Vosavakaibalebale 5 - Vakavakadewa Makawa

Ai vakaro me vuli vuku, 1,2. E ca sara nai valavala ni yalewa ca; era rusa ko ira era vakarorogo kina, 3-14. A ka yaga nai valavala malua, 15-21; ia na tamata ca, sa daucoriti e na nonai valavala ca, 22,23.

¹ Na luvequ, mo vakarorogo ki na noqu vuku, Vakalakala daligamu ki na noqu yalomatua:

² Mo vakabauta kina na lomavuku, Ia me tu ga e na tebenigusumu na vosa vuku.

³ Ni sa titiri na oni mai na tebenigusu ni yalewa dua tani, a sa kamikamica sara na gusuna ka segai na waiwai:

⁴ Ia sa gaga na kenai otioti me vaka na duva gaga, Ka sa gata me vaka nai seleiwau batirua.

⁵ Sa lako sobu ki na mate na yavana; Sa yacova nai bulubulu na nonai lakolako.

⁶ De ko vakasamataka na sala ni bula, Sa veilakoyaki na nonai valavala, e dredre mo kila.

⁷ Dou rogoci au mada, ragone, Ka kakua ni lako tani mai na vosa ni gusuqu,

⁸ Mo muria ga na sala tani mo drau veiyawaki kaya, Mo kakua ni torova na katuba ni nona vale:

⁹ De ko solia vei ira na tani na kemui rogorogo vinaka, Kei na nomu veiyabaki vei ira sa sega ni loloma:

¹⁰ De mamau ko ira na tani e na nomu i yau; Ka tiko e na vale ni kai tani na ka ko oca kina;

¹¹ Ia ko qai vutugu maimuri, Ni sa kani oti na lewemu kei na yagomu.

¹² Ka kaya, Ulei! ni'u a cata na veivakatavulici, Ka beca na vunau na lomaqu;

¹³ Ka sa sega talega ni vakarogoca na domodra era vakavulici au, Ia vei ira era vunauci au ka'u a bese ni vakalakala daligaqu!

¹⁴ Sa vo e lailai me'u cakava na ka ca kecega E na kedra maliwa na lewe ni lotu kei nai soqosoqo.

¹⁵ Mo gunu wai mai na nomu keli-wai, Kei na wai drodro mai na nomu mata-ni-wai.

¹⁶ Me sa dui dave voli yani na nomu i vurevure, Kei na veiuciwai e na saqata ni koro.

¹⁷ Me nomu duaduaga, Ka sega ni nomudou vata kei ira na kai tani.

¹⁸ Me kalougata na nomu i vurevure; Ia mo marautaki koya sa watimu ni ko sa cauravou.

¹⁹ Me sa vaka na teira dauloloma ko koya, kei na me yalewa kila sa matavinaka; Mo mamau ga e na sucuna e na veigauna kecega; Mo marau tikoga e na nona loloma.

²⁰ Na luvequ a cava ko via marautaka kina na yalewa tani, Mo mokota kina na lomaserena na tani?

²¹ Ni sa tu e na mata i Jiova nai valavala ni tamata, Ka sa daunanuma kecega na nonai lakolako.

²² Ena lauti koya na tamata ca na nona caka cala, Ia e nai vau ni nonai valavala ca ena vesu kina ko koya:

²³ Ena mate ga ko koya ka sega ni vakavulici; Ia e na vuku ni nona lialia levu ena lako sese ga.