei koya erau sa mocera na yalewa sa sega ni savasava.