Vosavakaibalebale 31 - Vakavakadewa Makawa

Ai vakavuvuli i Lemueli e nai valavala malua, 1-7; kei na loloma vei ira sa rarawa, 8,9. Ai valavala ni yalewa vinaka sara sa vakawati, 10-31.

¹ A vosa i Lemueli na tui, na parofisai ka vakavulica vua ko tinana.

² A cava, na luvequ? a cava, na luve ni ketequ? Ia a cava, na luvequ ka'u a bubului kina.

³ Kakua ni ko solia na nomu kaukauwa vei ira na yalewa, Se na nomu i valavala ki na ka era rusa kina na tui.

⁴ I Lemueli, sa sega ni kilikili kei ira na tui, sa sega ni kilikili kei ira na tui me ra gunu waini; Se vei ira na luve ni tui me ra via gunu yaqona:

⁵ De ra gunu, ka guilecava na vunau, Ka kauta vakatani na lewa e na vukuna e dua sa vakararawataki.

⁶ Solia na yaqona vua sa voleka ni mate, Kei na waini vei ira sa bibi na lomadra.

⁷ Me gunu ko koya, ka guilecava na nona dravudravua, Ka sega ni nanuma tale na nona rarawa.

⁸ Mo vosa e na vukudra na galu, E na vukudra kece era sa lewai me mate:

⁹ Mo vosa mada, mo lewa vakadodonu, Mo totaki ira na malumalumu kei na dravudravua.

¹⁰ Ko cei sa kunea rawa na yalewa sa vinaka sara? Ni sai yau levu ko koya kai yau lailai na rupi.

¹¹ Sa vakararavi sara vua na yalo ni watina, Ia sa sega kina ni yaga vua nai toki ni valu.

¹² Ena caka vinaka vua ka sega ni caka ca E na veisiga kecega sa bula kina ko koya.

¹³ Sa qara na vutika ni sipi, kei na lineni, A sa makututaka na cakacaka ni ligana.

¹⁴ Sa vaka na nodra waqa na tamata dauveivoli; Sa kauta vakayawa mai na nona kakana.

¹⁵ Sa sou e na mataka caca, Ka sa solia vei ira na nona lewe ni vale na kedratou, Kei na nodratou i tavi na nona vada.

¹⁶ Sa nanuma e dua na were, ka volia: Ia e na ka e rawa e na ligana sa tea na were-ni-vaini.

¹⁷ Sa vauca na tolona e na kaukauwa, Ka sa gu levu na ligana.

¹⁸ Sa kunea ni sa vinaka na nona ka ni vovoli: Sa sega ni boko e na bogi na nona cina.

¹⁹ Sa dodoka na ligana ki nai vakawiri ni wa-ni-sulu, Ka sa taura e na ligana nai tokatoka ni lineni.

²⁰ Sa dodoka yani na ligana me soli ka vei ira sa dravudravua; Io, sa dodoka na ligana vei ira na luveniyali.

²¹ Sa sega ni rerevaka na uca-vulavula de tauci iratou na nona lewe ni vale: Ni sa taqa rua na nodratou i sulu kecega na nona lewe ni vale.

²² Sa cakava nai tutuvi sa cula vakamatai me nona; Na nonai sulu sa lineni matailalai ka lokaloka.

²³ Sa kilai mai na matamata-ni-koro na watina, Ni sa tiko vata kei ira na qase ni vanua.

²⁴ Sa cakava nai sulu lineni vakamatailalai, ka sa volitaka; Ka sa vakauta nai vau ni sulu vua na dauveivoli.

²⁵ Na nonai sulu na kaukauwa kei nai tovo vakamarama; Ia ena reki ko koya e na gauna maimuri.

²⁶ Sa vosa vakavuku na gusuna; Ia nai vakavuvuli ni loloma sa tiko e na yamena.

²⁷ Sa vakaraica vinaka na nodratou i valavala na nona lewe ni vale, Ka sa sega ni kania na kakana ni vucesa.

²⁸ Eratou tubu cake na luvena, me vosavakalougatataki koya; A watina talega, sa vakacaucautaki koya, ka kaya,

²⁹ Era lewe vuqa na yalewa era sai valavala vinaka, Ia ko iko, ko sa uasivi cake vei ira kecega.

³⁰ A ka lasu na saweka, ka sega ni yaga na matavinaka: Ia na yalewa sa rerevaki Jiova, ena vakacaucautaki:

³¹ Solia vei koya na vua ni ligana; Ia me vakacaucautaki ko koya mai na matamata-ni-koro e na vuku ni nona cakacaka.