Vosavakaibalebale 8 - Vakavakadewa Makawa

A kenai rogorogo vinaka ko vuku, kei na kena yaga, 1-11. A kenai valavala e vuravura, 12-21. Sa ka mailiu sara ko koya, 22-31. A nonai vakaro vinaka, 32-36.

¹ Sa daukaci ko vuku, se segai? Ka dautabalaka na domona ko yalomatua?

² Sa tu e na dela ni tikina cecere, e na bati ni sala E na kena basoga ni sala:

³ E na matamata-ni-koro, e nai curucuru ki na koro, E na mata ni katuba, sa dauvunau ko koya, ka kaya;

⁴ Au sa kaci vei kemudou; Ia ka'u sa vosa yani vei kemudou, na luve ni tamata

⁵ Koi kemudou ka sega ni vuku, dou kila mada na vuku: Kei kemudou na lialia, dou yalomatua mai.

⁶ Dou rogoca ni'u na vosataka na ka vinaka; Ia na tebenigusuqu ni sa dalaga, ena tukuna na ka dodonu:

⁷ Ni na vosataka na ka dina na gusuqu; Ia na ca sa ka vakasisila ki na tebenigusuqu.

⁸ Sa dodonu kecega na vosa ni gusuqu; Sa sega kina na ka vereverea se takelo:

⁹ Sa macala kecega vua sa yalomatua, Ka dodonu vei ira era kunea na lomavuku.

¹⁰ Dou vinakata na noqu i vakavuvuli, ka cata na siliva; Kei na vuku, ka cata na koula talei;

¹¹ Ni sa vinaka na vuku ka ca na rupi; Ia na ka kecega e daudomoni sa sega ni vakatauvatani kaya rawa.

¹² Koi au ko vuku, keirau sa tiko kei yaloqaseqase, Ka'u sa daukunea ka kila na ka e dauveinanuyaki.

¹³ Oqo na rerevaki Jiova me cata na ka ca: Na qaciqacia, kei na viavialevu, kei na sala ca, Kei na gusu vosaveve, ka'u sa cata.

¹⁴ Sa noqu nai vakavuvuli, kei na vuku dina: Koi au na yalomatua; sa tu vei au na kaukauwa.

¹⁵ Sai au ga era buli kina na tui, Ka ra lewa vakadodonu kina ko ira na turaga ni lewa:

¹⁶ Sai au ga era ia kina na lewa na turaga, Kei ira na tamata turaga, io, ko ira kecega na turaga ni lewa e vuravura.

¹⁷ Au sa lomani ira era sa lomani au; Ia ko ira era sa qarai au taudonu era na kunei au.

¹⁸ Sa tiko vata kei au nai yau kei na vakarokoroko; Io nai yau veiqati kei na ka dodonu.

¹⁹ A ka ka'u sa vakavuna sa vinaka ka ca na koula, io sa ca na koula talei sara Ia na ka ka tubu e na vukuqu sa vinaka ka ca na siliva dina.

²⁰ Au sa liu tiko e na sala ni valavala dodonu, E loma ni sala ni lewa dodonu:

²¹ Me'u lewa me ra taukena na ka dina ko ira era sa lomani au; Ia ka'u na vakasinaita na nodra kato kamunaga.

²² Sa buli au ko Jiova ni sa vakatekivu na nona cakacaka, Sa liu koi au ka muri na nona cakacaka eliu.

²³ Au a lesi mailiu sara, mai nai vakatekivu, Ni sa sega ko vuravura.

²⁴ Ni sa sega na wai titobu, ka'u a sucu, Ni sa sega nai vurevure e levu kina na wai.

²⁵ Ni sa sega ni tauyavutaki na veiulu-ni-vanua, Ni sa sega na veiulu-ni-koro ka'u a sucu:

²⁶ Ni sa bera ni bulia ko koya na vuravura kei na vanua, Kei na kuvu-ni-soso kei vuravura.

²⁷ Ni sa vakarautaka na lomalagi, ka'u a tiko maikina: Ni sa vakavolivolita na dela ni wai titobu:

²⁸ Ni sa vakataudeitaka na o maicake: Ni sa vakaukauwataka nai vurevure ni wasawasa:

²⁹ Ni sa yalana na wasawasa Me kakua ni sivia na nona vosa na kena wai: Ni sa lesia na yavu kei vuravura;

³⁰ Au a qai tiko kaya me matai daucakacaka: Ka'u a nona ka e daurekitaki e na veisiga, Ka'u a marau tiko e matana;

³¹ Ka rekitaka na nona veivanua e vuravura sa tawa rawa; Ia ka'u a daumarautaki ira na luve ni tamata.

³² Dou qai vakarorogo kina kivei au, ragone: Ni ra sa kalougata ko ira era sa muria na noqu sala:

³³ Dou rogoca nai vakavuvuli, mo dou vuku, Dou kakua ga ni besetaka.

³⁴ Sa kalougata na tamata sa rogoci au, Ka sa vakatawa e na veisiga e na noqu veimatamata-ni-koro, Ka wawa tiko mai na duru ni noqu katuba.

³⁵ Ni sa kunea na bula ko koya sa kunei au; Ena vinakati koya talega ko Jiova.

³⁶ Ia ko koya sa cala vei au sa vakacacana na yalona Ko ira kecega era cati au, era sa vinakata na mate.