Vunau ni Soro 13 - Vakavakadewa Makawa

A lewa e na vuku ni vukavuka.

¹ A sa vosa vei Mosese kei Eroni, ko Jiova ka kaya,

² Kevaka sa dua na tamata sa tu e na kulina na vuvuce, se na vidikoso, se na tikina rama, a sa tu e na kulina me vaka na vukavuka; me kau ko koya vei Eroni na bete, se vua e dua vei ira na luvena sa bete:

³ ia me dikeva ko koya na bete na mate e na kulina; ia kevaka sa vulavula mai na vutikana e na tikina sa tu kina na mate, a sa rairai ni sa kania na lewena, oqo na vukavuka; ia ni sa raici koya na bete, me qai tukuni koya ni sa sega ni savasava.

⁴ Ia kevaka sa vulavula mai na tiki ni kulina sa rama, a sa rairai ni sa tauva walega na kulina, a sa sega ni vulavula mai na vutikana; me qai sogoti koya na mate na bete, ka bogi vitu:

⁵ me qai raici koya na bete e na kenai kavitu ni siga: ia kevaka sa rairai vua, ni sa sega ni tetela na mate e na kulina; me qai sogolati koya tale na bete, ka bogi vitu tale:

⁶ me qai raici koya tale na bete ni sa oti na bogi vitu: ia kevaka sa loaloa mai na mate, a sa sega ni tetela na mate e na kulina, me qai tukuni koya na bete ni sa savasava; sa bu ca walega: me sava ko koya na nonai sulu, ka na sa savasava.

⁷ Ia kevaka sa tetela vakalevu na bu ca e na kulina, ni sa raici koya oti na bete me tukuni koya ni sa savasava, me qai raici koya tale na bete:

⁸ ia ni sa dikeva na bete, kevaka sa tetela na bu ca e na kulina, me qai tukuni koya na bete ni sa sega ni savasava: sa dina ga sa vukavuka.

⁹ Ni sa tauvi vukavuka e dua na tamata, me qai kau ko koya vua na bete;

¹⁰ ia me dikevi koya na bete: ia kevaka sa dua na vuvuce vulavula e na kulina, a sa vakavulavulataka na vutikana, ka sa tiko e na vuvuce na tiki ni lewena sa bulabula;

¹¹ sai koya na vukavuka makawa e na kulina; me qai tukuni koya na bete ni sa sega ni savasava, me kakua ni sogolati koya: ni sa sega ni savasava ko koya.

¹² Ia ke sa tetela sara na vukavuka e na kulina, a sa robota kece na kulina sa tauvi vukavuka, mai na uluna ka cavaraka ki na yavana, e na tikina kecega sa rai kina na bete;

¹³ me qai vakaraica na bete: ia ke sa robota na lewena taucoko na vukavuka, me qai tukuni koya ka mate ni sa savasava: sa vulavula kece mai: sa savasava ko koya.

¹⁴ Ia e na siga ga sa rairai kina na tikina sa bulabula, ena sega ni savasava kina.

¹⁵ Ia me dikeva na tikina sa bulabula na bete, ka tukuni koya ni sa sega ni savasava: sa sega ni savasava sa bulabula na tikina: oqo na vukavuka.

¹⁶ Ia kevaka sa vuki tale na tikina sa bulabula, me vulavula mai, me qai lako mai ko koya vua na bete;

¹⁷ ia me dikevi koya na bete: ia kevaka sa vulavula mai na mate; me qai tukuna na bete ni sa savasava mai na mate: sa savasava ko koya.

¹⁸ Ia ke tu e na lewena, e dua na bo, a sa mavo,

¹⁹ a sa tubu na vuvuce vulavula, e na tikina ka tu kina na bo, se na tikina rama, e vulavula, ka via damudamu mai, me sa vakatakilai vua na bete;

²⁰ ia me sa dikeva na bete, ia kevaka sa rairai ni sa kakana ki na lewena, a sa vulavula mai na vutikana; me qai tukuni koya na bete ni sa sega ni savasava: oqo na vukavuka, sa tubu e na bo.

²¹ Ia kevaka sa dikeva na bete, ka sa sega kina na vutikana vulavula, ka tiko walega e na kulina, a sa loaloa mai; me qai sogolati koya na bete, ka bogi vitu:

²² ia kevaka sa tetela vakalevu e na kulina, me qai tukuni koya na bete ni sa sega ni savasava: oqo na vukavuka.

²³ Ia kevaka sa tu ga na tikina sa rama, a sa sega ni tetela, sa qai bo katakata; ia me na tukuni koya na bete ni sa savasava.

²⁴ Ia kevaka sa tu e na kulina na we ni kama, a sa tu e na lewena bulabula, sa we ni kama, e dua na tikina sa rama, e vulavula, sa via damudamu mai, se vulavula ga;

²⁵ me qai dikeva na bete: ia kevaka sa vulavula mai na vutikana e na tikina rama, a sa rairai ni sa kakana ki na lewena; oqo na vukavuka, sa tubu e na tikina sa kama e na bukawaqa: ia me qai tukuni koya na bete ni sa sega ni savasava: oqo na vukavuka.

²⁶ Ia kevaka sa dikeva na bete, ka sa sega na vutikana vulavula e na tikina sa rama, a sa tu walega e na kulina, a sa loaloa mai; me qai sogolati koya na bete, ka bogi vitu:

²⁷ ia me dikevi koya na bete e na kenai kavitu ni siga: kevaka sa tetela vakalevu e na kulina, me qai tukuni koya na bete ni sa sega ni savasava: oqo na vukavuka.

²⁸ Ia kevaka sa tu ga na tikina sa rama, a sa sega ni tetela e na kulina, a sa loaloa mai; oqo ga na vuvuce ni tikina sa kama, ia me tukuni koya na bete ni sa savasava: ni sa we walega ni kama.

²⁹ Ia kevaka sa tauva e dua na tagane se dua na yalewa, na mate e na uluna se kumina;

³⁰ me qai dikeva na mate na bete; ia kevaka sa rairai ni sa kakana; a sa tu kina na drauna dromodromoa e matailalai; me qai tukuni koya na bete ni sa sega ni savasava: oqo na bu ca mamaca, io na vukavuka e na uluna se kumina.

³¹ Ia kevaka sa dikeva na mate ni bu ca na bete; ka sa rairai me vaka sa tiko walega e na kulina, ka sa sega kina na drauna loaloa; me qai sogolati koya sa tauvi bu ca ko koya na bete, ka bogi vitu:

³² ia e na kenai kavitu ni siga me dikeva na mate na bete: ia kevaka sa sega ni tetela na bu ca, a sa sega kina na drauna dromodromoa, ka sa rairai na bu ca ni sa tiko walega e na kulina;

³³ me qai tasi ko koya, ia me kakua ga ni tasia na tikina e bu ca; me qai sogolati koya sa tauvi bu ca na bete, ka bogi vitu tale:

³⁴ ia e na kenai kavitu ni siga me dikeva na bu ca na bete; ia, kevaka sa sega ni tetela e na kulina na bu ca, ka sa sega ni kakana ki na lewena; me qai tukuni koya na bete ni sa savasava: me sava ko koya na nonai sulu, a sa savasava.

³⁵ Ia kevaka sa tetela vakalevu na bu ca e na kulina, ni sa savasava oti;

³⁶ me qai dikevi koya na bete: ia kevaka sa tetela na bu ca e na kulina, me qai kakua ni vakasaqara na drauna dromodromoa na bete; sa sega ni savasava ko koya.

³⁷ Ia kevaka sa rairai vua ni sa tu ga na bu ca, a sa tubu kina na drauna loaloa; sa mavo na bu ca, sa savasava ko koya; ia me tukuni koya na bete ni sa savasava.

³⁸ Ia kevaka sa dua na tagane se dua na yalewa, sa tu e na kulina na tikina eso sa rama, na tikina rama e vulavula;

³⁹ me qai dikeva na bete: ia kevaka sa vulavula ka loaloa mai na tikina sa rama e na kulina; oqo na tikina tavukadiridiri sa tubu e na kulina; sa savasava ko koya.

⁴⁰ Ia na tamata sa lutu na drau ni uluna, sa ulu cou; ia sa savasava ga:

⁴¹ kei koya sa lutu na drau ni uluna mai na yadrena, sa yadre drika; ia sa savasava ga.

⁴² Ia kevaka sa tu e na ulu cou, se na yadre drika, e dua na drakusi sa vulavula ka damudamu mai; oqo na vukavuka sa tubu e na uluna sa cou, se na yadrena sa drika:

⁴³ Ia me dikevi koya na bete: ia kevaka sa vulavula ka via damudamu mai na vuvuce ni drakusi e na uluna sa cou, se na yadrena sa drika, me vaka nai rairai ni vukavuka e na kulina;

⁴⁴ sa qai tamata vukavuka ko koya, sa sega ni savasava: me tukuni koya na bete ni sa sega sara ni savasava; sa tiko e na uluna na nona mate.

⁴⁵ Ia ko koya sa vukavuka, me dresulaki na nonai sulu, ka me kua ni vakaisala na uluna, ka me tabonaki na tebenigusuna e cake, ka me qai kacivaka ko koya, Au sega ni savasava! au sega ni savasava!

⁴⁶ A veisiga kecega sa mate kina ko koya, ena sega ni savasava: sa sega ni savasava ko koya: me tiko ga vakai koya; me tiko e nai bili ni tikotiko na nona vale.

⁴⁷ Ai sulu talega sa tu kina na vukavuka, sei sulu vutika ni sipi sei sulu lineni;

⁴⁸ se sa tiko e ketena se dakuna, e na vutika ni sipi sei sulu lineni, e na kuli ni manumanu, se dua na ka sa caka maikina:

⁴⁹ ia kevaka sa via karakarawa se via damudamu mai na mate e nai sulu, se na kuli ni manumanu, e ketena se dakuna, se dua na ka sa caka e na kuli ni manumanu; oqo na vukavuka, ia me vakaraitaki vua na bete:

⁵⁰ ia me dikeva na mate na bete, ka noca vakatikitiki tani, ka bogi vitu:

⁵¹ me qai raica tale ko koya na mate e na kenai kavitu ni siga: kevaka sa teteva nai sulu na mate, e na ketena se dakuna, se na kuli ni manumanu, se dua na ka sa caka maikina; sa qai vukavuka kakana na mate ko ya: sa sega ni savasava.

⁵² Me vakama ko koya nai sulu ko ya, ke tiko e ketena se dakuna, ke vutika ni sipi sei sulu lineni, se dua na ka sa caka e na kuli ni manumanu, sa tiko kina na mate: ni sa vukavuka kakana; me vakamai e na bukawaqa.

⁵³ Ia kevaka sa dikeva na bete, ka sa sega ni teteva nai sulu na mate, e ketena se dakuna, se dua na ka sa caka e na kuli ni manumanu;

⁵⁴ me qai vakarota na bete me ra savata na ka sa tu kina na mate, ena qai noca vakatikitiki tani, ka bogi vitu tale:

⁵⁵ me qai raica na mate na bete, ni sa sava oti: ia kevaka sa sega ni roka tani mai na mate, a sa sega ni teteva na mate; sa sega ni savasava; mo vakama e na bukawaqa; sa teteva eloma, se dravudravua e ketena se dakuna.

⁵⁶ Ia kevaka sa dikeva na bete; ia ke sa loaloa mai na mate ni sa sava oti; me qai dresuka tani mai nai sulu, se na kuli ni manumanu, ke tiko e ketena se dakuna:

⁵⁷ ia kevaka sa rairai tiko e nai sulu, e ketena se dakuna, se dua na ka sa caka e na kuli ni manumanu; sa teteva tiko; mo vakama e na bukawaqa na ka sa tiko kina na mate.

⁵⁸ Ia nai sulu, na ketena se dakuna, se dua na ka sa caka e na kuli ni manumanu, ko sa sava oti, kevaka sa takali tani kina na mate, me qai baci sava tale, ena qai savasava.

⁵⁹ Oqo na lewa e na vuku ni vukavuka e nai sulu, se vutika ni sipi sei sulu lineni, ke tiko e ketena se dakuna, se dua na ka sa caka e na kuli ni manumanu, me tukuni kina ni sa savasava, se me tukuni ni sa sega ni savasava.