Vosavakaibalebale 30 - Vakavakadewa Makawa

Sa tukuna ko Akuri na ka e vakabauta, 1-6, kei na nona masu, 7-9. Nai tabatamata ca e va, kei na ka e va sa sega ni mamau rawa, 10-16. Sa tabu ni beci ira na qase, 17. E va na ka e dredre ni kilai, 18-20; ka va na ka sa dredre ni vosoti, ka va na ka sa vuku, 21-28; ka va na ka sa matavinaka, 29-31. Me kua na veicudruvi kei na veileti, 32,33.

¹ Na vosa i Akuri, na luve i Jake, na parofisai ka vosataka ko koya vei Icieli, io vei rau ko Icieli kei Ukali.

² E dina ni'u sa lialia ka ra yalomatua na tamata kecega, Ka sa sega vei au na vuku vakatamata:

³ Au a sega ni vuli vuku, Ka'u sa lecavi koya talega na Yalosavasava.

⁴ Ko cei sa cabe cake ki lomalagi, se lako sobu mai? Ko cei sa kumuna na cagi ki ligana? Ko cei sa vauca na wai e nai sulu? Ko cei sa lesia kecega nai yalayala kei vuravura? Ko cei na yacana, ko cei talega na yaca i koya na luvena, kevaka ko sa kila?

⁵ A nona vosa kecega na Kalou sa savasava: Nai sasabai ko koya vei ira kecega era vakararavi vua:

⁶ Mo kakua ni vakaikuritaka na nona vosa, De vunauci iko ko koya, ka ko sa kune kina mo tamata lasulasu.

⁷ E rua na ka ka'u sa kerea vei kemuni; Mo ni kakua ni bureitaka vei au ni'u sa bula tiko:

⁸ Mo ni kauta tani vakayawa vei au na ka lasu kei na vosa lasu: Mo ni kakua ni soli au me'u dravudravua se me'u vutuniyau; Ni vakani au e na kakana sa rauti au:

⁹ De'u mamau, ka lasutaki kemuni, ka kaya, Ko cei ko Jiova? Se'u dravudravua, ka butako, Ka cavuta wale na yaca ni noqu Kalou.

¹⁰ Kakua ni beitaka na tamata e na ca vua na nona turaga, De vatonaki iko ko koya, ka ko sa vakacalai kina.

¹¹ Sa dua na mataqali sa vatonaka na tamadra, Ka sega ni vosavakalougatataka na tinadra.

¹² Sa dua na mataqali sa nanumi ira ni ra savasava, Ia sa sega ni sava tani na nodra dukadukali.

¹³ Sa dua na mataqali, a ka vakaidina na nodra mata viavialevu! Ka sa cecere na dakudaku-ni-matadra.

¹⁴ Sa dua na mataqali sa vaka nai seleiwau na batidra, ka vaka nai sele na bati ni galegaledra, Me ra kani ira laivi kina na yalomalumalumu mai dela i vuravura, kei ira na dravudravua maivei ira na tamata.

¹⁵ Sa rua na luvena yalewa na aluka, a rau dau kerekere, Solia mai, solia mai. E tolu na ka sa sega ni mamau rawa, Io, e va sa sega ni kaya, Sa rauta:

¹⁶ Nai bulubulu; kei na kete yava; Na qele sa sega ni mamau e na wai; Kei na bukawaqa sa sega ni kaya, Sa rauta.

¹⁷ Na mata sa vakalialiai tamana, Ka sa beca me talairawarawa vei tinana, Ena covuta na reveni ni uciwai, Ka kania na luve ni ikeli.

¹⁸ E tolu na ka e veivakurabuitaki vei au, Io, e va ka'u sa sega ni kila:

¹⁹ Na kenai vukavuka ni ikeli mai lomalagi; Na kenai dolodolo ni gata e na dela ni vatu; Na we ni waqa e loma ni wasawasa; Kei nai valavala ni tagane vua na goneyalewa.

²⁰ Sa vakaoqo na nonai valavala na yalewa dautagane; Sa kana, ka qusia na gusuna, Ka kaya, Au sa sega ni kitaka na ka ca.

²¹ E tolu na ka sa yavavala kina ko vuravura, Io, e va sa sega ni vosota rawa:

²² Na tamata wale ni sa buli me turaga; Kei na tamata lialia ni sa mamau e na kakana;

²³ Na yalewa vakasisila ni sa vakawati; Kei na vada sa veitaravi kei na nona marama.

²⁴ E va na ka e vuravura sa lalai, Ka sa vuku vakalevu sara:

²⁵ A kadi na yavusa sa sega ni kaukauwa, Ia era vakarautaka na kedra e na vula i katakata;

²⁶ A koni na yavusa sa sega so ni kaukauwa, Ia sa cakava na nodra vale e na qara vatu;

²⁷ Sa sega na nodra tui na vodre, Ia era sa lako kece yani vakamataivalu;

²⁸ A sare sa qasi voli e na ligana, Ia sa tiko e na nodra vale na tui.

²⁹ E tolu na ka sa totoka na nodra i lakolako, Io, e va sa lako vakatotoka voli:

³⁰ Na laioni, o koya sa kaukauwa vei ira kecega na manumanu, A sa sega ni lesu tani e na vukuna e dua;

³¹ Na ose ni valu; kei na me tagane; Kei na tui, sa sega ni yaga me vorati.

³² Kevaka ko sa caka vakalialia ni ko sa vakalevulevui iko, Se ko sa nanuma na ka ca, Mo tabonaka na gusumu e na ligamu:

³³ Ni sa rawa na pata ni sa vakayavalati na wai-ni-sucu, A sa tubu na dra ni sa laukini na ucu: A sa tubu na veileti ni sa levu na cudru.