Vunau ni Soro 11 - Vakavakadewa Makawa

A manumanu sa tara me laukana, kei ira sa tabu, 1-8; kei na ika, 9-12; kei na manumanu vuka, 13-28; kei na ka sa dolo, 29-47.

¹ A sa vosa vei Mosese kei Eroni ko Jiova, ka kaya vei rau,

² Drau vosa vei ira na Isireli, ka kaya, Oqo na manumanu e yavai va kemuni na kania vei ira kecega na manumanu e vuravura.

³ Na manumanu kecega sa wase sara na kena ququ, ka sa mama vakarua na kena, oqo ga ni kania.

⁴ Ia ko ira oqo vei ira sa mama vakarua na kena, kei ira sa wase sara na kena ququ, ni kakua ni kania: a kameli, ni sa mama vakarua na kena, ia sa sega ni wase sara na kena ququ; sa sega ni savasava vei kemuni.

⁵ Kei na koni, sa mama vakarua na kena, ia sa sega ni wase sara na yavana; sa sega ni savasava vei kemuni.

⁶ Kei na eri, sa mama vakarua na kena, a sa sega ni wase sara na yavana; sa sega ni savasava vei kemuni.

⁷ Kei na vuaka, sa wase sara na kena ququ, ka sa sega ni mama vakarua na kena; sa sega ni savasava vei kemuni.

⁸ Mo ni kakua ni kania na lewedra, mo ni kakua talega ni tara na yagodra ni sa mate; era sega ni savasava vei kemuni.

⁹ Oqo kemuni na kania e na ka kecega mai wai: a ka sa vakatutuna ka vakavarina mai wai, e na waitui, kei na uciwai, mo ni kania.

¹⁰ Ia na ka kecega sa sega ni vakatutuna ka vakavarina e na waitui, kei na uciwai, e na ka kecega sa yavavala e na wai, kei na ka bula kecega sa tiko e wai, era na ka vakasisila vei kemuni:

¹¹ ia mo ni vakasisilataka; mo ni kakua ni kania na lewedra, ia mo ni vakasisilataka na yagodra ni sa mate.

¹² A ka kecega mai wai sa sega ni vakatutuna ka sega ni vakavarina, sa na ka vakasisila vei kemuni.

¹³ Ia na ka oqo kemuni na vakasisilataka vei ira na manumanu vuka; me kakua ni laukana, sa ka vakasisila: na ikeli kei na kia ikeli,

¹⁴ kei na osipere; kei na kaiti, kei na veimataqali vulituri;

¹⁵ na mataqali reveni kecega;

¹⁶ na ositereji; kei na mataqali lulu kecega kei na manulevu;

¹⁷ io na lulu tabu kei na lulu tani,

¹⁸ kei na veimataqali suani,

¹⁹ kei na veimataqali belo, kei na upupa; kei na beka.

²⁰ A manumanu vuka kecega sa dauqasi, sa yavai va, me ka vakasisila vei kemuni.

²¹ Ia na ka oqo kemuni na kania maivei ira na ka kecega sa vuka ka qasi e na yavana vava, sa vakasagana ka yava balavu, me daulade kina e dela i vuravura;

²² io oqo ga vei ira kemuni na kania; na veimataqali vodre.

²³ Ia na ka tani kecega sa vuka ka qasi, sa yavai va, sa na ka vakasisila vei kemuni.

²⁴ Ia na ka oqo kemuni na sega ni savasava kina: o ira kecega sa tara na yagodra ni sa mate, ena sega ni savasava ka yacova na yakavi.

²⁵ Ia ko koya yadua sa colata tani na yagodra ni sa mate, me sa sava nonai sulu, ena sega talega ni savasava ko koya ka yacova na yakavi.

²⁶ A yago mate ni manumanu kecega sa wase na kena ququ, ka sega ni basika na kena wase, se sega ni mama vakarua na kena, sa sega ni savasava vei kemuni: ko ira yadua sa tara ena sega ni savasava.

²⁷ Ia na ka kecega sa lako e na qalokana, vei ira na yavusa manumanu kecega sa lako e na yavana vava, oqori sa sega ni savasava vei kemuni: o ira kecega sa tara na yagodra ni sa mate, ena sega ni savasava ka yacova na yakavi.

²⁸ Kei koya sa colata tani na yagodra ni sa mate, me sava nonai sulu, ia ena sega ni savasava ka yacova na yakavi: era sa sega ni savasava vei kemuni.

²⁹ A ka talega oqo ena sega ni savasava vei kemuni e na ka sa dauqasi e dela i vuravura; na veimataqali kalavo kei na moko,

³⁰ io na veimataqali moko kece, kei na vokai.

³¹ Sa sega ni savasava na ka oqo vei kemuni, vei ira na ka kecega sa dauqasi: o ira kecega sa tara, ni sa mate, ena sega ni savasava ka yacova na yakavi.

³² Kei na ka kecega sa lutu kina e dua na ka oqo, ni sa mate, ena sega ni savasava; se dua nai yaya kau, sei sulu, se kulina, se taga, se nai yaya tani, sa caka kina e dua na ka, me toni ki wai, ia ena sega ni savasava ka yacova na yakavi; ia ena qai savasava.

³³ Kei na bilo qele kecega, sa lutu ki loma e dua na ka oqo, a ka kece sa tu kina ena sega ni savasava, ia na bilo me vorolaki.

³⁴ A kakana kecega sa tiri kina na wai ko ya, ena sega ni savasava: kei na wai kecega e gunuvi e na bilo kece vaka, ena sega ni savasava.

³⁵ Kei na ka kecega sa lutu kina e dua na tiki ni yagodra ni sa mate, ena sega ni savasava; na lovo, sei tutu ni kuro, me sa basuki sobu: sa qai sega ni savasava, ia me sega ni savasava vei kemuni.

³⁶ Ia na mata ni wai ga, se nai keli-wai, sa levu kina na wai, ena savasava: ia na ka sa tara na yagodra ni sa mate, ena sega ni savasava.

³⁷ Ia kevaka e dua na tiki ni yagodra sa lutuka e dua na sore ni sila sa la'ki kaburaki, ena savasava:

³⁸ ia kevaka sa vakasuasuataki na sore ni sila, a sa lutu kina na yagodra ni sa mate, ena sega ni savasava vei kemuni.

³⁹ Ia kevaka sa mate e dua na manumanu sa daulaukana vei kemuni, ko koya sa tara na yagona ena sega ni savasava ka yacova na yakavi.

⁴⁰ Ia ko koya sa kania e dua na tiki ni yagona ni sa mate, me sava nonai sulu, ia ena sega ni savasava ka yacova na yakavi: o koya talega sa colata na yagona ni sa mate, me sava nonai sulu, ena sega ni savasava talega ka yacova na yakavi.

⁴¹ Ia na ka dauqasi kecega sa qasi e na dela i vuravura sa ka vakasisila; me kakua ni laukana.

⁴² A ka kecega sa dolo e na ketena, kei na ka sa lako e na yavana vava, kei na ka kecega sa vuqa na yavana e na ka dauqasi kecega sa qasi e dela i vuravura, oqori mo ni kakua ni kania; ni sa ka vakasisila.

⁴³ Mo ni kakua ni vakayacora na nomuni vakasisilataki, e na dua na ka sa dauqasi, sa qasi voli, mo ni kakua talega ni vakatawasavasavataki kemuni e na ka oqori, mo ni dukadukali kina.

⁴⁴ Ni sai au ko Jiova na nomuni Kalou: o koya mo ni vakasavasavataki kemuni, mo ni savasava; ni'u sa savasava koi au: ia ni kakua ni vakadukadukalitaki kemuni e na dua na yavusa ka sa dauqasi, sa qasi e dela i vuravura.

⁴⁵ Ni sai au ko Jiova, sa kauti kemuni cake mai na vanua ko Ijipita, me'u nomuni Kalou: ia mo ni savasava kina, ni'u sa savasava koi au.

⁴⁶ Sa vakaoqo nai vakaro e na vuku ni manumanu e yavai va, kei na manumanu vuka, kei na ka kecega sa bula voli e na wai, kei na ka kecega sa qasi e dela i vuravura;

⁴⁷ me vakatakilakilataki na ka e sega ni savasava, kei na ka e savasava, na manumanu talega e tara ni laukana, kei na manumanu e tabu ni laukana.