Vunau ni Soro 14 - Vakavakadewa Makawa

A lewa e na vuku ni vukavuka ni sa la'ki vakasavasavataki, 1-32. Ai vakatakilakila ni vukavuka e na vale, kei na kena vakasavasavataki, 33-57.

¹ A sa vosa vei Mosese ko Jiova, ka kaya,

² Oqo na lewa e na vuku ni tamata sa vukavuka, e na siga sa vakasavasavataki kina ko koya: Me kau mai ko koya vua na bete:

³ ia me lako yani ki nai bili ni tikotiko na bete; ka me qai dikeva na bete; ia kevaka sa seavu na vukavuka mai na tamata ka tauvi vukavuka;

⁴ me qai vakarota ko koya na bete me tauri e na vukuna sa la'ki vakasavasavataki e rua na manumanu vuka sa savasava ka bula, kei na kau sitari, kei na ka kulakula, kei na isopa:

⁵ ia me vakarota na bete me vakamatei e dua vei rau na manumanu, e na dua na bilo qele sa tiko kina na wai drodro;

⁶ na manumanu sa bula tiko me taura ko koya, kei na kau sitari, kei na ka kulakula, kei na isopa, ka tonia vata kei na manumanu sa bula ki na dra ni manumanu ka vakamatei e dela ni wai drodro:

⁷ me qai kureitaka vakavitu vua sa la'ki vakasavasavataki mai na vukavuka, ka tukuni koya ni sa savasava, me qai laiva na manumanu sa bula me vuka yani e dela ni vanua.

⁸ Ia ko koya sa la'ki vakasavasavataki, me sava nonai sulu, ka tasia na uluna kei na yagona taucoko, ka sili e na wai, me savasava kina: ka sa oti, me qai lako mai ki nai tikotiko, ia me kakua ni curuma na nona vale laca me bogi vitu mada.

⁹ Ia e na kenai kavitu ni siga, me tasia kece na drau ni uluna, kei na kumina, kei na vacuna, io na kena vutikana kecega me tasia ko koya: ka sava nonai sulu, ka sili talega e na wai, ena qai savasava ko koya.

¹⁰ Ia e na kenai kawalu ni siga me kauta e rua na lami tagane sa sega na kena ca, ka dua na lami yalewa sa yabaki dua sa sega na kena ca, ka tolu na omeri madrai droka mei madrali laukana, sa veiwaki vata kei na waiwai, kei na waiwai e lailai sobu e na dua na paidi.

¹¹ Ia na bete sa vakasavasavataki koya, me kauta ki na mata i Jiova na tamata sa la'ki vakasavasavataki kei na ka talega ko ya, ki na katuba ni vale ni veitavaki:

¹² me qai taura e dua vei rau na lami tagane na bete, ka vakacabora mei soro ni caka cala, kei na waiwai sa lailai sobu e na paidi e dua, ka yalovaka mei soro e yalovaki e na mata i Jiova:

¹³ me qai vakamatea na lami e na yasana sa dauvakamatei kina nai soro ni valavala ca kei nai soro kama, e na tikina tabu: ni sa nona na bete nai soro ni valavala ca, sa vaka talega kina nai soro ni caka cala: sa ka tabu sara.

¹⁴ Ia me kauta e dua na dra ni soro ni caka cala na bete, ka me boroya na bete na vuso ni daligana i matau ni tamata sa la'ki vakasavasavataki, kei nai dovidovi-ni-kakana ni ligana i matau, kei nai qaqalo levu ni yavana i matau:

¹⁵ ia me kauta e dua mai na waiwai sa lailai sobu e na paidi e dua na bete, ka livia ki na qeteqete ni ligana i mawi:

¹⁶ me qai tonia na bete na nonai dusidusi i matau e na waiwai sa tu e na ligana i mawi, ka kureitaka vakavitu na waiwai e na nonai dusidusi e na mata i Jiova:

¹⁷ ia mai na kena vo ni waiwai sa tu e ligana, me lumuta kina na bete na vuso ni daligana i matau na tamata sa la'ki vakasavasavataki, kei nai dovidovi-ni-kakana ni ligana i matau, kei nai qaqalo levu ni yavana i matau, e dela ni dra ni soro ni caka cala:

¹⁸ ia na kena vo ni waiwai e na ligana na bete, me livia ko koya ki na ulu i koya sa la'ki vakasavasavataki: ia me sorovaki koya na bete e na mata i Jiova.

¹⁹ Ia me cabora nai soro ni valavala ca na bete, ka sorovaki koya sa la'ki vakasavasavataki mai na nona tawa savasava; ka oti me qai vakamatea nai soro kama:

²⁰ me qai cabora nai soro kama kei nai madrali laukana e na dela ni cabocabo-ni-soro na bete: ka sorovaki koya na bete, ena qai savasava ko koya.

²¹ Ia kevaka sa dravudravua ko koya, a sa sega ni rawata, me qai kauta ko koya e dua na lami tagane mei soro ni caka cala me yalovaki, me sorovaki koya kina, ka dua na omeri madrai droka sa veiwaki vata kei na waiwai, mei madrali laukana, kei na waiwai e lailai sobu e na paidi e dua;

²² ka rua na soqe, se rua na ruve gone, me vaka na ka sa rawata; ia me dua mei soro ni valavala ca, ka dua mei soro kama.

²³ Ia me kauta ko koya vua na bete e na kenai kawalu ni siga me vakasavasavataki kina, ki na katuba ni vale ni veitavaki, e na mata i Jiova.

²⁴ Ia me kauta na lami mei soro ni caka cala na bete, kei na waiwai sa lailai sobu e na paidi e dua, me qai yalovaka na bete e na mata i Jiova mei soro e yalovaki:

²⁵ ia me vakamatea ko koya na lami sai soro ni caka cala, ka me kauta e dua na dra ni soro ni caka cala na bete, ka boroya kina na vuso ni daligana i matau na tamata sa la'ki vakasavasavataki, kei nai dovidovi-ni-kakana ni ligana i matau, kei nai qaqalo levu ni yavana i matau:

²⁶ me qai livia e dua na waiwai na bete ki na qeteqete ni ligana i mawi:

²⁷ me qai kureitaka vakavitu na bete, e na nonai dusidusi i matau, e dua na waiwai sa tu e ligana i mawi, e na mata i Jiova:

²⁸ me qai lumuta na bete e na waiwai sa tu e ligana, na vuso ni daligana i matau na tamata sa la'ki vakasavasavataki, kei nai dovidovi-ni-kakana ni ligana i matau, kei nai qaqalo levu ni yavana i matau, e na tikina sa boro kina na dra ni soro ni caka cala:

²⁹ ia na kena vo ni waiwai sa tu e ligana na bete, me livia ko koya ki na uluna sa la'ki vakasavasavataki, me sorovaki koya e na mata i Jiova.

³⁰ Me qai vakacabora ko koya e dua vei rau na soqe, se vei rau na ruve gone, me vaka na ka sa rawata;

³¹ io na ka ga e rawata, e dua mei soro ni valavala ca, ka dua mei soro kama, kei nai madrali laukana: ia me sorovaki koya sa la'ki vakasavasavataki na bete, e na mata i Jiova.

³² Oqo na lewa e na vukuna sa tauva na vukavuka, ko koya sa sega ni rawata, ni sa vakasavasavataki.

³³ A sa vosa ko Jiova vei Mosese kei Eroni, ka kaya,

³⁴ Ni kemuni na yaco ki na vanua ko Kenani, ko ya ka'u sa solia vei kemuni mo ni taukena, ia ni'u sa vakatubura na vukavuka e na dua na vale e na vanua kemuni sa taukena;

³⁵ me qai lako ko koya sa taukena na vale, ka tukutuku vua na bete, ka kaya, Sa rairai vei au ni sa tiko e vale e dua na ka e vaka na mate:

³⁶ ia me vakarota na bete me ra vakalalataka mada na vale, me qai curuma na bete me dikeva na mate, me kakua kina ni tawa savasava na ka kecega sa tiko e vale: ka oti, me qai curu na bete me raica na vale:

³⁷ ia me dikeva na mate ko koya; ia kevaka sa tiko e lalaga ni vale na mate, ka sa sega ni tautauvata na tikina e so, sa via karakarawa se via damudamu, a sa rairai ni sa lako ki loma ni lalaga;

³⁸ me qai curu ki tautuba na bete, ki na katuba ni vale, ka sogota na vale ka bogi vitu:

³⁹ me qai lako tale mai na bete e na kenai kavitu ni siga, ka dikeva: ia kevaka sa teteva na lalaga ni vale na mate;

⁴⁰ me qai vakarota na bete me ra kauta tani na veivatu sa tiko kina na mate, ka biuta ki taudaku ni koro, ki na yasana sa sega ni savasava.

⁴¹ Me vakarota talega ko koya me kari na lalaga ni vale eloma ka volita, ia me ra biuta na lase era karia ki taudaku ni koro, ki na yasana sa sega ni savasava:

⁴² me ra qai kauta mai na veivatu tani, ka vakaisosomitaka na veivatu ko ya; ka kauta na lase vou, ka botana na vale.

⁴³ Ia kevaka sa rairai tale na mate, ka teteva e na vale, ni sa kau tani na veivatu, ka kari oti na vale, ka botani;

⁴⁴ me na qai lako mai na bete, ka dikeva; ia kevaka sa teteva na mate e na vale, oqo na vukavuka kakana e na vale: sa sega ni savasava.

⁴⁵ Me qai basuka sobu na vale ko ya, na kena veivatu, kei na kena kau, kei nai botani kecega ni vale; ka kauta tani ki taudaku ni koro, ki na yasana sa sega ni savasava.

⁴⁶ Ia ko koya sa curuma na vale e na dua na siga sa sogo kina, ena sega ni savasava ka yacova na yakavi:

⁴⁷ kei koya sa koto e na vale ko ya, me sava na nonai sulu: kei koya sa kana e na vale ko ya, me sava na nonai sulu.

⁴⁸ Ia kevaka sa curu kina na bete, ka dikeva; ka sa sega ni teteva na mate e na vale ni sa botani oti na vale: me qai tukuna na bete ni sa savasava na vale ko ya, ni sa vakatakalitaki na mate.

⁴⁹ Ia me kauta ko koya, me vakasavasavataka kina na vale, e rua na manumanu vuka, kei na kau sitari, kei na ka kulakula, kei na isopa:

⁵⁰ me qai vakamatea ko koya e dua vei rau na manumanu e na dua na bilo qele sa tiko kina na wai drodro:

⁵¹ me qai taura na kau sitari, kei na isopa, kei na ka kulakula, kei na manumanu vuka sa bula, ka tonia e na dra ni manumanu sa vakamatei, kei na wai drodro, ka kureitaka vakavitu ki na vale:

⁵² ka me vakasavasavataka na vale e na dra ni manumanu, kei na wai drodro, kei na manumanu sa bula, kei na kau sitari, kei na isopa, kei na ka kulakula:

⁵³ ia me sereka na manumanu bula me vuka yani e dela ni vanua mai taudaku ni koro, ia me sorovaka na vale: ena qai savasava.

⁵⁴ Oqo na lewa sa bale ki na vukavuka kecega, kei na bu ca,

⁵⁵ kei na vukavuka e nai sulu, kei na vale,

⁵⁶ kei na vuvuce, se na vidikoso, se na tikina rama:

⁵⁷ me vakatakila ni sa sega ni savasava se ni sa savasava: oqo na lewa sa bale ki na vukavuka.