Vosavakaibalebale 4 - Vakavakadewa Makawa

Sa tukuna ko Solomoni ni sa vakavulici koya koi rau na nona qase, 1-4. Na ka eso ka vakavulici kina, 5-19. Sa qai ia tale ko koya na nonai vakavuvuli, 20-27.

¹ Dou rogoca, na luvequ, na nonai vakavuvuli na tamamudou, Ia dou vakarorogo mo dou kila kina na vuku.

² Ni'u sa solia vei kemudou nai vakavuvuli vinaka, Dou kakua ni biuta na noqu vunau.

³ Ni'u a luvena dua bau ko tamaqu, Au a nona gone ni toko ka sa vakamenemeneitaki au ko tinaqu.

⁴ Sa vakavulici au ko koya, ka kaya vei au, Me taura matua na noqu vosa na lomamu: Mo vakabauta na noqu i vakaro mo bula.

⁵ Mo rawata mada na vuku, mo rawata talega na yalomatua: Kakua ni guilecava; mo kakua talega ni lesu tani mai na vosa ni gusuqu.

⁶ Kakua ni biuti koya, ka na maroroi iko: Mo lomani koya, ka na vakatawai iko ko koya.

⁷ Sa ka levu duaduaga na vuku; mo rawata mada na vuku: Ia e na ka kece ko sa rawata mo rawata vata kei na yalomatua.

⁸ Mo taleitaki koya, ena vueti iko ki cake: Ena vakavuna na nomu dokai, ni ko sa mokoti koya.

⁹ Ena vakaisalataki iko e nai ukuuku talei: Ena solia vei iko nai sala vakaiukuuku.

¹⁰ Mo rogoca, na luvequ, ka vakabauta na noqu vosa; Ena qai vuqa na yabaki ni nomu bula.

¹¹ Au a vakavulica vei iko na sala ni vuku; Au sa tuberi iko e na sala dodonu.

¹² Ni ko sa lako tu, e na sega ni vakaleqaleqai na yavamu; Ia ni ko sa cici tu ko na sega ni tarabe.

¹³ Taura matua nai vakavuvuli; kakua ni laiva: Mo vakabauti koya; ni sa nomu vu ni bula ko koya.

¹⁴ Mo kakua ni lakova na nodra sala nai valavala ca, Kakua talega ni muria na nodra i lakolako na tamata ca.

¹⁵ Mo biuta ga, kakua ni torova; Gole tani maikina, ka lako tani yani.

¹⁶ Ni ra sa sega ni moce, kevaka era a sega ni cakava na ka ca; A ra sa sega ni moce rawa, kevaka era sega ni ia mada na veivakacacani.

¹⁷ Ni ra sa kania na madrai ni ca, Ka gunuva na waini ni valavala kaukauwa.

¹⁸ Ia na nodra sala na yalododonu sa vaka na rarama sa cila tu, Sa levu cake tiko na kena rarama ka yacova na siga levu.

¹⁹ Ia na nodra sala nai valavala ca sa vaka na butobuto: Era sa sega ni kila na ka era sa tarabe kina.

²⁰ Na luvequ, mo vakarorogo ki na noqu vosa; Mo vakatu daligamu ki na ka ka'u sa tukuna;

²¹ Me ra kakua ni yali e matamu; Mo tugana ga ki na vu ni yalomu.

²² Sa vu ni bula vei ira era sa kunea, Ka sa ka-ni-bula ki na yagodra taucoko.

²³ Mo vakatawa vakavinaka sara na yalomu; Ni sa taka maikina nai vurevure ni bula.

²⁴ Biuta tani vei iko na gusu takelo, Ia na tebenigusu vosaveve mo vakayawataka vei iko.

²⁵ Me rai vakadodonu yani na matamu, Kei na dakudaku-ni-matamu me qaradonu ga ki liu.

²⁶ Mo lewa deivaka nai lakolako ni yavamu, Ia na nomu sala kecega ena vakadodonutaki.

²⁷ Kakua ni ko gole tani ki nai matau se ki nai mawi: Tarova na yavamu mai na ca.