Vosavakaibalebale 7 - Vakavakadewa Makawa

Ai vakaro me vuku na cauravou, me kakua ni muria na yalewa ca, 1-5. Sa tukuna nai valavala ni yalewa dautagane, 6-23. Sa ia tale nai vakaro, 24-27.

¹ Na luvequ, mo muria na noqu vosa, Ka tugana ki yalomu na noqu vunau.

² Mo muria na noqu i vakaro, mo bula; Kei na noqu vunau me vaka na loa ni matamu.

³ Vauca ki nai qaqalo ni ligamu, Vola sara ki na lomamu.

⁴ Mo kaya ki na vuku Ko iko na ganequ; Ka vakatoka na yalomatua me wekamu yalewa:

⁵ Me rau maroroi iko mai na yalewa tani, Mai vua na kai tani sa vosa vakaveicavilaki.

⁶ Ni'u a rai yani mai nai sogo cicila, Mai na katuba ni noqu vale.

⁷ Ka'u a raici ira na yalowai, Ka'u a kunea e na kedra maliwa na cauravou, E dua vei ira sa sega ni vakayalo,

⁸ Ka sa lako voli yani e na sala ka volekata na nona tikina na yalewa; Ka sa muria na sala ki nona vale,

⁹ Ni sa yakavi sobu, e na yakavi bogi, Ni sa bogi loaloa ka butobuto mai:

¹⁰ Ka raica, sa rau sota kaya e dua na yalewa, Sa vakaisulu e nai sulu ni yalewa dautagane, a sa qaseqase na yalona.

¹¹ Sa daudomolevu ko koya, ka yalokaukauwa, Ka sa sega ni tiko dei na yavana e nona vale:

¹² Oqo sa tiko e tautuba, oqo sa tiko e na saqata ni koro, Sa wawa tiko e na tutu ni sala kecega.

¹³ Sa tauri koya, ka reguca, Ka sa vaqaqataka na matana vua, ka kaya,

¹⁴ Sa tu vei au nai madrali ni veivinakati; E na siga edaidai ka'u sa ia oti na noqu bubului:

¹⁵ O koya ka'u a lako mai kina me'u tavaki iko, Me'u qarai iko matua; ia ka'u sa qai kunei iko.

¹⁶ Au sa vakaiukuukutaka oti na noqu i kotokoto e nai tutuvi sa cula vakamatai. Kei na ka sa ceuti, kei na lineni matailalai ka veivolavolai ni Ijipita:

¹⁷ Au sa vakaisaluakitaka na noqu i davodavo E na mura, kei na yasi, kei na sinamoni.

¹⁸ Daru mai la'ki vakamarautaki vata mada e na loloma me mataka: Me daru veivakacegui sara e na veilomani:

¹⁹ Ni sa yali mai vale na watiqu, Sa la'ki lako vakayawa ko koya:

²⁰ Sa kauta vata kaya e dua na taga i lavo, Ena lako tale mai ki neitou e na siga ga ka lokuci.

²¹ E na nona vosa kamikamica tiko sa rawai koya, Ena vosa veicavilaki ni gusuna sa gumatua vua:

²² Sa la'ki muri koya sara, Me vaka na pulumokau ni sa la'ki vakamatei, Se vaka na lialia ni sa la'ki vesuki e nai vesu kau;

²³ Ka me qai laubasikataka na yatena na gasau; Me vaka na manumanu sa kusarawa yani ki nai cori, Ka sa sega ni kila ni sa ka me mate kina.

²⁴ O koya dou mai rogoci au mada, ragone, Ka vakarorogo ki na vosa ni gusuqu.

²⁵ Me kakua ni lesu tani na yalomu ki na nonai valavala, Kakua ni lako sese voli e na nona sala;

²⁶ Ni sa vakabalei ira oti na lewe vuqa: Io, sa vakamatei ira na kaukauwa e lewe vuqa sara.

²⁷ A nona vale na sala ki nai bulubulu, Sa lako sobu ki na loma ni vanua ni mate.