Vunau ni Soro 10 - Vakavakadewa Makawa

Erau sa vakamatei ko Netapi kei Epaiu, 1-7. Sa vakarota ko Jiova me ra kakua ni gunuva na waini, se na yaqona na bete ni ra sa curuma na vale ni veitavaki, 8-11. A tiki ni soro sa dodonu me laukana, 12-15. Sa vunauci ira na bete ko Mosese, 16-20.

¹ Ia ko Netapi kei Epaiu na luve i Eroni, erau sa dui kauta na nona miqa ni ka boi vinaka, a rau sa biuta kina na bukawaqa, ka viria kina na ka boi vinaka, ka cabora e na mata i Jiova na bukawaqa tani, sa sega ni vakarota vei rau ko Jiova.

² A sa lako yani na bukawaqa maivei Jiova, ka kani rau, a rau sa ciba e na mata i Jiova.

³ A sa kaya vei Eroni ko Mosese, Oqo ka vosataka ko Jiova, ni sa kaya, Au na vakatabui vei ira era sa toro voleka vei au, ia ka'u na vakarokorokotaki e na matadra kecega na tamata. A sa galu ko Eroni.

⁴ Ia ko Mosese sa kacivi Misaeli kei Elisapani, na luve i Usieli na tama i Eroni lailai, a sa kaya vei rau, Toro mai, drau kauta tani na wekamudrau mai na mata ni vale tabu, ki nai bili ni tikotiko.

⁵ A rau sa toro voleka, ka kauti rau e na nodraui curucuru balavu ki nai bili ni tikotiko; me vaka ka kaya ko Mosese.

⁶ A sa kaya vei Eroni ko Mosese, vei rau talega na luvena, ko Eliesa kei Icama, Dou kakua ni luvata nai sala mai na ulumudou, kakua talega ni dresulaka na nomudou i sulu; de dou mate, de yaco talega na cudru vei ira kecega na tamata; ia ko ira ga na wekamudou, na mataqali kecega i Isireli, me ra tagicaka na kama sa vakavuna ko Jiova:

⁷ ia dou kakua ni curu yani e na katuba ni vale ni veitavaki, de dou mate: ni dou sa lumuti e na waiwai i Jiova. A ratou sa muria na vosa i Mosese.

⁸ A sa vosa vei Eroni ko Jiova, ka kaya,

⁹ Dou kakua ni gunuva na waini, se na yaqona kaukauwa, ni dou sa curu ki na vale ni veitavaki, o iko, se na luvemu, de dou mate: oqo me kenai lesilesi ka tawa mudu vei ira na nomudou veitabatamata;

¹⁰ mo dou vakatakilakilataka na ka e tabu kei na ka e sega ni tabu, kei na ka e sega ni savasava kei na ka e savasava;

¹¹ ia mo dou vakavulici ira na Isireli e na vunau kecega sa vosataka ko Jiova vei ira e na gusu i Mosese.

¹² A sa kaya ko Mosese vei Eroni, kei rau na luvena sa vo, ko Eliesa kei Icama, Dou kauta nai madrali laukana sa vo e na ka sa cabo e na bukawaqa vei Jiova, ka kania ni sa sega ni vakalevenitaki, ni dou sa tu voleka ki nai cabocabo-ni-soro: ni sa ka tabu sara:

¹³ ia dou kania e na dua na tikina tabu, ni sa nomu i votavota, kei na nodraui votavota na luvemu, e na ka sa cabo e na bukawaqa vei Jiova; ni'u sa vakaroti vakaoqo.

¹⁴ Ia na serena sa yalovaki kei na tabana sa lavelaveti dou kania e na dua na tikina savasava; o iko kei rau na luvemu tagane, kei iratou na luvemu yalewa; ni sa nomu i votavota, kei na nodra i votavota na luvemu, sa soli mai na nodra i madrali ni veivinakati era sa cabora na Isireli.

¹⁵ Na tabana sa lavelaveti kei na serena sa yalovaki me ra kauta vata mai, kei na uro sa cabo e na bukawaqa, ka me yalovaka mei soro e yalovaki e na mata i Jiova; ia me sa nomu, kei na nodra na luvemu talega, sai lesilesi ka tawa mudu; me vaka sa vakarota ko Jiova.

¹⁶ A sa vakasaqara matua ko Mosese na me sai soro ni valavala ca, ka raica, sa vakamai; a sa cudru vei Eliesa kei Icama, na luve i Eroni sa vo, ka kaya,

¹⁷ A cava drau sa sega ni kania kina nai soro ni valavala ca e na tikina tabu, ni sa ka tabu sara, a sa solia vei kemudou na Kalou me colata kina nai valavala ca ni soqosoqo, me sorovaki ira e na mata i Jiova?

¹⁸ raica, na kena dra sa sega ni kau ki loma ni tikina tabu: sa dodonu mo dou kania e na tikina tabu: me vaka ka'u a vakarota.

¹⁹ A sa kaya vei Mosese ko Eroni, Raica, era sa cabora edaidai na nodra i soro ni valavala ca, kei na nodra i soro kama, e na mata i Jiova; a sa yacovi au na ka vakaoqo: ia kevaka ka'u a kania nai soro ni valavala ca edaidai, sa na vinaka beka e na mata i Jiova?

²⁰ Ia ni sa rogoca ko Mosese, sa vakadonuya.