Vosavakaibalebale 3 - Vakavakadewa Makawa

Na talairawarawa, 1-4. Na vakabauta kei na yalomalumalumu, 5-8. Na daulomasoli, 9,10. Na vosota, 11,12. Na kena talei na vuku, 13-20. Na kena yaga, 21-26. Nai vakaro me ia nai valavala loloma, 27-29, kei na veivinakati, 30; me kakua ni vuvutaki na tamata ca, 31-35.

¹ Na luvequ, mo kakua ni guilecava na noqu vunau; Ia me muria tiko na noqu i vakaro na lomamu:

² Ni na vakaikuritaki kina vei iko na siga e vuqa, Kei na bula dede, kei na sautu.

³ Me kakua ni takali vei iko na yalololoma kei na dina: Mo vakaitaube mada kina; Mo vola sara ki na lomamu:

⁴ Ko na qai kunea na loloma ka rogo vinaka E na mata ni Kalou kei na mata ni tamata.

⁵ Mo vakararavi vei Jiova e na vu ni yalomu: Ka mo kakua ni vakararavi ki na nomu yalomatua:

⁶ Mo vakarogotaka vua na nomu sala kecega, Ia ena vakadodonutaka na nomu i lakolako ko koya.

⁷ Mo kakua ni nanuma ni ko sa vuku: Mo rerevaki Jiova, ka lako tani mai na ca:

⁸ Ena ka ni bula ki na nomu vicovico, Ka na vakauto kina na suimu.

⁹ Mo dokai Jiova e na nomu i yau, Kei nai sevu ni nomu vuata kecega:

¹⁰ Ena qai tawa sara kina na nomu lololo, Ka vuabale na nomu i keli-ni-waini e na waini vou.

¹¹ Na luvequ, mo kakua ni beca ni sa vakavulici iko ko Jiova; Se yalowai ni sa vunauci iko ko koya:

¹² Ni sai koya sa lomana ko Jiova, sa vunauca ko koya; Me vaka sa ia na tamata vua na luvena sa vinakata ko koya.

¹³ Sa kalougata na tamata sa kunea na vuku, Kei na tamata sa rawata na yalomatua:

¹⁴ Ni sa vinaka na dauveivoli kina ka ca na dauveivoli e na siliva, A kena tubu talega sa vinaka ka ca na kena tubu na koula dina.

¹⁵ Sai yau levu ko koya, ka sai yau lailai na rupi: Ia na ka kecega ko sa domona sa sega ni yaga me vakatauvatani kaya:

¹⁶ A bula dede sa tiko e na ligana i matau; Ka sa tiko e na ligana i mawi nai yau kei na vakarokoroko:

¹⁷ A nona sala na sala ni vinaka, A nonai lakolako kece talega nai lakolako ni vakacegu:

¹⁸ A kau ni bula ko koya vei ira era taura; Ka sa kalougata ko koya yadua sa taura matua tiko.

¹⁹ Sa tauyavutaki vuravura ko Jiova e na nona vuku; Ka sa vakarautaki lomalagi e na nona lewa:

²⁰ E na nona yalomatua, Sa basuki kina na wai titobu, Ka sa tau na tegu mai na o.

²¹ Na luvequ, me kakua ni yali e matamu na ka oqori: Mo taura ga na vuku dina kei na lewa vinaka:

²² Ena qai kena bula ni yalomu, Kei na kenai ukuuku ni domomu:

²³ Ko na qai lako vakavinaka e na nomu sala, Ia ena sega ni tavutu na yavamu:

²⁴ Ni ko sa davo sobu, ko na sega ni rere; Io, ko na davo sobu, ka na vinaka na nomu moce;

²⁵ Kakua ni ko taqayataka na rere vakidacala, Se na nodra rusa nai valavala ca, ni sa yaco mai:

²⁶ Ni na nomu ga ko Jiova mo vakararavi vua, Ka na tarova na yavamu ko koya me kakua ni tacori.

²⁷ Mo kakua ni bureitaka na ka vinaka vei ira e dodonu me nodra, Ni sa rawa vei iko mo cakava:

²⁸ Kakua ni kaya vua na kai nomu, Mo lako mada, ka mani lako tale mai, Au na qai solia vei iko e na mataka; Ka ni sa tu vei iko na ka ko ya.

²⁹ Kakua ni nakita na ka ca vua na kai nomu, Ni sa tiko vakavinaka kei iko.

³⁰ Kakua ni veileti walega kei na dua na tamata, Kevaka sa sega ni caka ca vei iko.

³¹ Mo kakua ni vuvutaka na tamata i valavala vakasaurara Ka mo kakua talega ni digitaka e dua na nona sala:

³² Ni sa ka vakasisila vei Jiova na yalovakatani: A sa tiko ga kei ira na yalododonu na nona vosa vuni.

³³ Na cudru i Jiova sa tiko e na nodra vale nai valavala ca: Ia sa vakalougatataka ko koya na nodra i tikotiko na yalododonu

³⁴ E dina sa vakalialiai ira ko koya era sa dauveivakalialiai: Ia sa solia na loloma vei ira na yalomalumalumu.

³⁵ Ko ira na vuku, ena nodra na vakarokorokotaki: Ia sa nodra i votavota na lialia me ra madua.