Vosavakaibalebale 26 - Vakavakadewa Makawa

¹ Me vaka na uca-vulavula e na vula i katakata, kei na uca e na vula i mago, Sa vakakina sa sega ni kilikili kei na lialia na vakarokorokotaki.

² Me vaka na siparo sa veiseseyaki, kei na kakabace sa veivukayaki, Sa vakakina na veivatonaki wale ena sega ni yaco.

³ Sa kena na ose na wa-qaliqali sa kena na asa nai tarovi, Kei nai waro ki na dakudra na lialia.

⁴ Mo kakua ni sauma na nona vosa na tamata lialia me vaka na nona lialia, De ko sa vakataki koya talega.

⁵ Mo vosa vua na lialia me vaka na nona lialia, De nanumi koya ga me vuku.

⁶ O koya sa tala na tamata lialia e na dua na ka, Sa muduka na yavana, ka sa gunuva na ka ca.

⁷ Sa sega ni tautauvata na yavana na gera: Sa vakakina na vosa vakaibalebale e na gusudra na lialia.

⁸ Me vakataki koya sa tauca na vatu talei ki nai binibini vatu wale, Sa vakakina ko koya sa vakarokoroko vua na lialia.

⁹ Me vaka sa lau na voto ni kau ki na liga i koya sa mateni, Sa vakakina na vosa vakaibalebale ni ra sa cavuta ko ira na lialia.

¹⁰ Me vakataki koya na dauvanavana sa vuetaki ira kecega na tamata, Sa vakakina ko koya sa volia na lialia kei ira era sa lako voli tu.

¹¹ Me vaka na koli ka lesu tale ki na nona lua, Sa lesu tale vakakina na lialia ki na nona lialia.

¹² Ko sa kunea li na tamata sa nanumi koya ga me vuku? Sa na vuku cake vei rau ko koya sa lialia.

¹³ Sa kaya na yalovucesa, E dua na laioni ka tiko e na sala; Sa dua na laioni sa tiko e na saqata.

¹⁴ Me vaka nai sogo ni katuba sa veilakoyaki e na kenai ruberube, Sa vakakina na vucesa e na nonai mocemoce.

¹⁵ Sa tonisua na kena na vucesa e na dari; Ka sa dredreta ni kauta tale mai ki gusuna.

¹⁶ Sa nanumi koya ga me vuku na vucesa, Ka lialia ko ira na tamata e lewe vitu era sa tukuna rawa nai balebale ni ka.

¹⁷ O koya sa lako voli tu, ka leleca me nona na nodra veileti na tani, Sa vaka e dua sa taura na daligana e dua na koli.

¹⁸ Me vakataki koya na lialia dina sa veibiuyaka na bukawaqa, Kei na gasau, kei na mate,

¹⁹ Sa vakakina na tamata sa vakaisina na kai nona, A qai kaya, Na noqu veiwali ga.

²⁰ Ni sa sega ni buka ni bukawaqa, sa boko kina: Ia ni sa sega ni daukakase, sa sega na veileti.

²¹ Me vaka na qilaiso ki na qilaiso waqa, kei na buka ki na bukawaqa; Sa bukana vakakina na veileti na tamata dauveileti.

²² A nona vosa na daukakase sa vaka na vue, Ka sa lau sara ki na vu ni loma ni tamata.

²³ A tebenigusu katakata kei na yalo sa ca, Sa vaka na bilo qele sa boro e na butubutu ni siliva.

²⁴ O koya sa veicati sa vosa vakaveivakaisini, Ka sa binia na lasu e lomana;

²⁵ Ni sa vosa vakavinaka ko koya, kakua ni ko vakadinata: Ni sa vitu na ka vakasisila sa tiko e lomana:

²⁶ Sa ubi e na lasu na nona veicati, Ia ena vakavotui na nona ca e matadra nai soqosoqo.

²⁷ O koya sa kelia nai keli ena lutu kina; Ko koya talega sa vaqiqica na vatu, ena qiqi tale mai vua.

²⁸ A yame lasulasu sa cati ira era ca kina; Ia na gusu veicavilaki sa ia na veivakarusai.