Vosavakaibalebale 25 - Vakavakadewa Makawa

¹ Oqo talega na Vosa vakaibalebale i Solomoni, ka vola ko iratou na tamata nei Esekaia na tui Juta.

² Sa rogo na Kalou ni sa vunia na ka: Ia sa rogo ko ira na tui ni ra sa vakataroga matua na ka.

³ A kena cecere na lomalagi, kei na kena titobu na vuravura, Kei na kena sega ni kilai rawa na lomadra na tui.

⁴ Kauta tani na kena butubutu mai na siliva, Ena qai dua na kena bilo na dauriri siliva.

⁵ Kauta tani na tamata ca mai na mata ni tui, Ena qai vakataudeitaki e na ka dodonu na nonai tikotiko.

⁶ Kakua ni ko dokai iko e matana na tui, Ia mo kakua ni la'ki tu e na nodra tikina na tamata turaga:

⁷ Ni sa vinaka me ra kaya vei iko, Mo lako cake mai ki ke; Ka ca mo vakatalai sobu e na mata i koya na tui O koya ko sa raica oti.

⁸ Kakua ni kusarawa ni la'ki veileti, De ko lecava na ka mo cakava e na kenai otioti, Ni sa vakamaduataki iko na kai nomu.

⁹ Drau veivosakitaka na nomu ka kei koya ga na kai nomu; Ia mo kakua ni vakavotuya na ka vuni vua e dua tani:

¹⁰ De vakamaduataki iko ko koya sa rogoca, Ka sega ni takali rawa na kemui rogo ca.

¹¹ A ka sa vosataki taudonu Sa vaka na moli koula e na kato siliva.

¹² Sa vaka na sau koula, kei nai ukuuku sa koula dina Ko koya sa vunauca vakavuku na daliga rogo.

¹³ Me vaka na liliwa ni uca-vulavula e na vula i mago, Sa vakakina ko koya nai talaki dina vei ira sa talai koya: Ni sa vakaceguya kina na yalodra na nona turaga.

¹⁴ O koya sa dokai koya e na nonai solisoli lasu, Sa vaka na o kei na cagi ka sega na uca.

¹⁵ Na yalomalua sa rawa kina na turaga, Ia na yame malumalumu sa musuka na sui.

¹⁶ Ko sa kunea li na oni? kania ga me rauti iko, De ko mamau kina, ka luaraka.

¹⁷ Tarova na yavamu mai na vale ni kai nomu; De sa vakasosataki ko koya, ka cati iko.

¹⁸ A tamata sa tukuna vakailasu na kai nona Sai tukituki, kei nai seleiwau, kei na gasau gagata.

¹⁹ A vakararavi vua na daulawaki e na siga ni rarawa Sa vaka na bati sa ramusu, kei na yavana e dua sa mavule.

²⁰ Me vaka e dua sa kauta tani nai sulu e na siga ni liliwa, kei na livi wai wiwi ki na lase, Sa vakakina ko koya sa ia na sere vua sa bibi na lomana.

²¹ Kevaka sa viakana na nomu meca, mo vakania e na madrai; Kevaka sa viagunu, mo solia vua na wai ni gunu:

²² Ni ko na binia kina na qilaiso sa waqa tu ki na uluna, Ia ena sauma vei iko ko Jiova.

²³ Na tokalau sa kauta mai na uca: Kei na kakase vuni na mata cudrucudru.

²⁴ Sa vinaka na tiko e na tutu ni dela ni vale, Ka ca na tiko kaya na yalewa dauveileti e na vale levu.

²⁵ Me vaka na wai liliwa vua sa viagunu, Sa vakakina nai tukutuku vinaka mai na vanua yawa.

²⁶ A tamata yalododonu sa cuva vua na tamata ca Sa vaka na mata-ni-wai vuvu, kei nai vurevure ni wai ca.

²⁷ Sa sega ni vinaka mo kania vakalevu na oni: Ka sa sega ni vinaka me ra viaviarogo na tamata.

²⁸ A tamata sa sega ni lewa rawa na yalona Sa vaka na koro sa kabasu, ka sega ni vakabai.